Монгол ардын уртын дуу “Эртний сайханг”  10 уртын дуучин эгшиглүүлснээр Орхон аймгийн баяр наадам ёслол төгөлдөр, Цэнгэлдэх хүрээлэндээ  эхлэв. 
Цэнгэлдэх хүрээлэнгийнхээ хойморт заларсан наадамчин олон Үндэсний их баяр наадам, Монголын Тулгар төрийн 2234 жил, Их Монгол улсын 819 жил, Ардын хувьсгалын түүхт 104 жилийн ой, Орхон аймгийн баяр наадмын нээлт  сайхан боллоо хэмээн шагшиж   байна. 

Баяр наадмын оргил, наадамчин олны хамгийн хүсэн хүлээдэг хэсэг нь  яалт ч үгүй БАЯР НААДМЫН НЭЭЛТ  юм. 

Энэ жилийн нээлтийн онцлог нь эрийн гурван наадмаа магтан дуулсан, төрөл бүр дээр нь Орхон аймаг, Эрдэнэт хотынхоо нэрийг өндөрт өргөж яваа харваач, уяач, бөхчүүдээ алдаршуулснаараа онцлог байв. 

Хорвоогийн хамаг явдлыг хоёрхон утсандаа багтаасан морин хуурын хөг эгшиглэж, 100 морин хуурч Ц.Сүхбаатарын “Үүлэн бор” аялгуугаар наадамчин олныхоо сонорыг мялаасан нь гайхамшиг байлаа. 

"UB DRUMS" бөмбөрийн хамтлагийн тоглолт, “Хасрын үрс” уран нугаралт, морьт циркийн үзүүлбэр наадамчин олныг огшоов.  МУСТА Б.Жавхлантөгс, 20 хүүхдийн найрал хамтарсан Төрийн дуулал, МУСТА Т.Дэлгэрмөрөн "Их Монголын цэц", МУСТА Г.Энхцэцэг "Монгол бөхийн дуулал", МУСТА Э.Мөнгөнчимэг "Хулан хонгор",  МУСТА Б.Гүрбадам, Э.Чулуунчимэг нар "Эрийн гурван наадам" зэрэг ая дуугаа өргөж наадамчин олныг  уухайлан цэнгүүллээ. 
 

ЭРДЭНЭТ  ХОТЫНХОО ХӨГЖИЛ, ЦЭЦЭГЛЭЛТ, ӨӨРЧЛӨЛТ, ШИНЭЧЛЭЛТИЙН ТӨЛӨӨ ЗОГСОЛТГҮЙ УРАГШЛАХ БОЛНО

Аймгийн Засаг дарга Б.Зоригтбаяр нийт Эрдэнэтчүүддээ хандаж баяр наадмын мэндчилгээ дэвшүүлэв.  Тэрээр,  “Эрдэнэтчүүд бид хийсэн бүтээснээрээ омогшин, хийж бүтээхээрээ жигүүрлэн азай буурлууд, анхдагч- илгээлтийн эзэд, гадаад, дотоодын эрхэм хүндэт зочид төлөөлөгчид, цог золбоот залуус, нялх балчир үрсийнхээ хамтаар өргөн дэлгэр наадахаар  Төв цэнгэлдэх хүрээлэндээ хуран цуглаад байна.

 Эх орныхоо тусгаар тогтнол, эрх чөлөөг бататган бэхжүүлж, эвийн хүч, шударга  ёс, бүтээлч сэтгэлгээг эрхэмлэн дээдэлж, үндэсний түүх, эх хэл, соёл уламжлалаа нандигнан өвлөж, хөгжил дэвшлийн төлөө хичээн зүтгэж буй хүн бүхэнд талархал илэрхийлье.

Зуунаас зуун дамжин дүүлсэн хөгжлийн эрэмгий сайхан хүлэг  гэлтэй Эрдэнэт хот маань ирэх 2026 онд  50 жилтэйгээ золгоно. Энэ аргамаг сайхан хүлгийнхээ хаа ч хүрэх ирийг нь үл сааруулах, хатан жолоог эс алдруулах нь та бидний эрхэм үүрэг, нэр төрийн хэрэг юм.

Бид хагас зуун жил  гар хүрээгүй инженерийн шугам сүлжээгээ хонгилын системд оруулахаар, хотын доторх авто замуудаа шинэчилж өргөтгөж сайжруулахаар, гэр хорооллынхоо цахилгаан, эрчим хүчний найдвартай, тасралтгүй ажиллагааг хангахаар  энэ жилийн хөрөнгө оруулалт, бүтээн байгуулалтын ажлаа чиглүүлж байна. 

Эдгээр ажлыг гүйцэтгэхэд иргэд та бүхний тав тухыг түр алдагдуулж байгаа ч бид бүхэн зуны энэ цаг хугацаандаа  багтаахаар зориглон хийж байна.  Энэ бүтээн байгуулалтын ажлуудыг ойлгож хүлээж авч байгаа Эрдэнэт хотынхоо нийт иргэддээ бас баярлалаа.  

Мөн бид Эрдэнэт хотын хөгжлийн ерөнхий төлөвлөгөөгөө 20 жилээр нь батлуулахаар, Эрдэнэт хотынхоо гамшигт тэсвэртэй байдлыг нэмэгдүүлэхээр үерийн далангийн том бүтээн байгуулалтын ажлыг эхлүүлээд байна.  Эдгээр ажлыг анх санаачилж, эхлүүлсэн Орхон аймгийн үе, үеийн удирдлага, Засаг дарга нар, хамтран дэмжин ажилласан УИХ-ын гишүүд  болон мэргэжлийн байгууллагууддаа талархаж байгаагаа энэ ташрамд хэлье. 

Бид хөгжлийг хурдасгах, хуримтлагдсан асуудлаа шийдвэрлэх зорилгоор “Эрдэнэт” үнэт цаас гаргах ажлыг санаачилж аймгийн ИТХ, Засгийн газарт асуудлаа танилцуулж тодорхой шийдвэрүүд гарч,  ажил маань амжилттай  ургашилж байна. 

Орхон аймаг, Эрдэнэт хотынхоо  давуу тал, үнэт зүйлээ бид  “Эрдэнэт-Хүний хөгжил” хэмээн тодорхойлж ирэх 4 жилийнхээ бодлогын гол цөм болгон ажиллаж байна.  
Та, бидний өмнө хийж, хэрэгжүүлэх олон ажил  байна. Цаг хугацаа өнгөрөх мөч бүрт бид хариуцлагатай байж хотынхоо хөгжил, цэцэглэлт, өөрчлөлт, шинэчлэлтийн төлөө зогсолтгүй урагшлах болно” хэмээв. 

Баяр наадмын нээлтийн арга хэмжээнд нийтдээ 360 уран бүтээлч  оролцсон. Олны хэсэгт мэргэжлийн уран бүтээлчид бус дугуйлан, Соёлын төвийн багш нар оролцсон  гэдгийг Баяр наадмын ерөнхий найруулагчаар  ажилласан Аялгуу соёлын төвийн эрхлэгч Бат-Ундрах онцолж байв. Тэрээр, 14 дэхь жилдээ аймгийнхаа баяр наадмыг  хөтөлж, энэ жил анх удаа найрууллаа. 

Монгол үндэстний дэлхийн олон улсаас ондооших гол ялгарал, түүх соёлын илэрхийлэл бол Үндэсний их баяр наадам.

Тиймдээ ч хүчит бөхийн барилдаан, хурдан морьдын уралдаан, цэц мэргэнээ сорих сурын харваа, шагайн харваагаа залуу үедээ таниулах, түгээх, өвлүүлэх үндсэн зорилгоо нээлтийн тоглолтодоо шигтгэж, тодоор харуулав. 

Баяр наадмыг зохион байгуулах хороон даргаар аймгийн Засаг даргын орлогч Б.Мөнхдалай, нарийн бичгийн даргаар ЗДТГ-ын Хууль эрх зүйн хэлтсийн дарга М.Мөнхбаяр нар ажиллаж  байна. Баяр наадмыг зохион байгуулах хороон дарга, аймгийн Засаг даргын орлогч Б.Мөнхдалай “Аймгийнхаа баяр наадамдаа төрийн албан хаагчид, соёл урлагийн уран бүтээлчид сар гаруйн хугацаанд хамтын хүч, нэг сэтгэлээр бэлдэж өнөөдөр наадамчин олондоо өргөн барилаа. Олон хүний сэтгэл, хөдөлмөр шингэлээ. Арын албанд ажиллаж байгаа, иргэдийн эрүүл аюулгүй байдлыг ханган ажиллаж байгаа алба хаагчиддаа, цэвэр цэмцгэр орчинд наадуулж байгаа Хот тохижуулах газрынхаа ажилтан албан хаагчдад талархал илэрхийлье” гэв. 

“Шинэ морь барианы газар харууц сайтай, сайхан газар байна”

Энэ жилийн Орхон аймаг, Эрдэнэт хотын  баяр наадам олон зүйлсээр онцлог болж  байна. Тэдгээрийн нэг нь 20 гаруй жилийн дараа Орхон аймаг өөрийн аймгийн нутаг дэвсгэрт хурдан морины уралдаанаа зохион байгуулж байгаа явдал юм. Сархиа уулын Сархиагийн аманд байгуулсан шинэ морь барианы газар харууц сайтай хэмээн иргэд ам сайтай байна. 300 орчим хүний суудалтай сүүдрэвч, тайз, ОО, зам харгуй гээд бүхий л зүйлийг тохижуулахад  “Эрдэнэт хүлэг” морин спорт уяачдын холбоо хамтран ажиллаж, сэтгэл, зүтгэл гаргасан билээ, ирэх жилүүдийн наадмаар илүү сайхан болох нь дамжиггүй. 

Өчигдөр сонгомол насаар эхэлсэн баяр наадмын хурдан морины  уралдаанд газрын газрын хурдан хүлгүүд торгон жолоогоо өргөлөө. Бороо ус элбэг байсан ч уралдааны замд ямар нэгэн осол, гэмтэл, бэртэл гаралгүй  сайхан наадаж байна хэмээн тус холбооны дэд тэргүүн Н.Отгонбаяр ярилаа. 

Маргааш наадмын хоёр дахь өдөр  даага, соёолонгийн уралдаан болно. Соёолонгийн тоосонд дарагдах гэсэн, энэ жилийн баян ходоод, ирэх жилийн түрүү магнай болох дааганы уралдааныг үзэх гэсэн наадамчин олон  Сархиагийн амыг дүүргэх биз ээ. 

Аймгийн баяр наадамд Сэлэнгэ аймгийн Баруунбүрэн сумын харьяат үндэсний бөхийн улсын өсөх идэр начин Н.Бүрэнбаатар, Хөвсгөл аймгийн Шинэ-Идэр сумын харьяат Монгол Улсын начин Б.Ганхуяг тэргүүтэй улс аймгийн цолтой 128 бөх зодоглож байна.

Цэнгэлдэх хүрээлэнгийн Соёлын хотхон ёстой  л 8 наснаас 80 настны хөлд дарагдаж  байна. Тэнд соёлын байгууллагын уран бүтээлчид  соёлын олон талт үйл ажиллагааг наадамчин олондоо толилуулж байгааг хүрч нэг сонирхоорой. 
 

Мэдээллийн төв