Эрдэнэт үйлдвэр ТӨҮГ-ын хайгуулын тусгай зөвшөөрөл авах хүсэлтийг дэмжлээ
Орхон аймгийн ИТХ-ын ээлжит бус 5 дугаар хуралдаан болж байна. Хуралдааны эхэнд Түгээмэл тархацтай ашигт малтмалын хайгуулын тусгай зөвшөөрлийг олгох тухай асуудлыг хэлэлцэв.
Тодруулбал, “Эрдэнэт үйлдвэр” ТӨҮГ-ын Түгээмэл тархацтай ашигт малтмалын хайгуулын тусгай зөвшөөрөл авах хүсэлтийг аймгийн ИТХ-ын Төлөөлөгчдийн 85 хувийн саналаар дэмжлээ.
Тус газар нь суурин газраас 3км, ойн сан бүхий ногоон бүсээс 2 км зайтай, Эрдэнэт үйлдвэр ТӨҮГ-ын Хаягдлын аж ахуйн зүүн талд бөгөөд Хаягдлын аж ахуйн даланг бэхжүүлэх, хүчитгэх, найдвартай үйл ажиллагааг хангах ажилд түүхий эдийн зориулалтаар ашиглахаар хайгуулын тусгай зөвшөөрөл хүсжээ.
Хэлэлцэж буй асуудалтай холбоотойгоор төлөөлөгчид хайрга, дайрганы чанарт анхаарах, олборлолтын дараах нөхөн сэргээлт зэрэг асуудлыг хөндөж асуулт асууж хариулт авлаа.
Өнөөдрийн байдлаар орон нутагт 11 байршилд ААН-ийн зөвшөөрөл сунгагдсан, 13 байршилд хайгуулын ажил хийгдэж байгаа бол гурван аж ахуйн нэгж идэвхтэй үйл ажиллагаа явуулж байна.
Ээлжит бус хуралдаанаар...
- Мэдээлэл шуурхай удирдлагын төвийг татан буулгах тухай
- Ой тэмдэглэх ажлын хүрээнд авах зарим арга хэмжээний тухай
- Аймгийн баяр наадмын хороо байгуулах, зардлын задаргаа батлах тухай
- Орхон аймаг, Эрдэнэт хотын болон хөдөө аж ахуйн салбарын 2025-2026 оны өвөлжилт, хаваржилтын бэлтгэл хангах арга хэмжээний төлөвлөгөө батлах тухай
- Аймгийн хэмжээнд төр хувийн хэвшлийн түншлэлээр хийх төслийн жагсаалт батлах тухай
- Орон нутгийн өмчийн 2024 оны дүн батлах тухай
- Аймгийн 2024 оны төсвийн гүйцэтгэл батлах тухай
- Санал оруулах тухай асуудлыг тус тус хэлэлцэнэ.
Мэдээллийн төв
