2024 оны үйл ажиллагаагаараа тэргүүлсэн хэлтэс, агентлагуудад шагналыг нь гардууллаа
Засаг даргын дэргэдэх Захиргааны 26 байгууллага, 2 сумдын ЗДТГ-ын 2024 оны үйл ажиллагаанд хяналт, шинжилгээ, үнэлгээг хийж дүнг нэтгэжээ. 2024 үйл ажиллагаагаараа тэргүүлсэн 5 байгууллагад өнөөдөр аймгийн Засаг дарга Б.Зоригтбаяр өргөтгөсөн шуурхайн үеэр шагналыг нь гардуулав.
2024 оны үйл ажиллагаагаараа аймгийн хэмжээнд Статистикийн хэлтэс нэгдүгээр байр, Орон нутгийн өмчийн газар хоёрдугаар байр, Биеийн тамир, спортын газар гуравдугаар байр, Санхүүгийн хяналт, дотоод аудитын газар дөрөвдүгээр байр, Хүнс, хөдөө аж ахуйн газар тавдугаар байрт шалгарч, өргөмжлөл тус бүр 3 сая төгрөгөөр шагнууллаа. Аймгийн Засаг дарга Б.Зоригтбаяр “Ирэх жилүүдэд хүрсэн түвшингөө хадгалж, үйл ажиллагаагаа илүү сайжруулахыг хүсье” гэлээ.
Аймгийн ЗДТГ-ын дарга Б.Ганзоригоор ахлуулсан 10 гаруй холбогдох албаныхнаас бүрдсэн ажлын хэсэг 3 чиглэл, 21 үзүүлэлтээр хяналт шинжилгээ үнэлгээг хийжээ.
Статистикийн хэлтэс хоёр жил дараалан үйл ажиллагаагаараа тэргүүлж байгаа бол өнгөрсөн жил 7-д эрэмбэлэгдэж байсан Орон нутгийн өмчийн газар энэ жил 2-р байрт орж урагшилжээ. Мөн Биеийн тамир, спортын газар өнгөрсөн жил 13-т бичигдэж байсан бол энэ жил 3-т, Санхүүгийн дотоод хяналт, аудитын газар 12, Хүнс, хөдөө аж ахуйн газар 18-т орж байсан бол энэ жил эхний тавдугаар байрт эрэмбэлэгдэж, үйл ажиллагаагаа сайжруулсан байна. Тухайн байгууллагын үзүүлэлт өмнөх жилээс хойшилж, урагшилсан нь байгууллагын үйл ажиллагаатай шууд холбоотой юм.
Мэдээллийн төв
