Есөн байршилд авто болон явган зам дагуух гэрэлтүүлгийг шинэчилж байна
Энэ оны хөрөнгө оруулалтын нэг томоохон ажил нь авто зам болон явган замын гэрэлтүүлгийн шинэчлэл юм. Нийт 9 байршилд авто зам дагуух 275ш, явган зам дагуу 105ш нийтдээ 380 гэрэлтүүлгийг шинэчлэх ажлыг орон нутгийн төсвийн хөрөнгө оруулалтаар “Мөнх номгон” ХХК гүйцэтгэж байна. Байршлаар нь авч үзвэл Сүмтэй уулзвараас Хивсний уулзвар хүртэл, Хойд дугуйгаас 100 айл, Орхон молл худалдааны төвөөс Кувейтийн тойрог, Жаст ойлоос Булган аймаг руу гарах А1001 авто зам дагуух байна.
Өмнөх жилүүдэд хэсэгчлэн болон урсгал засвар, шинэчлэл хийж байсан бол энэ жил 100 хувь шинэчилж буйгаараа онцлогтой. Гэрэлтүүлгүүдийн газар доорх кабель гэмтэж, ашиглалтын хугацаа дуусахын зэрэгцээ өнөөдөр мөрдөж буй гэрэлтүүлгийн стандарт шаардлагад нийцэхгүй болжээ.
Тодруулбал, гэрэлтүүлэг хоорондын зай харилцан адилгүй хол ойр, үүнээс улбаатай үзэгдэх орчин хязгаарлагдмал байна. Иймд стандартад нийцүүлж гэрэлтүүлэг хоорондын зайг 30-35метрт суурилуулж байна.
Мөн Барилгачдын талбайн уулзвараас Сүмийн уулзвар хүртэл 30 ширхэг ЛЕД дэлгэц суурилуулагдана. Гэрэлтүүлгийн шинэчлэлийн үр дүнд орчны аюулгүй байдал, ялангуяа оройн болон шөнийн цагийн хөдөлгөөн эерэг нөлөө үзүүлнэ. Түүнчлэн шинээр суурилуулж буй гэрэлтүүлэг нь хотын өнгө үзэмжийг сайжруулах, орон нутгийн онцлогийг шингээсэн хоёр төрлийн гэрэлтүүлэг юм.
Гэрэлтүүлэг суурилуулах ажлын газар шорооны ажил 95 хувьтай, шонгуудыг суурилуулах бэлтгэлээ бүрэн хангажээ. Хивсний уулзвараас Сүмтэй уулзвар хүртэлх гэрэлтүүлгийн шон суурилуулах ажил эхэлсэн байна. Гэрээний хугацаагаар ирэх аравдугаар сарын 15-нд гэрэлтүүлэг шинэчлэлийн ажил бүрэн дуусна.
Мэдээллийн төв
