Янзага зуслангийн орчин, үйл ажиллагааг сайжруулах зөвлөх үйлчилгээний тендер зарлах чиглэл өглөө
Аймгийн Засаг дарга Б.Зоригтбаяр өнөөдөр холбогдох албаныхны хамтаар хүүхдийн Янзага зусланд ажиллалаа. Янзага зуслангийн барилга, байгууламж, дэд бүтэц 50 жилийн насжилттай. 1975 онд Эрдэнэт хотын цэвэр усны хангамж барих цэргийн ангийн казармын байрны зориулалтаар баригдаж байсан барилга байгууламж юм. 1991 онд Эрдэнэт хотод шилжин ирснээс хойш тухайн үеийн Хүүхдийн төлөө төвийн дэргэд үйл ажиллагаа явуулж, 2002 оноос Янзага нэртэй хүүхдийн зуслан болсон.
2002 оноос хойш зургаан удаагийн 110 сая төгрөгийн засвар үйлчилгээг уг зусланд хийсэн байна. Удаан хугацааны турш дорвитой засвар, үйлчилгээ хийлгүй орхигдсоны улмаас зуслангийн байшин, байгууламж нэлээдгүй элэгдэлд оржээ. Тиймээс 2024 оны орон нутгийн төсөвт тусгасан 900 сая төгрөгөөр зуслангийн амралтын байр, гал тогоо, усан бассейн, гадна орчны тохижилт, тоглоомын талбайг засварлах бөгөөд засварын ажил ид өрнөж байна.
Аймгийн Засаг дарга Б.Зоригтбаяр зуслангийн үйл ажиллагааг жилийн дөрвөн улирлын турш тасралтгүй явуулдаг, гэр бүл амралт чөлөөт цагаа өнгөрүүлдэг ая тухтай, орчинтой болгохын тулд шинэчлэлийг цогцоор нь хийх шаардлагатай гэж үзэн зөвлөх үйлчилгээний тендер зарлах чиглэлийг албаныханд өглөө. Янзага зуслан 90 гаруй хүүхэд амраах хүчин чадалтай. Өнгөрсөн онд 300 гаруй хүүхдийг хүлээн авчээ.
Мэдээллийн төв
.JPG)
