2027 онд хэрэгжүүлэх авто зам, замын байгууламжийн томоохон бүтээн байгуулалтын нэг нь Кувейтийн тойргийн шинэчлэл, гүүрэн байгууламжийн ажил юм. 
 Бүтээн байгуулалтын  трассын урт 1,335 метр, 101 болон 13 метрийн урттай хоёр гүүрэн байгууламж баригдана. Гүүрэн байгууламж нь 19 метрийн өргөнтэй, хоёр урсгал, дөрвөн эгнээтэй байхаар төлөвлөгдсөн бөгөөд гүйцэтгэгчээр “Тэргүүн саруул зам” ХХК шалгарсан. 

Авто зам, гүүрэн байгууламжийн ажилтай уялдуулан Дэнж багийн хэрэглэгчдийг дулаанаар хангадаг, 1984 онд ашиглалтад орсон төв магистрал дулааны шугамыг шинэчилж, хүчин чадлыг нэмэгдүүлэх ажлыг энэ сарын 18-наас эхлүүлэхээр бэлтгэл хангаж байна. 
Одоогийн 300 мм-ийн диаметртэй хос шугамыг 400 мм болгон өргөтгөж, 2000×2500-ийн хэмжээтэй тунелийн сувагчлалтай хийнэ. 40 гаруй жилийн насжилттай дулааны шугамыг шинэчилж, орон сууц, төвлөрсөн дулаанд холбогдсон айл өрхүүд болон шинээр баригдаж буй барилга байгууламж, аж ахуйн нэгж, байгууллагуудын дулаан хангамжийн найдвартай байдлыг нэмэгдүүлэх ач холбогдолтой хөрөнгө оруулалтын ажил юм. Тунелийн сувагчлал нэвтрүүлснээр цаашид шугам сүлжээний засвар, үйлчилгээг авто замын хучилтыг эвдэхгүйгээр хийх боломж бүрдэнэ.

Энэ сарын 18-наас ирэх аравдугаар сарын 2-ныг хүртэл  тус хэсгийн авто замын хөдөлгөөнийг хязгаарлана
Энэ хугацаанд....

•   Уурхайчин аюулгүйн тойргоос 6.10-ын уулзвар хүртэлх авто зам
•    Хүлэг захаас  Кувейтийн Аюулгүйн тойрог хүртэлх авто зам
•   ББ парк хотхоноос Кувейтийн Аюулгүйн тойрог хүртэлх авто замын хөдөлгөөнийг хязгаарлаж, аймгийн Замын Цагдаагийн тасаг дээрх хугацаанд өндөржүүлсэн бэлэн  байдалд ажиллаж, хөдөлгөөний аюулгүй байдлыг хангана. 

А1001 авто замаар зорчих тээврийн хэрэгслүүд Уурхайчин тойргоор баруун гар тийш эргэж, Чандмань төв рүү нэг чигийн хөдөлгөөнөөр зорчино. 
Харин А1002 авто замаар Булган, Хөвсгөл аймаг болон баруун талаас ирэх тээврийн хэрэгслүүд 6.10, Сансар худалдааны төвийн уулзвараар зүүн гар тийш эргэж, Сүмийн уулзвараар хотын төв рүү зорчих боломжтой.

Иймд жолооч, иргэдийг дээрх хугацаанд замын хөдөлгөөний түр зохион байгуулалт болон тэмдэг, тэмдэглэгээг сайтар анхаарч, хөдөлгөөнд оролцохыг зөвлөж байна.
Кувейтийн тойргийн шинэчлэл,  гүүрэн байгууламжийн бүтээн байгуулалт ирэх оны  7 дугаар сард дуусах бөгөөд энэ онд туслах зам, гүүрийн тулгуур, инженерийн шугам сүлжээний ажил хийгдэнэ. 

Энэхүү бүтээн байгуулалтын нэг хэсэг болох Наадмын талбайн авто зогсоолоос А1001 авто замтай холбох 792 метр урт авто замын ажлыг “Тэргүүн саруул зам” ХХК гүйцэтгэж байна. Уг авто авто зам ирэх сарын 1-нд ашиглалтад орно. Ирэх онд Кувейтийн тойргийн гүүрэн  байгууламжийн бүтээн байгуулалтын ажил эхлэхээр тухайн хэсгийн авто замын хөдөлгөөнийг тодорхой хугацаанд хаах шаардлага үүснэ.

Иймд Дэнж, Эрдэнэ багийн 8 мянга орчим иргэн болон бусад зорчигчдын хөдөлгөөнийг хэвийн хангах, авто замын хүртээмжийг нэмэгдүүлэх зорилгоор Наадмын талбайн авто зогсоолоос А1001 авто замтай холбох 792 метр урт авто замыг  шинээр тавьж байна. 

Мэдээллийн төв