БНСУ-ын Дэгү Фатима эмнэлгийн эмч нар Жаргалант суманд гурван өдөр ажиллана
Орхон аймаг эрүүл мэндийн салбарын олон улсын хамтын ажиллагааг өргөжүүлэх, эрүүл мэндийн аялал жуулчлалыг хөгжүүлэх зорилтын хүрээнд Бүгд Найрамдах Солонгос Улсын эмнэлэг, эрүүл мэндийн байгууллагуудтай хамтын ажиллагаагаа өргөжүүлэн ажиллаж байна.
Энэ хүрээнд Орхон аймаг БНСУ-ын Дэгү хотын Дэгү Фатима эмнэлэгтэй энэ оны зургаадугаар сард хамтын ажиллагааны санамж бичиг байгуулсан.
Хамтын ажиллагааны эхний арга хэмжээ болгон тус эмнэлгээс 16 хүний бүрэлдэхүүнтэй эмч, эмнэлгийн мэргэжилтнүүдийн баг Жаргалант суманд энэ сарын 15-17-ны өдрүүдэд гурван өдрийн турш үнэ төлбөргүй үзлэг, шинжилгээ хийнэ.
Сайн дурын үзлэгийн үеэр хүүхэд, мэс засал, чих хамар хоолой, эмэгтэйчүүдийн чиглэлээр төрөлжсөн үзлэг, зөвлөгөө, шаардлагатай шинжилгээг хийх юм. Орхон аймаг, Дэгү Фатима эмнэлгийн хамтын ажиллагааны хүрээнд цаашид эмч, сувилагч болон эрүүл мэндийн байгууллагын ажилтнуудыг БНСУ-д сургалт, дадлага, мэргэжил дээшлүүлэх хөтөлбөрт хамруулах, харилцан туршлага солилцох, эрүүл мэндийн сайн дурын үйл ажиллагааг орон нутагт зохион байгуулах, орчин үеийн оношилгоо, эмчилгээний дэвшилтэт арга, технологийг нэвтрүүлэх чиглэлээр хамтран ажиллахаар төлөвлөж байна.
Жаргалант сумын Эрүүл мэндийн төвд зохион байгуулж буй гурван өдрийн сайн дурын үзлэг, шинжилгээ нь хоёр талын хамтын ажиллагааны анхны бодит арга хэмжээ болохын зэрэгцээ орон нутгийн иргэдэд үзүүлэх эрүүл мэндийн тусламж, үйлчилгээний хүртээмж, чанарыг сайжруулах, эмч мэргэжилтнүүдийн мэдлэг, ур чадварыг дээшлүүлэхэд чухал ач холбогдолтой юм.
Дэгү Фатима эмнэлэг нь 1956 онд байгуулагдсан, төрөлжсөн эрүүл мэндийн тусламж, үйлчилгээ үзүүлдэг бөгөөд олон улсын хамтын ажиллагаа, эмч мэргэжилтнүүдийн сургалт, туршлага солилцооны хөтөлбөрийг хэрэгжүүлж ирсэн туршлагатай эмнэлэг юм.
Мэдээллийн төв
