Улаан Үд хоттой Ах дүү хотын харилцаа, хамтын ажиллагааны санамж бичгийг шинэчлэн байгууллаа
ОХУ-ын Улаан Үд хотын эдийн засаг, соёлын өдрүүд өнөөдөр манай аймагт эхэллээ. Үйл ажиллагааны эхэнд Нутгийн удирдлагын ордны Цэвээний танхимд хоёр хотын удирдлагууд албан уулзалт хийн хамтын ажиллагааны талаар харилцан санал солилцлоо. Үүний дараа А.Амарын танхимд Орхон аймаг, Улаан Үд хотын хамтын ажиллагааны санамж бичгийг аймгийн Засаг дарга Б.Зоригтбаяр, Улаан Үд хотын дарга И.Ю Шутенков нар үзэглэлээ.
Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуульд заасан аймгийн Засаг даргын бүрэн эрх, Монгол Улс, ОХУ-ын хооронд 2019 онд байгуулсан “Найрсаг харилцаа, иж бүрэн стратегийн түншлэлийн тухай гэрээ”, Хил орчмын бүс нутгийн хамтын ажиллагааны хүрээнд байгуулсан бусад хэлцэл, санамж бичгүүдийг үндэслэн Ах дүү хотын харилцаа, хамтын ажиллагааны “Санамж бичиг”-ийг шинэчлэн байгуулав.
Санамж бичгийн зорилго нь талууд худалдаа, эдийн засаг, шинжлэх ухаан техник, нийгэм соёлын харилцаа холбоог хөгжүүлэх юм.
Энэ хүрээнд байгууллага, үйлдвэрлэгч, аж ахуйн нэгж хоорондын худалдаа, эдийн засгийн харилцааг дэмжих, хот байгуулалт, орон сууц, нийтийн аж ахуй, тээвэр, дэд бүтцийн салбарын хамтын ажиллагаа, байгаль, экологи, онцгой байдлын талаар мэдээлэл солилцоог дэмжин ажиллах, соёл, боловсрол, аялал жуулчлал, хүүхэд залуучууд, биеийн тамир спортын салбарын хамтын ажиллагааг өргөжүүлэх чиглэлээр тусгажээ.
Улаан Үд хотын дарга И.Ю Шутенков, Депутатуудын Зөвлөлийн дарга Ч.В Бальжинимаев, Монгол Улстай харилцах асуудал эрхэлсэн Буриад улсын сайд Ж.Ш. Чирипов тэргүүтэй албаныхан, бизнес эрхлэгчид, уран бүтээлчид хүрэлцэн ирээд байна. ОХУ-ын Улаан Үд хотын эдийн засаг, соёлын өдрүүд арга хэмжээ хоёр өдөр үргэлжилнэ.
Мэдээллийн төв
