Эрин зууны бахархал Эрдэнэт хотын 50 жилийн ойн баяр наадам эхэллээ. Баяр наадамд зориулсан хүндэтгэлийн  баярын хуралд Монгол Улсын Ерөнхийлөгч У.Хүрэлсүх оролцож, Эрдэнэтчүүдэд мэндчилгээ дэвшүүлэхийн зэрэгцээ Төрийн дээд шагнал хүртсэн иргэдэд шагналыг нь гардууллаа. 

Ерөнхийлөгч ирсэнтэй холбогдуулан  төрт ёсны дагуу Төрийн хүндэт харуул Амарын талбайд жагсаж, угтан авлаа.  Төрийн тэргүүн аймаг орон нутгийн удирдлагууд  Монгол Улсын Ерөнхий сайд асан Агданбуугийн Амарын хөшөөнд хүндэтгэл үзүүллээ.

 Эрдэнэт хотын түүхт 50 жилийн ойд Монгол Улсын Ерөнхийлөгч биечлэн хүрэлцэн ирж оролцсон нь Эрдэнэтчүүдийн 50 жилийн турш бүтээн байгуулсан түүх, улс орны хөгжилд дэвшилд оруулсан хувь нэмэр, үнэт зүйлсийг эрхэмлэн дээдэлж буйн тод илрэл боллоо хэмээн хуран цугласан олон онцолж байв. 

Соёл урлагийн цогцолборт болсон баярын хүндэтгэлийн хурлыг  аймгийн Засаг дарга Б.Зоригтбаяр нээж мэндчилгээ дэвшүүлэв. Тэрээр, Түүхт ойн баяр наадмыг тэмдэглэн өнгөрүүлэхэд бодлогын дэмжлэг үзүүлэхийн зэрэгцээ Орхон аймаг, Эрдэнэт хотын  ард иргэдийг хүндэтгэн хүрэлцэн ирсэн Монгол Улсын Ерөнхийлөгч Ухнаагийн Хүрэлсүхэд  нийт Эрдэнэтчүүдийнхээ нэрийн өмнөөс  талархал илэрхийлсэн юм.  

Мөн тэрээр түүхт 50 жилийн ойн баяр наадмаар Монгол Улсын Ерөнхийлөгчийн зарлигаар төрийн дээд одон медалиар шагнуулж, алдар гавьяатнуудын тоог нэмж байгаа бүх хүмүүстээ баяр хүргэж сайн сайхан бүхнийг хүсэн ерөөлөө.

Эрдэнэт хотын түүх бол зөвхөн нэгэн хотын түүх бус, Монгол Улсын аж үйлдвэржилт, эдийн засгийн үсрэнгүй хөгжил, олон улсын хамтын ажиллагааны шинэ хуудас, шинэ цагийн соёл, боловсролын гээд өөдлөн дэгжсэн бүхний түүх билээ. 

Бид өнөөдөр дараагийн хагас зууны эрчимтэй хөгжлийн шинэ гараа, шинэ зууны босгон дээр зогсож байна. Бид ойрын арван жилийн хөгжлийнхөө зүг чигийг 'Бүтээлч, Ухаалаг, Тогтвортой' байхаар тодорхойлж, эрүүл оюун ухаан цэцэглэсэн, шинжлэх ухаан, технологийн уураг тархи болсон 'Ухаалаг хот', эрчим хүчний найдвартай гал голомтоо бадрааж, ирээдүй хойчдоо цэвэр агаар бэлэглэсэн 'Эко хот' байх  зорилтуудыг дэвшүүлэн ажиллаж байна. Эрдэнэтчүүд бид тавьсан зорилтуудаа хамтын хүчээр, эвийн зангилаагаар бататгаж, инновац, технологид суурилсан, нэмүү өртөг шингэсэн үйлдвэрлэлийг хөгжүүлснээр байгальд ээлтэй, ухаалаг ногоон хотоо тэлж, өрсөлдөх чадвараараа улсдаа манлайлан, улам цэцэглэн хөгжих нь дамжиггүй” гэв. 

Тавин жилийн түүхийн хугацаанд Эрдэнэт хотоос 16 Хөдөлмөрийн баатар, 5 ардын цолтон, 180 гаруй гавьяат зүтгэлтэн, 7 төрийн шагналтан төрөн гарчээ. 

Үүний дараа Ерөнхийлөгч У.Хүрэлсүх Эрдэнэтчүүдэд хандаж мэндчилгээ дэвшүүллээ.  Монгол, Оросын ард түмний анд нөхдийн ган бат найрамдлын бэлгэ тэмдэг, хамтын ажил хөдөлмөрийн талбар болсон Эрдэнэт хот өнгөрсөн 50 жилийн хугацаанд улс орны эдийн засаг, нийгмийн хөгжилд жинтэй хувь нэмэр оруулж, боловсрол, шинжлэх ухаан, эрүүл мэнд, спорт, соёл урлаг, аж үйлдвэрийн томоохон төв болон хөгжсөөр байгааг онцолсон юм. Мөн анх 1600 орчим өрх, 7800 гаруй хүн амтай байгуулагдаж байсан Эрдэнэт хот өнөөдөр 30 мянга гаруй өрхтэй, 106 мянган суурин хүн амтай болж, аж үйлдвэрийн нийт бүтээгдэхүүн нь 4 их наяд төгрөгийг давсан байна.

Монгол Улсын баатар Эрдэнэт үйлдвэр, эрдэнэтчүүд хагас зуун жилийн хугацаанд улс орныхоо нийгэм, эдийн засгийн ачааны хүндийг үүрэлцэж, цар тахлын үед ард түмнийхээ өмнө хүлээсэн үүргээ нэр төртэй биелүүлж, цаг ямагт амжилтаа бататган ахиулж ирснийг цохон тэмдэглэж Монголын ард түмний тусгаар тогтнол, бүтээн байгуулалт, хөгжил дэвшлийн хагас зууны түүхийг хөдөлмөр бүтээл, амжилт үйлсээрээ манлайлсан Эрдэнэт хотын нийт айл өрх аз жаргалаар бялхаж, хүн бүр эрүүл энх, амжилт бүтээл дүүрэн байхын өлзийтэй ерөөлийг өргөн дэвшүүлсэн. 

Энэ үеэр  Их Эзэн Чингис хааны эш хөргийг аймгийн  Нутгийн удирдлагын ордны хойморт залахаар албан ёсоор хүлээлгэн өглөө. 

Эрин зууны бахархал Эрдэнэт хотынхоо түүхт 50 жилийн ойн босгон дээр Ерөнхийлөгчийн зарлигаар  улс орныхоо хөгжил дэвшилд үнэтэй хувь нэмэр оруулсан салбар салбарын манлайлагчид төрийн дээд цол, одон, медаль хүртээлээ.

• Соёлын гавьяат зүтгэлтэн цолоор:“Нүүдэлчин групп” компанийн зөвлөх Дарьсүрэнгийн Дэмбэрэлдорж
• Гавьяат багш цолоор: “Орхон” цогцолбор сургуулийн ахмад багш Дэнзэнгийн Норовсүрэн
• Гавьяат агрономич цолоор: Орхон аймгийн Жаргалант сумын ахмад агрономич Дамдинсүрэнгийн Цэенрэгзэн
• Хүний гавьяат эмч цолоор: Орхон аймгийн Бүсийн оношилгоо, эмчилгээний төвийн Нярайн тасгийн эрхлэгч, нярайн эмч Мажигсүрэнгийн Баттуяа,
• Үйлчилгээний гавьяат ажилтан цолоор:   Төр, захиргааны ахмад ажилтан Гун-Аажавын Даваа,
• Гавьяат механикжуулагч цолоор: “Эрдэнэт хивс” компанийн механик инженер Дашдаваагийн Батбаяр,
• Гавьяат жүжигчин цолоор:“Эрдэнэт үйлдвэр” төрийн өмчит үйлдвэрийн газрын дуу бүжгийн “Эрдэнэт” чуулгын дуучин Сампилдондовын Ариун-Эрдэнэ,
• Сүхбаатарын одонгоор: "Хүчит арслан” хязгаарлагдмал хариуцлагатай компанийн захирал, Монгол Улсын гавьяат тээвэрчин Нандийн Дарам,  Ерөнхий боловсролын “Эрдмийн сан” сургуулийн бага ангийн багш, Монгол Улсын гавьяат багш Монхоогийн Жавхлантуяа нарыг тус тус шагналаа.

Эрдэнэт хотынхоо 50 жилийн ойн босгонд дээр "Эрдэнэт үйлдвэр"-ийн хамт олон KUMO ARENA цогцолборыг ашиглалтад оруулж, баярын хүндэтгэлийн хурлаа зохион байгуулж, зарим иргэдэд шагналыг нь гардууллаа.