Эрин зууны бахархал Эрдэнэт  хотын хагас зуун жилийн бүтээн байгуулалт, хөгжил дэвшлийн түүхээр Эрдэнэтчүүд, зорин ирсэн хол ойрын зочид  гийчид  бахдаж, омогшиж наадаж байна.  Эрдэнэт хоттой ажил, амьдралаа холбосон үе үеийн бүтээн байгуулагчид, ахмад уурхайчид, залуус, хүүхэд багачууд Цэнгэлдэх хүрээлэндээ дүүрэн  цуглаж, халуун алга ташилт, уухайн түрлэгээр баяр наадмын нээлтийг мялаав. 

Цэнгэлдэх хүрээлэнг дүүргэсэн наадамчин олны баяр хөөр, уухайн түрлэг, халуун алга ташилт нь Эрдэнэт хотын эв нэгдэл, найрамдлын бэлгэ тэмдэг гэдгийг  илэрхийлж байлаа. Хагас зуун жилийн хамтын бүтээн байгуулалт, хөдөлмөрийн үр шимээр хөгжин цэцэглэсэн Эрдэнэт хотын бахархалт түүхийг энэ өдөр нэгэн тайзан дээр амилуулж, үе үеийн бүтээн байгуулагчид, өнөөгийн Эрдэнэтчүүд, ирээдүй хойч үеийг нэгтгэснээрээ  утга төгөлдөр байв. 

Цэнгэлдэхийн төв асрын хойморт Эрдэнэт хотын Хүндэт ирргэд, Анхдагч, илгээлтийн эзэд, УИХ болон Засгийн газрын гишүүд, аймаг орон нутгийн удирдлагууд, Орхон аймаг, Эрдэнэт хоттой хамтын ажиллагаатай улс, хот, олон улсын  байгууллагын төлөөллүүд морилжээ.  Аймгийн Засаг дарга Б.Зоригтбаяр баяр наадмыг нээж хэлсэн үгэндээ “Эрдэс баялаг нь ундарсан баян сайхан хангайд бууриа засаж, өрнүүн их бүтээн байгуулалтын эрч тэмүүллээр өөдлөн дэгжсэн Эрдэнэт хотын хагас зууны түүхт 50 жилийн ойн баяр наадмын мэндийг өргөн дэвшүүлье. Түүхт ойн жилд бид бүхэн улсын болон орон нутгийн төсвийн хөрөнгө оруулалтаар 181.4 тэрбум төгрөгийн төсөвт өртөгтэйгөөр 187 төсөл арга хэмжээг, Эрдэнэт үйлдвэр ТӨҮГ-ийн санхүүжилтээр 24,9 тэрбум төгрөгийн 5 төсөл арга хэмжээг, “Эрин зууны бахархал Эрдэнэт᠌” төрийн бус байгууллагын хандив 11,5 тэрбум төгрөгийн 8 төсөл арга хэмжээг хэрэгжүүлэн ажилласан байна. 

Түүхт ойг зохион байгуулахад дэмжлэг үзүүлсэн Монгол Улсын Ерөнхийлөгч Ухнаагийн Хүрэлсүх, УИХ болон Засгийн газрын гишүүд, УИХ-ын дарга Сандагийн Бямбацогт, Монгол Улсын Засгийн газрын Тэргүүн, Ерөнхий сайд Ням-Осорын Учрал, Эрдэнэт үйлдвэрийн баялаг бүтээгч уурхайчин хамт олон Та бүхэнд Орхон аймаг Эрдэнэт хотынхоо нийт ард иргэдийн нэрийн өмнөөс талархал илэрхийлье. 

Түүхт ойн бүтээн байгуулалтад 320 гаруй иргэн, аж ахуйн нэгж байгууллага 11.5 тэрбум төгрөгийн мөнгөн болон мөнгөн бус хандив өргөсөн нь түүхт ойн хамгийн үнэ цэнтэй оролцоо байлаа. Нийт хандивлагч нартаа баярлалаа.  Өнгөрсөн тавин жил бол хөдөлмөрийн түүх байлаа. Өнөөдөр бол бахархлын өдөр. Харин ирэх тавин жил бол бидний хамтдаа бүтээх хөгжлийн шинэ үе байх болно. Монгол төрийн мэргэн бодлогын биелэл, эв нэгдэл, найрамдлын бэлгэдэл, эх орны дөрвөн зүг-найман зовхисоос ирсэн эрдэнэт хүмүүсийн нэгдэл болсон Эрдэнэт хотын түүхт 50 жилийн ойн баярын гал халуун мэндийг дахин хүргэе” гэсэн юм. 

 Баяр наадмын нээлтийн зөвлөх найруулагчаар Урлагийн гавьяат зүтгэлтэн Д.Баярбаатар, Ерөнхий найруулагчаар Б.Лхагвасүрэн /Сүнс хамтлаг/ ажилласан.  
Тэд “Хот үүссэн түүх”, “Бүтээн байгуулалт”, “Эвтэй найрсаг Эрдэнэтчүүд”, “Шинэ цагийн Эрдэнэт” агуулгаар байгаль эхийн хишиг, Эрдэнэтийн овооны гүнд нуугдсэн баялаг, хүний хөдөлмөр, бүтээн байгуулалт, хөдөлмөрийн үнэ цэн, найрамдал, эв нэгдлийн хүчээр Эрдэнэт хот хөгжил дэвшлийн замд хэрхэн хөл тавьсан түүхийг гурван цаг үеэр уран сайхнаар, яруу тунгалгаар өгүүллээ. 

Нээлтэд Ардын жүчигчин Т.Ариунаа Хөх Монголын үр сад,  МУГЖ Ө.МУГЖ  90 хүүхдийн найрал дуутай  Хүүхдүүд дуулж байна, Guys, Freezone, Takeoff, Нэгэн зүгт, S4, Сүнс хамтлаг Нарлаг монгол орон, Лхагвасүрэн (Харанга), Outlaw Толин хул зэрэг  уран бүтээчид дуугаар ая дуугаа өргөж, наадамчин олны сонорыг мялаав. 

Эрдэнэт хотын 50 жилийн ойн баяр наадам нь зөвхөн нэгэн ойг тэмдэглэсэн арга хэмжээ бус, бүтээн байгуулалт, хөдөлмөрч зон олны бахархал, эв нэгдлийг илэрхийлсэн нь наадамчин олонд  мартагдашгүй дурсамж үлдээсэн биз ээ. 

1960-аад оны дундуур Монгол-Чехословакийн эрдэнэсийн эрэлчид анх өрмийн дуу хадаасан онгон зэлүүд энэ нутагт их бүтээн байгуулалтын оргилсон эрчим буцалж, 1975 оны 12 дугаар сарын 11-ний өдөр Эрдэнэт хотыг байгуулах түүхэн шийдвэр гарсан юм. Ийнхүү 1976 оны 1 дүгээр сарын 1-ний өдрөөс найрамдлын өлгий Эрдэнэт хот мэндэлсэн түүхтэй.
Эх орны дөрвөн зүг, найман зовхисоос 6000 гаруй Ардын армийн барилгачин дайчид, илгээлтийн эзэд төр нийгмийн байгууллагын ажилтан, инженерүүд, ЗХУ-ын бүрэлдэхүүнд байсан 15 Бүгд найрамдах улсын 172 хотоос ирсэн 43 үндэстэн ястныг төлөөлсөн 15 мянга гаруй, инженер, мэргэжилтнүүд, барилгачид, их бүтээн байгуулалтын уриагаар тал талаас цуглан, Эрдэнэтийг гар, сэтгэл нийлэн бүтээн босгосон юм. 

Харин үүнээс цааших дараагийн тавин жилийн түүхийг Эрдэнэт хотын хойч ирээдүй болсон үр хүүхдүүд, өнөөгийн хөдөлмөрч Эрдэнэтчүүд хамтдаа бичих болно. 

Мэдээллийн төв