Ногоон, хүртээмжтэй хотууд төслийн нээлт боллоо
Даян дэлхийн байгаль орчны сангийн санхүүжилтээр Эрдэнэт, Дархан, Улаанбаатар хотод 5 жилийн хугацаанд “Ногоон, хүртээмжтэй хотууд төсөл” хэрэгжинэ. Төслийн баримт бичгийг энэ оны 6 дугаар сард боловсруулж дууссан бөгөөд боловсруулалтын шатны хэд хэдэн удаагийн уулзалтыг талууд Орхон аймаг, Эрдэнэт хотод зохион байгуулсан билээ.
Өнөөдөр НҮБ-ын Хөгжлийн хөтөлбөрийн Монгол дахь суурин төлөөлөгч Лионел Лорон нарын албаны хүмүүс Орхон аймагт ажиллаж, төслийг албан ёсоор эхлүүллээ.
Төслийн зорилго нь:
- хот төлөвлөлт, газар ашиглалтад байгаль орчны болон уур амьсгалын асуудлыг тусгах;
- байгальд суурилсан шийдлийг нэвтрүүлэх;
- хог хаягдал, усны менежментэд эргэлтийн эдийн засгийн зарчмыг хэрэгжүүлэх;
- барилгын эрчим хүчний үр ашгийг дээшлүүлэх;
- тогтвортой тээврийн шийдлийг хөгжүүлэх;
- ногоон хөрөнгө оруулалт, санхүүжилтийн шинэ механизм бий болгоход дэмжлэг үзүүлэхэд чиглэж байна.
Байгаль орчинд тулгамдсан асуудлыг ганцхан шийдвэрлэх бус иргэдийн амьдрах орчны чанарыг сайжруулсан, уур амьсгалын өөрчлөлтөд тэсвэртэй, хүртээмжтэй хотын хөгжлийг дэмжхэд чиглэж буй.
Орхон аймаг энэхүү төсөлд 5 сая ам.долларын хамтын санхүүжилт оруулж, хог хаягдал, нийтийн тээвэр, ногоон байгууламж, ус, хүнсний аюулгүй байдал, санхүүгийн удирдлага зэрэг 9 бодлогын чиглэлд тодорхой арга хэмжээнүүдийг төслийн үр дүнтэй уялдуулан хэрэгжүүлэх юм.
Тодруулбал, энэхүү төслийг хотын хөгжлийн бодлоготой уялдуулж, хог хаягдлын менежментийг сайжруулах, ногоон байгууламжийг нэмэгдүүлэх, орчны бохирдлыг бууруулах, эрчим хүчний хэмнэлттэй шийдлийг дэмжих, иргэдэд илүү хүртээмжтэй орчин бүрдүүлэх зэрэг чиглэлээр бодит үр дүн гарна гэсэн хүлээлт байна. Төслийг Байгаль орчин, уур амьсгалын өөрчлөлтийн яамтай хамтран хэрэгжүүлнэ.
Нэгдсэн Үндэстний Байгууллагын Хөгжлийн хөтөлбөр (НҮБХХ) нь дэлхийн 170 улс, нутаг дэвсгэрт үйл ажиллагаа явуулж, ядуурлыг бууруулах, тэгш хүртээмжтэй хөгжил, уур амьсгалын өөрчлөлт, байгаль орчны тогтвортой байдал зэрэг чиглэлээр улс орнуудад дэмжлэг үзүүлэн ажилладаг НҮБ-ын хөгжлийн байгууллага юм.
Мэдээллийн төв
