Эрдэнэт хотын 50 жилийн түүхийг 5 бүтээлд мөнхөллөө
Эрин зууны бахархал Эрдэнэт хотын 50 жилийн ой энэ өдрүүдэд тохиож байна. Эрдэнэт хотын өнгөрсөн 50 жилийн түүхийг мөнхөлж, ирэх 50 жилийн хөгжлийн эхлэлийг бэлгэдсэн 5 бүтээлийг Эрдэнэтчүүддээ өргөн барилаа. Үүнд “Эрин зууны бахархал Эрдэнэт-50” хоёр боть ном, баримтат кино, “Эрин зууны бахархал Эрдэнэт” уран зургийн үзэсгэлэн, “Төв цэг” уран бүтээл, “Эрдэнэтийн овоо” пянз зэрэг соёл, урлагийн өв болсон бүтээлээр Эрдэнэтийн 50 жилийн түүхээ мөнхөллөө.
Хагас зууны турш Эрдэнэтчүүд баялаг түүх, бялхам их амжилт, уудлаад баршгүй их дурсамжийн эзэд болцгоожээ. Энэ бүхнээсээ сорчлон, тоймлон ном, баримтат кино, уран зураг, пянз, уран дүрслэл, урлан бүтээлд шингээн үлдээхийг зорьлоо. “Эрин зууны бахархал-50” хоёр боть ном, баримтат киноноос Эрдэнэтчүүдийн оюун бодол, сэтгэл, итгэл, хөлс хөдөлмөр, залуу насны эрч хүч, инээд, хөөр,бүтээн босгосон бүхнийг уншиж, сонсож, харах боломжтой.
Монголын урчуудын эвлэлийн харьяа Орхон аймаг дахь салбарын уран бүтээлчдийн ойдоо зориулж туурвисан 1.5 метрийн өргөн, 5 метрийн урттай “Эрин зууны бахархал Эрдэнэт” бүтээлийг монгол зургийн аргаар бүтээжээ. Эл бүтээлд Эрдэнэт хотын 50 жилийн түүх, бүтээн байгуулалтыг шингээн урласан.
Мөн “Цэцгийн өнгөт хот”, “Эрдэнэтийн овоо”, “Гэрэл цацарсан Эрдэнэт” зэрэг Эрдэнэт хотоо магтан дуулсан 12 дууг Монголын урлагийн сор болсон уран бүтээлчид дуулж, “Эрдэнэтийн овоо” дурсгалт пянз, Эрдэнэтчүүдийн эв нэгдэл, тасралтгүй үргэлжлэх ирээдүйг бэлгэдсэн 'Төв цэг' металл урлалын бүтээлийг төв талбайдаа байршууллаа.
Аймгийн Засаг дарга Б.Зоригтбаяр “Түүхт ойд зориулж эрин зуунаар мөнхрөн үлдэх эдгээр бүтээлийг бичсэн, туурвисан, урласан, бүтээсэн, дуулсан, хөгжимдсөн, зураг авсан, архивт суусан гээд бүх хүмүүст чин сэтгэлийн талархал илэрхийллээ. Мөн тэрээр, хотын нүдэнд харагдах бүхэн хэзээ нэг өдөр элэгдэж, хуучирдаг. Оюуны бүтээлч хөдөлмөрөөр бүтсэн эдгээр уран бүтээлийн үг үсэг, зураг, дүрслэл, эгшиг аялгуу бүхэн цаг хугацаа өнгөрөх тусам тодорч, ирээдүй хойч үеийнхэнд түүх хүүрнэж өгөх нь лавтай.
Эрдэнэтийн дараагийн 50 жил, дахин зуу зуун жилийн ой тэмдэглэхэд хамгийн үнэ цэнтэй болох мөнхийн бүтээлүүдийг бид хамтдаа баринтаглаж, бүтээж чадлаа” хэмээлээ.
Мэдээллийн төв
