Өнөөдөр болсон Засаг даргын шуурхай хуралдааны онцлох мэдээллүүдийг хүргэж байна

Аймгийн Засаг даргын шуурхай зөвлөгөөн хуралдаж хуралдааныг Засаг дарга С.Батжаргал удирдан явууллаа. Шуурхай зөвлөгөөний үеэр танилцуулагдсан зарим онцлох мэдээллийг хүргэж байна.
1.   Өнгөрсөн долоо хоногт хотын захирагчийн албанаас орон сууцны цахилгаан шат ашиглалтын талаар “Эрдэнэт Ус” ДТС ОНӨХК, СӨХ-той уулзалт хийж санал солилцлоо. Орон сууцны барилгуудын цахилгаан шатны дийлэнх нь ашиглалтын шаардлага хангахгүй болсон тул аюулгүй ажиллагаа талаасаа мэргэжлийн байгууллагад хариуцуулах саналыг ХЗА-аас Засаг даргын зөвлөлийн хуралд хэлэлцүүлэхээр бэлтгэж байна.
2.   Хуримтлагдсан цас, гол мөрөн, нуур, гуу, жалга, суваг, шуудуу, гол мөрний цас хайлж, хөрсний ус, булаг гарч, халиа дошин үүсэх, шар усны үер гарах эрсдэлтэй байгаа талаар сэрэмжлүүлэг мэдээллийг хүргэв.
3.   Эрүүл мэндийн эрт илрүүлэг, урьдчилан сэргийлэх үзлэгт хамрагдах аймгийн нийт иргэдийн 30 хувь нь хамрагдсан талаар эрүүл мэндийн газрын дарга Д.Сүхээ мэдээллээ. Залуусын идэвх сул, тоног төхөөрөмжийн эвдрэл гэмтэл зэрэг шалтгаануудаас үүдэлтэйгээр удаашралтай байгаа тул яаралтай арга хэмжээ авч хамрагдалтыг нэмэгдүүлэх үүргийг Засаг дарга өглөө.
4.   Орон сууцны подвальд ус алдаж уур цан болоод байгаа асуудлыг СӨХ болон “Эрдэнэт Ус” ДТС ОНӨХК хамтран яаралтай шийдвэрлэх хэрэгтэй. Энэ нь барилгын чанар болоод иргэдийн эрүүл мэндэд сөргөөр нөлөөлөх эрсдэлтэй талаар аймгийн Засаг даргын зүгээс анхаарууллаа.
5.   Ашиглагдахгүй болсон төрийн өмчийн зарим байрнуудад өрхийн үйлдвэрлэл эрхлэгчдийг оруулж ажиллах орчин нөхцлөөр хангалаа. Тодруулбал: Өнгөрсөн онд Баян-Өндөр сумын Их залуу, Эрдэнэ багуудад улсын төсвийн хөрөнгө оруулалтаар багийн нэгдсэн төв ашиглалтад орсон. Ингэснээр тус багуудад өрхийн эмнэлгийн болон хуучин багийн байрнууд суларсан юм. Тэгвэл үүнийг өрхийн үйлдвэрлэл эрхлэгчдэд 20 гаруй иргэнд хүлээлгэн өгөв.
6.   Дулааны улирал эхэлж байгаатай холбоотойгоор үерийн далан суваг шуудуу цэвэрлэх, шар усны үерээс урьдчилан сэргийлэх арга хэмжээ авах, нөөцийн махны худалдаа зохион байгуулах бэлтгэл хангах, хөрөнгө оруулалтын ажлуудын зураг төсвийн ажлуудыг яаралтай дуусгах зэрэг үүрэг даалгаврыг аймгийн Засаг даргаас холбогдох байгууллагуудад өглөө.

Мэдээллийн төв