“Би Монгол тамирчин” бүх ард түмний спортын наадмын сүлд дуу эгшиглэлээ
Орхон аймаг Эрдэнэт хотод зохион байгуулагдаж буй Монголын бүх ард түмний спортын өвлийн XVI наадамд зориулан зохиосон “Би Монгол тамирчин” сүлд дуу наадмын нээлтийн үеэр эгшиглэлээ.
Анхны сонсогчид нь өвлийн спортын наадамд оролцогч баг тамирчид, багш дасгалжуулагчид, хөгжөөн дэмжигчид болж байна.
Уг дууны үгийг Монгол Улсын Урлагийн Гавьяат зүтгэлтэн Д.Дашдондов, аяыг Н.Эрдэнэбаатар зохиож “Эрдэнэт” дуу бүжгийн чуулгын залуу дуучин МУСТА Б. Нямдэлгэр, Б. Ариунаа нар дуулж олны хүртээл болголоо.
“Би Монгол тамирчин” дууг цаашид Монголын бүх ард түмний спортын өвлийн наадмын сүлд дуугаар өргөмжилж буйг Биеийн тамир спортын Улсын хорооноос мэдэгдлээ.
Орон нутагт зохион байгуулагдаж буй Монголын бүх ард түмний спортын өвлийн XVI наадам, Монголын хүүхдийн спортын өвлийн VII наадмыг зохион байгуулагч Орхон аймаг ихээхэн ач холбогдол өгч байгаа бөгөөд түүний нэг нь энэхүү наадамд зориулан зохиосон сүлд дуу гэдгийг зохион байгуулах хорооны дарга аймгийн Засаг даргын орлогч А.Түвшинжаргал онцоллоо.
“Би Монгол тамирчин”
Цасан дээр, мөсөн дээр
Цаглашгүй хурдтай уралдаад
Цантай сормуус ирмэх зуур
Цахилаад одох хүслийн жигүүртэй
Жаварт ажраагүй өлчир тамирчин би
Жавхаа хийморьтой монгол тамирчин би
Итгэл дээр, сэтгэл дээр
Эгшиний эгшинтэй өрсөлдөөд
Эх орныхоо алдрын төлөө
Илүүрхэх учиртай, ялахын золбоотой Халирч шантрахгүй галтай тамирчин би
Хатуужил тэсвэртэй монгол тамирчин би
Ядрөх ч бай, зүдрэх ч бай
Ялалтын төлөө урагшаа
Цуутай дээдсийн алтан захиасыг
Цусандаа огшоосон тэнгэрлэг заяатай
Алдах эрхгүй сүлдтэй тамирчин би
Андгай өргөсөн монгол тамирчин би
