Монгол Улсад ногоон бүсийн 68 зуслан байдгаас 30 орчим нь төрийн өмчийн хүүхдийн зуслан. Орхон аймгийн төрийн өмчийн ганц зуслан байдаг  нь Хүүхэд, гэр бүл, хөгжил хамгааллын газрын дэргэдэх Янзага зуслан юм. 
Булган аймгийн Хангал сумын нутаг Буурлын ар, нутгийн иргэдийн шүтдэг Эргэл хайрхны өвөрт нарс модон дунд байрлах Янзага хүүхдийн зуслангийн  түүх 1975 оноос эхтэй. 
Тухайн үед Эрдэнэт хотын цэвэр усны хангамж 4 подемыг байгуулахаар ажиллаж байсан орос цэргийн ангийн  амралтын байрны зориулалтаар баригдаж байжээ. 1991 онд Монгол талд буюу Эрдэнэт хотын Үйлдвэрчний эвлэлийн төв зөвлөлд, тухайн оныхоо арваннэгдүгээр сард аймгийн Хүүхдийн төлөө төв буюу хуучнаар Пионерын байгууллагад хүлээлгэн өгч байсан гэдэг. 

2002 оноос хүүхдийн Янзага зуслан нэртэйгээр үйл ажиллагаа явуулж байна.  Монгол Улсад хүүхдийн хөдөлгөөн, хүүхдийн байгууллага үүсэж хөгжсөний 100 жилийн ой энэ онд тохиож буй.  Ойг угтан Янзага зусланд иж бүрэн их засвар хийн  өнгө, “амь”  орж буйд зуслангийн багш ажилчид, хүүхэд багачууд ерөөс хүн бүхэн баяр, хөөртэй  байна. 
Их засварын ажлыг “Мээжин хишиг” ХХК гүйцэтгэж, дуусгалаа. 

20 гаруй жилийн түүхэнд 6 удаагийн 110 сая төгрөгийн засвар орсон байдаг. Энэ жил 900 гаруй сая төгрөгөөр зуслангийн амрах байр, гал тогоо, захиргааны байр, хуучны Улаан булан буюу кино театр, гадна соёл урлаг, спортын арга хэмжээний талбай гээд гадна, доторгүй их засвар хийж, өөд  татав.

 Гал тогооны иж бүрэн засвар, үүнд хүнсний агуулах, талх нарийн боовны цех, хоолны заал бүгд багтжээ. Эмнэлгийн хэсгийн   тусгаарлах болон үзлэгийн өрөө, эмчийн өрөөг цогцоор нь, захиргааны  байрны 78 өрөө, хүүхэд хүлээн авах 10 байшин, эмэгтэй, эрэгтэй  боловсон 00, угаалтуур гээд бүгдийг нь засаж, шинэчлэв.  

Мөн хамгийн бэрхшээлтэй, хүндрэлтэй байсан  улаан булан буюу кино театраа засварлаж, янзын сайхан болжээ.  Энэ мэт  гурван сар үргэлжилсэн их засварын ажил сая нэг юм дуусаж, энэ сарын 26-наас хамгийн эхний амрагчдаа хүлээн авах бэлтгэлээ хангаж байна. 

Хамгийн эхний амрагчид нь Монголын скаутын холбоо, Баянгол дүүргийн скаутын холбооны  скаут хүүхдүүдийн майхан цугларалтыг ирэх сарын 1-н хүртэл зохион  байгуулахаар хүн бүр дор бүрнээ ажиллаж буй нь энэ. Энэхүү арга хэмжээнд оролцох сонирхолтой хүүхдүүдийг аймгийн Хүүхэд, гэр бүл, хөгжил хамгааллын газар бүртгэж байна. 

Их засвар хийгээд зуслангаа орхихгүй, олон улсын зуслангийн жишигт нийцүүлэх зорилт бий. Жилийн дөрвөн улирлын турш үйл ажиллагаагаа явуулдаг хүүхэд, гэр бүл, амардаг орчныг  бүрдүүлдэг болох нь Янзага зуслангийн хэтийн зорилт. Аймгийн Засаг дарга, Хүүхдийн зөвлөлийн тэргүүн Б.Зоригтбаяр өнгөрсөн гуравдугаар сарын 28-нд зуслангийн их засварын ажлын явцтай танилцсан. Энэ үеэр дээрх асуудлыг шийдэх зөвлөх үйлчилгээний тендер зарлах чиглэлийг холбогдох албаныханд өгсөн билээ. 

Янзага зусланд онцлог, өвөрмөц зүйл бишгүй их

Монгол Улсад усан бассейнтэй хүүхдийн зуслан гурав байдгийн нэг нь Янзага. Ирэх жилүүдэд бассейнээ  орчин үеийн стандартад нийцүүлэх зорилт бодит болох нь дамжиггүй биз ээ. 
Янзага зуслангийн багш нарын ур чадвар, багш нараа бэлтгэдэг байдал нь  Монголын зуслангуудын холбооны төвшинд жишиг болон яригдах болжээ.   Энэ талаар Хүүхэд, гэр бүл, хөгжил хамгааллын газрын Хүүхдийн хөгжил, оролцоо хариуцсан мэргэжилтэн  М.Батжаргал “Зуслан бүр өөрийн гэсэн сүлжээ төлөвлөгөөтэй. Сүлжээ төлөвлөгөө гэдэг нь хүүхдийг тээвэрлэж ирэхээс эхлээд гэртээ харих хүртэл нь 7 хоногийн хугацаанд зохион байгуулах үйл ажиллагааг хэлдэг. Янзага зуслангийн багш нар хүүхдийн оролцоо, өөрийн удирдлагын байгууллагаар ажилласан, энэ чиглэлээрээ мэргэшсэн мэргэжлийн хүмүүс байдаг. Эдгээр багш нар хүүхдүүдтэй харилцаж сурсан, Эрдэнэт хотынхоо хүүхдүүдийн зан чанар, онцлогийг мэддэг нь  хамгийн том давуу тал” гэв. 

Мөн тэрээр, зуслангийн хүүхэд хамгааллын бодлогын хүрээнд хүүхдийн аюулгүй  байдлыг хангана.  Зусланг ганцхан хүүхдийн амралтын газар гэж харж болохгүй. Хүүхдийн болон гэр бүлийн орчин гэж харах нь зүйтэй юм. Тэр ч утгаараа цаашид энэ чиглэл рүү менежментээ төлөвлөнө. Ирэх жилүүдэд Янзага зуслан маань илүү сайхан болно” гэж байна. 

Их засвар хийгээд гадна, дотор орчноо сайжрууллаа.  Гэсэн ч хоолны ширээ сандал, зөөлөн эдлэлээс эхлээд  шинэчлэх сайжруулах шаардлагатай юм нэгээр дуусахгүй нь лавтай. Тиймээс 100 жилийн ойн хүрээнд эсвэл Татварын тухай хуульд зааснаар ААН-ийн орлогын албан татварын 1 хувийг нийгмийн хариуцлагын хүрээнд зарцуулах боломжтой.. хуулийн заалтын хүрээнд  хүүхдийн зусланд дэмжлэг үзүүлж, хамтран ажиллахыг ААНБ, иргэдээс Хүүхэд, гэр бүл хөгжил хамгааллын газрын  хамт олон уриалж байна. 

Их засвар хийснээр Янзага зусланд  хүүхэд хөгжлийн гурван орчин бүрджээ. Спорт, соёл урлагийн арга хэмжээ явуулах  гадаа задгай талбай, хүүхэд хөгжлийн үйл ажиллагааг зохион байгуулах Улаан булан буюу театр, бүлгийн ярилцлага сургалт зохион байгуулах танхим  байна. 

2024 оны зун 400  орчим хүүхэд хүлээн авч байсан Янзага зуслан энэ зун 1500 хүүхдийн хөл, инээд хөөрт дарагдах нь ээ.

Мэдээллийн төв