Тусгай шалгалт зохион байгууллаа

2026 оны эхний төрийн захиргааны тусгай шалгалтыг энэ сарын 3-ны өдөр зохион байгууллаа. Төрийн албаны гүйцэтгэх албан тушаалын сул орон тоог нөхөх зарыг Төрийн албаны зөвлөлийн цахим хуудаст 2026 оны 01 дүгээр сарын 16-ны өдрөөс 01 дүгээр сарын 29 хүртэл ажлын 10 хоног байршуулан нийтэд мэдээлсэн. Мөн Эрдэнэт.мн болон тухайн төрийн байгууллагуудын цахим хуудсанд байрлуулж нийтэд зарласан.

Аймгийн ЗДТГ-ын Төрийн сангийн мэргэжилтэн, Эрүүл мэндийн газрын Амьсгалын зам, сүрьеэгийн халдварт өвчний тандалт сэргийлэлт хариуцсан мэргэжилтэн, Эх барих эмэгтэйчүүдийн тусламж үйлчилгээ хариуцсан мэргэжилтний албан тушаалын сул орон тоог нөхөх, сул орон тоонд шалгалт өгөх хүсэлтэй иргэдийн баримтыг Төрийн албаны Зөвлөлөөс үүсгэсэн hh-admon.csc.gov.mn цахим шуудангийн хаягаар өнгөрсөн сарын 16-29-ний хооронд хүлээн авсан. Үүгээр 18 оролцогчийн материалыг хүлээн авсан. Тусгай шалгалт зохион байгуулах комиссын хурлын шийдвэрээр баримт бичгийн бүрдэл хангасан 4 оролцогчийг тусгай шалгалтад бүртгэхээр шийдвэрлэсэн.
Үүний дагуу аймгийн Засаг даргын Тамгын газрын Төрийн сангийн мэргэжилтний албан тушаалын сул орон тоонд тусгай шалгалт зохион байгууллаа.

Мөн 2026 оны эхний улирлын Ерөнхий шалгалтын энэ сарын 2-нд эхэлсэн. Бүртгэл 17-ныг хүртэл үргэлжлэх бөгөөд төрийн албаны ерөнхий шалгалт өгөх хүсэлтэй иргэдийг идэвхтэй оролцохыг урьж байна.