Аймгийн ИТХ-ын ээлжит 6-р хуралдаан боллоо. Хуралдаанаар “Аймгийн Засаг даргын 2024-2028 оны үйл ажиллагааны хөтөлбөрийн 2025 оны хэрэгжилтийн тухай” асуудлыг танилцуулж,   “Аймгийн хөгжлийн 2025 оны төлөвлөгөөний хэрэгжилтийн тухай”,   “Орхон аймгийг 2021-2025 онд хөгжүүлэх таван жилийн үндсэн чиглэлийн хэрэгжилт”-ийн тухай асуудлыг  хэлэлцүүллээ. 

Дээрх бодлогын баримт бичгүүдийн хэрэгжилтийн үр дүнг үнэлэхдээ Засгийн газрын 2025 оны 43 дугаар тогтоолоор батлагдсан “Бодлогын баримт бичгийн хэрэгжилтэд хяналт-шинжилгээ хийх” журамд заасан аргачлалын дагуу үнэлгээ хийжээ. 

“Аймгийн Засаг даргын 2024-2028 оны үйл ажиллагааны хөтөлбөрийн 2025 оны хэрэгжилтийн тайланг Засаг дарга Б.Зоригтбаяр танилцууллаа.  

Мэдээллийг тоймлон хүргэе. 

Аймгийн Засаг даргын 2024-2028 оны үйл ажиллагааны хөтөлбөрийг “Эрдэнэт-хүний хөгжил” уриатай боловсруулж, аймгийн ИТХ-ын 2024 оны 12 дугаар сарын 31-ний өдрийн 03/15 дугаар тогтоолоор батлуулсан. Хөтөлбөрийг хэрэгжүүлэх арга хэмжээний төлөвлөгөөг 4 бүлэг, 111 үйл ажиллагааны хүрээнд 249 арга хэмжээг хэрэгжүүлэхээр тусгасан.  

2025 оны жилийн эцсийн байдлаар тус төлөвлөгөөнд тусгагдсан 21 арга хэмжээний хэрэгжилтийг тооцох хугацаа болоогүй, хэрэгжилтийг тооцох боломжтой 228 арга хэмжээний хэрэгжилтийн дундаж 91.8 хувьтай, хөтөлбөрийн үр дүнгийн  хяналт-шинжилгээ, үнэлгээний  163 шалгуур үзүүлэлтийн дундаж 92.7 хувьтай гэж үнэлэгджээ. 

2025 онд аймгийн Засаг дарга  сайд нартай хамтран ажиллах гэрээг байгуулан хэрэгжилтийг ханган ажилласан.  Өнөөдрийн  байдлаар 9 сайдын гэрээний хэрэгжилт 80.7-98.5 хувьтай үнэлэгдээд байна. Дөрвөн сайдтай байгуулсан  гэрээний хэрэгжилт улсын хэмжээнд эхний 3 байрыг эзэлж, салбарын хэмжээнд үйл ажиллагаагаараа  тэргүүлжээ.   

Энэ нь  Хурлын дарга, төлөөлөгчид та бүхэн аймгийн Засаг даргын үйл ажиллагааг дэмжин холбогдох бодлогын шийдвэрүүдийг гаргаж, төрийн албан хаагчин маанд манлайлан   ажилласны үр дүн гэдгийг аймгийн Засаг дарга Б.Зоригтбаяр танилцуулгадаа онцоллоо.  

Тухайлбал, 2025 онд  орон нутгийн төсвийн 29.1 тэрбум төгрөгийн хөрөнгө оруулалтаар 33 байршилд...

• 8.1км урт дулааны сувагт 3-5 хос шугам,
• бохир усны 590м
•  цэвэр усны 8.6км,
• холбооны 1.0км урт шугам шинэчилж,
• 5Ус дулаан дамжуулах төвийн  тоноглолыг шинэчилж үл хамаарах схемтэй ялтсан бойлерыг суурилуулж ухаалаг нэгдсэн удирдлагын системд холбосон. 

  Болзошгүй аваарын зардлын 9.1 тэрбум төгрөгийн хөрөнгө оруулалтаар...

• инженерийн шугам сүлжээний 49 нэр төрлийн ажлыг гүйцэтгэж 7.4км урт дулааны  шугам,
• 2.7 км цэвэр усны шугам,
• 4 УДДТ-ийн ялтсан бойлер өргөтгөж,
• орон сууцны хорооллын 16 байрны подвалын инженерийн шугам сүлжээг  шинэчилсэн. 

 Эдгээр хөрөнгө оруулалтын ажлын үр дүнд орон сууцны хорооллын 5824 өрхийг хангаж буй инженерийн шугам сүлжээний нэвтрүүлэх чадвар сайжраад байна. 

2025 онд 43 байршилд авто замын  засвар шинэчлэлтийн ажил хийгдэж байгаагаас орон нутгийн төсвийн12.7 тэрбум төгрөгийн хөрөнгө оруулалтаар 4.9 км авто замыг шинээр, 27.7 тэрбум төгрөгийн хөрөнгө оруулалтаар 18.6 км авто замд их засвар шинэчлэлтийн ажил ашиглалтад оруулсан.

Үүний дараа төлөөлөгчөөс гарсан саналын дагуу аймгийн хөгжлийн 2025 оны төлөвлөгөөний хэрэгжилт, Орхон аймгийг 2021-2025 онд хөгжүүлэх таван жилийн үндсэн чиглэлийн хэрэгжилтийг хамтатган хэлэлцэв. 

Найман  бүлгийн хүрээнд 164 үйл ажиллагааг хэрэгжүүлэн, 117 шалгуур үзүүлэлтийг хангахаар төлөвлөж, 2025 оны гүйцэтгэлээр үйл ажиллагаа 95.6 хувьтай, шалгуур үзүүлэлт 87.3 хувьтай биелэсэн байна. 

Өнгөрсөн 5 жилд Боловсролын салбарт....

•    1 дүгээр сургуулийн өргөтгөл 
•  "Ирээдүйн одод" сургуулийн спорт заалны өргөтгөл 
•  “Уран эгшиг” сургуулийн өргөтгөл 
•   8 дугаар сургуулийн өргөтгөл 
•   Политехник коллежийн өргөтгөлийн барилгыг ашиглалтад оруулж сургуулийн хүүхдийн суудлын тоог 1568 -аар нэмэгдүүлсэн бол, 
•    4-р цэцэрлэгийн өргөтгөл 
•    11-р цэцэрлэгийн өргөтгөл 
•   18-р цэцэрлэгийн өргөтгөл 
•   27 дугаар цэцэрлэг 
•   28 дугаар цэцэрлэг 
•    Чандмань багийн 150 хүүхдийн цэцэрлэгийн барилгыг ашиглалтад оруулж цэцэрлэгийн хүүхдийн суудлыг 900-аар нэмэгдүүлжээ. 

Эрүүл мэндийн салбарын хувьд Бүсийн оношилгоо эмчилгээний төвд 2.8 тэрбум төгрөгийн тоног төхөөрөмж худалдан авснаар тоног төхөөрөмжийн хангалтыг 96 хувьд хүргэж,  4.3 тэрбум төгрөгийн барилга, их засварын ажлыг хийж орчин нөхцөлийг сайжруулаад байна. 

Мөн  нэг  өрхийн эрүүл мэндийн төвийг шинээр ашиглалтад, 2 өрхийн эрүүл мэндийн төвийг Төрийн үйлчилгээний нэгдсэн байранд оруулж орчин нөхцөлийг нь сайжрууллаа. 
Түүнчлэн Өрхийн эрүүл мэндийн төвүүдэд 4.3 тэрбум төгрөгийн их засварын ажил хийн, 1.5 тэрбум төгрөгийн тоног төхөөрөмжөөр хангасан байна. 
Өнгөрсөн жилүүдэд Эрүүл мэндийн салбарын хувьд хийгдсэн нэг онцлох ажил нь “Эрдэнэт медикал” төрөлжсөн мэргэшлийн эмнэлгийг байгуулж, “Хавдрын хойд бүсийн оношилгоо эмчилгээний дэд төв” болгон өөрчилсөн явдал юм. 

Түүчлэн, улсын хэмжээнд бие даасан анхны “Залуучуудын ордон” –той болж залуучуудын хөгжил, оролцоог нэмэгдүүлэх олон талт арга хэмжээг зохион байгуулж, залуучууд болон иргэдэд нээлттэй тогтмол үйл ажиллагаа явуулж байна. 

Аймгийн Засаг дарга Б.Зоригтбаяр  төлөөлөгчдийн гаргасан санал, шүүмжтэй холбогдуулан “Өнгөрсөн жилүүдэд хийгдсэн хөрөнгө оруулалтууд тухайн салбар бүртээ үр дүнгээ өгсөн” гэдгийг онцолсон. 

Сүүлийн жилүүдэд дэд бүтцийн чиглэлийн ажлууд хөрөнгө оруулалтын голлох хувийг эзэлж буй. Өнгөрсөн 5 жилийн хугацаанд  нийт 24.8 км хатуу хучилттай авто замыг шинээр ашиглалтад оруулжээ. Мөн 41.9 км авто замд их засвар шинэчлэлтийн ажил, 2 байршилд авто замын уулзварын өргөтгөл шинэчлэлт, 6 байршилд 400 гаруй авто машины зогсоол, 13.6 км дугуйн зам, 80604 м2 явган хүний замыг ашиглалтад оруулсан байна. 

Мөн гэр хорооллын 12 багт 32.7 км 2 болон 3 мөртэй замыг хийж иргэдийн амьдрах ая тухтай орчин, нөхцөлийг бүрдүүлжээ.  Энэ сарын 24-29-ны өдрүүдэд аймгийн Засаг дарга Б.Зоригтбаяр хэлтэс, агентлагийн дарга нарын хамтаар 29 багийн иргэдийн төлөөлөлтэй уулзаж  2025 оны хөрөнгө оруулалт, 2026 онд төлөвлөсөн ажлаа тайлагнасан. 

Иргэдийн уулзалтад 2000 гаруй иргэн оролцож, санал хүсэлтээ илэрхийлсэн. Өнгөрсөн жилүүдтэй харьцуулахад нийтийн тээвэр, хог ачилт, эрчим хүчтэй холбоотой иргэдээс гарах санал хүсэлт эрс багассан нь хөрөнгө оруулалтын үр дүн юм. 

Тухайлбал, сүүлийн 5 жилийн хугацаанд орон нутгийн төсвийн хөрөнгө оруулалтаар 25 дунд оврын автобус, хувийн хэвшлийн хөрөнгө оруулалтаар 4 дунд оврын автобусаар тус тус парк шинэчлэлтийг хийснээр нийтийн тээврийн парк шинэчлэлт 80.3 хувьд хүрсэн. 

2024-2025 онд  Хот тохижуулах газарт парк шинэчлэлтийг хийж авто замын засвар, цэвэрлэгээ үйлчилгээ хийх, хог ачих тусгай тоноглол бүхий 49 машин техник, 110 хөдөлгөөнт чингэлгээр хангаж,  авто замын засвар, арчилгааг сайжруулан, гэр хорооллын хог ачилтыг 2-3 удаагийн давтамжаар нэмэгдүүлсэн нь иргэдийн талархлыг хүлээсэн ажил болсон. 

Мөн 2021-2025 онд Говил, Баянцагаан, Яргуйт болон Баян-овоот, Зэст, Оюут, Дэнж багийн нийт 6 цогцолбор байрыг ашиглалтад оруулж,  төрийн үйлчилгээг иргэдэд ойртуулах, нэг дороос авах боломжийг бүрдүүллээ.  Иргэдэд төрийн үйлчилгээг түргэн, шуурхай чирэгдэлгүй хүргэх үүднээс  “Цахим төв” төвийг байгуулж, төрийн үйлчилгээний 10 ширхэг “Хурдан киоск машин”-ыг иргэд ихээр үйлчлүүлдэг байгууллагуудад ажиллуулж байна. Ингэснээр иргэд 215 төрлийн төрийн үйлчилгээг 24 цагийн турш авах боломжтой болсон. 

“Хурдан төв”-ийг Гэр хорооллын төрийн нэгдсэн үйлчилгээний төв, Жаргалант сум болон Захиргааны 4-р байранд ажиллуулж үйлчилгээг цахимаар үзүүлж байна.

Мэдээллийн төв