Иргэдийн уулзалт: Баянбулаг багийн ЕБ-ын сургуулийн спорт заал энэ онд ашиглалтад орно
Аймгийн Засаг дарга Б.Зоригтбаяр хэлтэс, агентлагийн дарга нарын хамтаар Булаг, Баянбулаг багийн иргэдтэй уулзаж санал хүсэлтийг нь сонслоо. Монгол Улсын Засгийн газраас 2026 оныг "Боловсролыг дэмжих" жил болгон зарласан. Үүний хүрээнд аймгийн хэмжээнд царцсан 10 барилгын 7-г нь энэ онд ашиглалтад оруулахаар зорьж буйгаа Засаг дарга уулзалтын эхэнд онцлов.
Тэдгээрээс онцолбол, Баянбулаг багийн 16-р сургуулийн спорт заал юм. 2018 оноос хойш царцаад буй тус барилгын төсвийг улсын төсөвт суулгуулснаар 2026-2027 оны хичээлийн жил эхлэхээс өмнө ашиглалтад оруулахаар төлөвлөжээ.
2025 оны хөрөнгө оруулалтын 80 гаруй хувийг цахилгаан эрчим хүч, ИШС -нд төсөвлөсөн. Гэр хорооллын хүчдэлийн уналттай Баянбулаг, Булаг тэргүүтэй 11 багийн 22 байршилд 10 кВ-ын 10/0.4 кВ-ын 250 кВ чадалтай дэд станц барьсан. Хөрөнгө оруулалтын үр дүнд 3172 өрх хүчдэлийн уналтгүй болсон үр дүн гараад байна.
2026 онд Булагт дэд станцыг Оюут дэд станцтай холбох цахилгаан дамжуулах агаарын шугамыг барьсанаар 35кВт-ын тойрог схем үүсгэх ажил 100 хувь дуусна. Үр дүнд ойрын 10-15 жилдээ Орхон аймаг, Эрдэнэт хотын цахилгаан эрчим найдвартай байдал бүрэн хангагдана.
2025 онд тус сургуулийн барилгын гал тогооны өргөтгөл, цонх засвар, Булаг багийн 18-р цэцэрлэгийн шугам сүлжээг шинэчилж, засварласан.
2026 онд Баянбулаг багийн 27-р цэцэрлэгийн гадна орчныг тохижуулна. Мөн хотын авто замын сүлжээг нэмэгдүүлж, нэвтрүүлэх чадварыг сайжруулах зорилгоор 11-р хорооллын Б хэсгийн авто замыг Баянбулаг багийн авто замтай холбосон шинэ авто зам тавьж ашиглалтад оруулахаар төлөвлөсөн.
ЕСБХБ-ны санхүүжилтээр "Гамшигт тэсвэртэй Эрдэнэт хот төсөл" 2025 онд хэрэгжиж эхэлсэн. 2026 онд Баянбулаг багт 1440 м үерийн далан байгуулах ажил эхэлнэ. Мөн Булаг багт иргэдийн санал хүсэлтийн дагуу шаардлагатай гудамжуудад гудамж хоорондын 2 мөрт зам шинээр тавина.
Мэдээллийн төв
