Орхон аймаг, Эрдэнэт хотын иргэд “Эрдэнэт хотын болон Анхдагч илгээлтийн эзэд”-ийн өдрийг  найм дахь жилдээ тэмдэглэн өнгөрүүлж байна.  Эрдэнэтчүүд, Анхдагч, илгээлтийн эзэд, орон нутгийн удирдлагууд жил бүрийн  арванхоёрдугаар сарын 11-нд болдог  энэ өдөрт   онцгой ач холбогдол өгч, зохион байгуулдаг уламжлалтай. Тэр хэрээрээ иргэдийн хүсэн хүлээдэг  баярын өдөр болсон. 

Жил бүрийн энэ өдөр  аймаг орон нутгийнхаа хөгжилд үнэтэй хувь нэмэр оруулсан иргэдээ Эрдэнэт хотын дээд шагнал “ХҮНДЭТ ИРГЭН”-ээ алдаршуулж,  иргэдийнхээ хамтаар Анхдагч, илгээлтийн эздийн хөшөө, А.Амарын хөшөөнд хүндэтгэл үзүүлэн цэцэг өргөж, шинэ бүтээн байгуулалтуудаа албан ёсоор хүлээн аван,  сүлд модныхоо гэрлийг асаадаг уламжлалтай. 
Энэ өдөр 2026 онд тохиох Эрдэнэт хотын 50 жилийн ойгоо албан ёсоор эхлүүлж буйгаарай онцлог. 50 жилийн ойн хүрээнд  2026 он дуустал 120 гаруй арга хэмжээг зохион байгуулахаар төлөвлөөд байна. 

“Эрин зууны бахархал - Эрдэнэт хот”

Энэ жилийн "Эрдэнэт хотын өдөр"  багш, сурган хүмүүжүүлэгч нар ерөнхий боловсролын 27 мянган сурагчдад “Эрин зууны бахархал - Эрдэнэт хот” сэдвээр хичээл орж, Эрдэнэт хот Анхдагч, илгээлтийн эздийнхээ үүх түүхийг таниулсан билээ. Аймгийн ИТХ-ын дарга Д.Мөнхбат ерөнхий боловсролын 14-р сургууль, УИХ-ын гишүүн Д.Үүрийнтуяа наймдугаар сургуулийн ахлах ангийн сурагчдад дээрх сэдвээр хичээл орсон юм. 

Аймгийн Засаг дарга Б.Зоригтбаяр нэгдүгээр сургуулийн  сургалтын менежер Б.Түвшинбаяр багштай хамтран тус сургуулийн  12б ангийн сурагчдад хичээл орж,  Эрдэнэт хотын суурь тавигдсан түүх, 1973 онд Эрдэнэтийн овооны арын хөндийд эхэлсэн их бүтээн байгуулалт, эх орны өнцөг булан бүрээс илгээлт өвөртлөн ирсэн Анхдагч, Илгээлтийн эздийн хөдөлмөр зүтгэлийн талаар ярилцсан юм.  Мөн Эрдэнэт хотынхоо Монгол Улсын нийгэм, эдийн засагт үзүүлж буй хувь нэмрийн талаар онцлон санал бодлоо солилцов.  Ахлах ангийн сурагчид  Эрдэнэт хотоо дэд бүтэц сайтай, тайван, аюулгүй орчинтой, хотын соёл төлөвшсөн, тогтвортой ажлын байр олонтой, томоохон ААН, хувийн хэвшлүүд нь улсын төдийгүй орон нутгийн нийгэм, эдийн засагт үнэтэй хувь нэмэр оруулдаг гэж бодож явдаг талаараа  санал бодлоо хуваалцсан юм. 

Эрдэнэт хотын хүндэт иргэд ээ алдаршууллаа 

“Эрдэнэт хотын болон Анхдагч илгээлтийн эзэд”-ийн өдөр хүндэтгэлийн баярын хурлаар Соёл урлагийн цогцолборт үргэлжлэв.  Баярын хурлын үйл ажиллагаанд аймгийн ИТХ-ын дарга Д.Мөнхбат, аймгийн Засаг дарга Б.Зоригтбаяр, УИХ-ын гишүүн Д.Үүрийнтуяа, Батлан хамгаалын сайдын зөвлөх, бэлтгэл хурандаа Г.Батсуурь болон аймгийн хүндэт иргэд, гавьяатууд, ахмад буурлууд оролцлоо.  Энэ жилийн Эрдэнэт хотын ”ХҮНДЭТ ИРГЭН”-ээр  төрөлх хотынхоо бүтээн байгуулалт, хөгжил дэвшилд залуу насаа зориулж, залуу үедээ үлгэр жишээ болж яваа 5 эрхэм хүмүүнийг өргөмжиллөө. 

”ХҮНДЭТ ИРГЭН”-ээр...

• Эрдэнэт хотын анхдагч, 1965 оноос 1971 оны хооронд Эрдэнэт овооны хайгуулын ангид ахлах мастер, хуучнаар ЗХУ-ын Дорнод Сибирийн харъяа хайгуулын ангид өрмийн мастер, Эрдэнэт хотын Монгол ажилчдын нэгдсэн захиргаанд Эксковаторын туслах, Эрдэнэт үйлдвэрийн Авто тээврийн байгууллагад белазын жолоочоор ажиллаж байсан Эрдэнэт хотын анхдагч, Илгээлтийн эзэн Лхамжавын Төмөртогоо 
• Эрдэнэт хотын Монгол ажилчдын нэгдсэн захиргаанд гангуурчин, Зэвсэгт хүчний 186-р ангид гагнуурчин, Орхон хийц ХХК-д гангуурчинаар тус тус ажиллаж байсан Эрдэнэт хотын анхдагч, Илгээлтийн эзэн Зулзаагийн Дуваа 
• Аж үйлдвэрийн гавьяат ажилтан. Эрдэнэт үйлдвэрийн Баяжуулах фабрикт угсрагч, тээрмийн машинч, баяжуулагч, ээлжийн мастер, Үйлдвэр техникийн хэлтсийн орлогч дарга, дарга, Үйлдвэрлэлийн техникийн асуудал эрхэлсэн захирал, Баяжуулах фабрик, Чанар хяналтын хэлтсийн болон Хөгжлийн хэлтсийн даргаар ажиллаж байсан Шаравын Гэзэгт 
• Гавьяат багш, Эрдэнэт хот, Орхон аймгийн 1-р сургуулийн багшаар ажиллаж байсан, Эрдэнэт хотын Боловсролын салбарын тод төлөөлөл болсон эрхэм хүн Бадарчийн Цээсүрэн 
• Улсын аварга тариаланч, Онц тээвэрчин, Аймгийн алдарт уяач, Улаантолгойн САА-д тракторчин, "Өлзий" ХХК-д тракторчин, Өрхийн тариаланч хөдөлмөрч хүмүүн Лувсансамбуугийн Ганбат нар "Эрдэнэт хотын өдөр болон Анхдагч илгээлтийн эздийн өдөр"-өөр аймаг, орон нутгийнхаа хүндэт иргэнээр өргөмжлөгдлөө.

Түүнчлэн аймаг орон нутгийн хөгжилд үнэтэй хувь нэмрээ оруулж буй ажилчид, албан хаагчид, ахмад буурлуудыг төрийн дээд одон медалиар шагнаж урамшуулав. 

Дэнж,  Оюут багт  “Төрийн үйлчилгээний нэгдсэн цогцолбор төв” ашиглалтад орлоо 

Дэнж,  Оюут багт  “Төрийн үйлчилгээний нэгдсэн цогцолбор төв”-ийн барилгыг албан ёсоор нээж, ашиглалтад орууллаа. Нээлтийн арга хэмжээнд аймгийн удирдлагууд, иргэдийн төлөөлөл оролцов.  Оюут баг  Эрдэнэт хотын ууган багуудын нэг . Сүүлийн жилүүдэд орон сууцны хороолол эрчимтэй нэмэгдэж, 2102 өрхийн 7590 хүн амтай баг болтлоо өргөжин тэлсэн.  Хүн ам нэмэгдэхийн хэрээр төрийн анхан шатны үйлчилгээг нэг дор цогцоор үзүүлэх хэрэгцээ шаардлага үүсээд байсан билээ. 

Эдгээр бүтээн байгуулалтууд нь тухайн багийн иргэд болон Засаг дарга нараас  гарсан санал хүсэлтэд тулгуурлан хэрэгжсэн хөрөнгө оруулалтын ажлууд юм.  Оюут багийн байрыг Орон нутгийн хөгжлийн сангийн 2,3 тэрбум,  Дэнж багийн байрыг Баян-Өндөр сумын 3,9 тэрбум төгрөгийн хөрөнгө оруулалтаар ашиглалтад орууллаа.  Дэнж баг нь 1997 онд байгуулагдсан,  1500 гаруй өрх, 5500 орчим иргэнтэй.  

Зоорийн давхартайгаа гурван давхар, металл фасад бүхий тус барилга ашиглалтад орсноор өрхийн эмнэлэг, цагдаагийн хэсэг, Багийн ажлын алба зэрэг байгууллагууд нэг дор төвлөрч, иргэд төрийн үйлчилгээг нэг дороос авах боломж бүрдэж байна. 

Эрдэнэт хотын 50 жилийн ойн  босгон дээр "Даваат дэд"  станцыг ашиглалтад орууллаа 

Эрдэнэт хотын 50 жилийн ойн  босгон дээр 35/10 кВ-ын “Даваат дэд” станцыг  орон нутгийн төсвийн хөрөнгө оруулалтаар барьж,  “Эрдэнэт хотын болон Анхдагч илгээлтийн эздийн өдөр”-өөр албан ёсоор нээлээ.  Аймгийн Засаг дарга Б.Зоригтбаяр нээж хэлсэн үгэндээ “ Бидэнд цахилгаан дамжуулах агаарын шугамаа өргөтгөж, шинэчлэх зайлшгүй шаардлага байлаа. 2025 онд орон нутгийн төсвөөс 40 орчим тэрбум төгрөгийг цахилгаан эрчим хүчийг сайжруулахад зарцуулж, 70 гаруй хөрөнгө оруулалт, бүтээн байгуулалтын ажлыг хийж гүйцэтгэлээ.  Үүний нэг томоохон ажил нь Даваат дэд станц түүнээс салбарласан 18,5 километр цахилгаан дамжуулах агаарын шугам татах ажил байв.

Орон нутаг бие даан 5.8 тэрбум төгрөгийн хөрөнгө оруулалтаар 35/10 кВ-ын "Даваат" дэд станцыг барьж, ашиглалтад оруулж байгаа нь яахын аргагүй түүхэн бүтээн байгуулалт” гэдгийг онцоллоо. 

Мөн тэрээр  гэр хорооллыг дахин төлөвлөх төсөлд 3600 айлын орон сууц, 1200 хүүхдийн сургууль, 900 хүүхдийн цэцэрлэг, 500 хүний суудалтай үзвэрийн газруудын цахилгаан хангамжийг бүрэн шийдвэрлэх боломж бүрдэж байгааг дуулгаж, түүхэн бүтээн байгуулалтын гүйцэтгэгчээр ажилласан "Меса инженеринг" ХХК-ийн хамт олон, гар бие оролцсон хүн бүхэнд талархал илэрхийллээ. 

Даваат дэд станц ашиглалтад орсноор гэр хорооллын айл өрхийн 70 хувийг тэжээж байсан Хороолол дэд станцын ачааллыг бууруулж, эрчим хүчний найдвартай байдлыг бий болгоод буй.  Даваат дэд станц нь 35/10 кВ-ын 2х16000 кВА чадалтай, өнөөдрийн байдлаар  10/0.4 кВ-ын 62 дэд станц, 1988 айл өрх, аж ахуй нэгжүүд холбогдоод байна. Түүнчлэн уг дэд станц ашиглалтад орсноор нэг гаргалгаан дээр холбогдох дэд станцын тоо 40-50 байсныг 10-20 болгон бууруулж, 30-40 км урт үргэлжлэх агаарын шугамын уртыг 5-10 км болгосон. 

Эрдэнэт хотын хэмжээнд 35 кВ-ын тойрог схем үүсгэх төслийн эхний хэсэг  нь энэхүү Даваат дэд станц юм. 2026 онд  Баянбулаг,  Оюут дэд станцуудыг ашиглалтад оруулж, дутуу шугамаа гүйцээснээр 100 хувь дуусна. Үр дүнд өсөн нэмэгдэж байгаа цахилгаан эрчим хүчний хэрэглээг хангах, гэр хорооллыг цахилгаан халаагуураар хэсэгчлэн халаах, дахин төлөвлөлтийн хүрээнд баригдах орон сууцны барилгуудын дэд бүтэц цахилгаан хангамжийн хүртээмжийг нэмэгдэх боломж бүрдэнэ гэж үзэж байна. 

 “Бундан” ТББ болон “Зүрх мартахгүй хүүхдийн сан”-тай хамтран ажиллах санамж бичиг байгуулав

Орхон аймаг 50 жилийн ойн хүрээнд 50 бяцхан зүрхийг эмчлэх зорилгоор "Эрдэнэт - 50 зүрх" төслийг “Бундан” ТББ болон “Зүрх мартахгүй хүүхдийн сан”-тай хамтран хэрэгжүүлэхээр санамж бичиг байгууллаа. Аймгийн Засаг даргын хувьд түүхт ойгоо угтан  иргэдийнхээ эрүүл мэнд, сайн сайхны төлөө үр өгөөжтэй бодит ажил хийхийг зорьж буй. 
 Жилийн турш хэрэгжих энэхүү төслийн хүрээнд  Эрдэнэт хотын ирээдүй болсон 50 бяцхан зүрхийг эрүүл энх болгох чухал үр нөлөөтэй ажил  гэдгийг Засаг дарга Б.Зоригтбаяр онцолж, бяцхан зүрх бүрт  амьдрал бэлэглэхээр зорин яваа зүрхний мэс засалч, Монгол Улсын Гавъяат эмч Б.Болдсайханд  талархлаа илэрхийллээ. 

"Монгол Улсын Филармони" симфони найрал хөгжмийн шилмэл бүтээлийн дээжис эгшиглэлээ 

Дэлхийн болон Монголынхоо сонгодог  уран бүтээлийн дээжсийг аймаг орон нутагтаа үзэх, сонсох боломжийг “Эрдэнэт хотын болон Анхдагч илгээлтийн эзэд”-ийн өдрөөр олгодог нь иргэдийн талархлыг хүлээгээд буй. Энэ жил "Монгол Улсын Филармони"  симфони найрал хөгжмийн  сонгодог бүтээлийн дээжис  Эрдэнэт хотын өдрөөр эгшиглэлээ.

2022 онд УДЭТ-ын хамт олны бүтээл  дэлхийн сонгодог Анна Каренина, 2023 онд Төрийн тэргүүн зэргийн “Чингис хаан” одонт, Монгол Улсын Соёлын элч, улсын филармонийн Морин хуурын чуулгын уран бүтээлчид шилмэл уран бүтээлийн дээжсээсээ толилуулж байв. 2024 онд Улсын филармонийн Төрийн шагналт “Баян Монгол” чуулгын “Сэтгэлд хоногшсон дуунууд” эгшиглэсэн. 

Эрдэнэтчүүд  сүлд мод оо   асаалаа 

Эрдэнэт хотын сүлд мод жил бүр өөр, өөр агуулга, утга санааг илэрхийлдэг. Энэ жил  “ECITY-50” буюу Эрдэнэт хот 50 жил гэсэн агуулгын хүрээнд тохижуулжээ. Жилийн жилд аймгийн Хот тохижуулах газрын ажилтан албан хаагчид хүйтнийг ажралгүй сүлд мод оо засаж, Эрдэнэт хот, Эрдэнэтчүүддээ баярын өнгө нэмдэг билээ.