“Эрдэнэт хот, Анхдагч илгээлтийн эздийн өдөр” жил бүрийн арванхоёрдугаар сарын 11-нд тохиодог билээ. Найм дахь жилдээ тэмдэглэн өнгөрүүлэх гэж буй эл өдрийн бэлтгэл, зохион байгуулалтын талаар Засаг даргын орлогч, ажлын хэсгийн дарга Б.Мөнхдалайгаас тодрууллаа. 

-Энэ жилийн “Эрдэнэт хот, Анхдагч илгээлтийн эздийн өдөр”-ийн онцлог нь юу вэ? 
-“Эрдэнэт хот, Анхдагч илгээлтийн эздийн өдөр”-ийг тэмдэглэн өнгөрүүлэх ажлын хэсгийг миний  бие ахалж, холбогдох төрийн байгууллагуудын 19 хүний бүрэлдэхүүнтэйгээр 24 төрлийн үйл ажиллагааг зохион байгуулахаар бэлтгэл хангаж байна.  Энэ сарын 8-ны өдрөөс “Эрдэнэт хот, Анхдагч илгээлтийн эздийн өдөр”-ийг угтсан арга хэмжээнүүд эхэлсэн.  2017 онд аймгийн ИТХ-ын аравдугаар сарын 27-ны өдрийн 01 дүгээр тогтоолоор  “Эрдэнэт хотын өдөр, Анхдагч илгээлтийн эзэд”-ийн өдөр болгож, жил бүрийн арванхоёрдугаар сарын 11-нд  хамтатган тэмдэглэхээр шийдвэрлэсэн. 

Өнөө жил бид найм дахь жилдээ энэхүү түүхэн өдрийг тэмдэглэн өнгөрүүлэх гэж байна. Ирэх 2026 онд Эрдэнэт хот байгуулагдсаны 50 жилийн ой тохионо.  “Эрдэнэт хотын өдөр, Анхдагч илгээлтийн эзэд”-ийн өдрөөр түүхэн ойн арга хэмжээг албан ёсоор эхлүүлж буйгаараа онцлогтой.

-Ямар арга хэмжээнүүд төлөвлөсөн бэ?
-Эрдэнэт хотын өдрийн өглөө “Эрин зууны бахархал” сэдвээр ерөнхий боловсролын сургуулийн сурагчдад хичээл орохоор эхэлнэ. Эрдэнэтийн хүүхдүүд төрөлх хотынхоо үүх түүх, хөгжил цэцэглэлтийг мэддэг, ахмадууд Анхдагч, Илгээлтийн эзэдээрээ бахархах учиртай. 
Мөн баярын хурал, хүндэтгэлийн тоглолт, Эрдэнэт хотын хүндэт иргэнээ алдаршуулах гэх мэт уламжлалт арга хэмжээнүүд өрнөнө. “Эрдэнэт хотын өдөр”-өөр Улаанбаатар хотоос мэргэжлийн хөгжмийн чуулгыг бүрэн бүрэлдэхүүнээр нь авчирдаг. Өнгөрсөн жилүүдэд Морин хуурын чуулгыг бүрэн бүрэлдэхүүнээр нь авчирч, Эрдэнэтчүүдийнхээ сонорыг мялааж байлаа. Энэ жил Монгол Улсын Филармони Симфони найрал хөгжмийн “Шилмэл бүтээл-ийн хүндэтгэлийн тоглолтыг Эрдэнэтчүүддээ толилуулна. 

-Энэ өдөр уламжлал ёсоор Эрдэнэт хотын  шинэ жилийн сүлд модыг асаана. Жил бүрийн Эрдэнэт хотын сүлд мод ямар нэгэн агуулгыг илэрхийлдэг. Энэ жилийнх юу байх вэ? 
-Хүүхэд, залуучуудын хамгийн их догдлон хүлээдэг, хот даяар баярын  уур амьсгал оруулдаг арга хэмжээ яахын аргагүй энэ өдөр болдог. Жилийн жилд сүлд мод засах ажлыг Хот тохижуулах газрын ажилтан албан хаагчид хариуцан хийдэг. Энэ жилийн сүлд модны агуулга “ECITY-50” буюу Эрдэнэт хот 50 жил гэсэн агуулгын хүрээнд тохижолтын ажил хийгдэж байна. 
Арванхоёрдугаар сарын 11-ний 20:30 минутад сүлд мод оо асаах ёслолд, Эрдэнэтчүүд ээ урьж  байна. Мөн энэ үдэш  гэрлийн лазер шоу, Batuh, Баярцэцэг, Runa  зэрэг уран бүтээлчид ая дуугаа өргөнө. 

-Зарим хөрөнгө оруулалт бүтээн байгуулалтыг Эрдэнэтийн хотын өдрөөр албан ёсоор нээнэ. Энэ талаар мэдээлэл өгөхгүй юу?
-2025 оны хамгийн том хөрөнгө оруулалт бүтээн байгуулалтын ажил 35/10 кВ-ын Даваат дэд станцыг албан ёсоор Эрдэнэт хотын өдрөөрөө нээхээр бэлтгэл хангаж байна. 40 гаруй жилийн түүхэнд Орхон аймаг анх удаа бие даан дэд станц барьж, ашиглалтад оруулж буй  түүхэн бүтээн байгуулалт юм. Мөн Дэнж, Оюут багийн Төрийн үйлчилгээний нэгдсэн төвийг нээнэ. “Иргэдийн уулзалт”-ын үеэр иргэдээс гарсан санал хүсэлтэд тулгуурлан хэрэгжсэн бүтээн байгуулалтууд юм.                                                                      

 Мэдээллийн төв