Өргөтгөсөн шуурхай хуралдааныг аймгийн Засаг дарга Б.Зоригтбаяр удирдан явууллаа. 14 хоногт нэг удаа болдог Өргөтгөсөн шуурхай хуралдаанаар өмнөх шуурхай хурлаас өгсөн үүрэг даалгаврын биелэлт, хөрөнгө оруулалт, бүтээн байгуулалтын ажлын явц, тулгамдаж буй бэрхшээл, шийдвэрлэх арга зам, иргэдийн санал хүсэлтийг хүлээн авдаг 70353511 дугаарын утсанд иргэдээс ирүүлсэн санал, хүсэлт, өргөдөл, гомдлын шийдвэрлэлт болон цаг үеийн бусад асуудлаар хэлэлцлээ. Мөн  хоёр сумдын ЗДТГ, Хотын захирагчийн албанаас цаг үеийн мэдээлэл хийв.  

Долоодугаар сарын 31-ний өдрөөс наймдугаар сарын 13-ныг хүртэлх 14 хоногийн хугацаанд 70353511 дугаарын утсанд 122 өргөдөл, гомдол иржээ. Үүнээс хүсэлт 119, талархал 4 ирсэн байна. Шийдвэрлэсэн 55,5 хувьтай, шийдвэрлэх шатандаа 44,5 хувьтай явж  байна. 

Өргөдөл, гомдлыг агуулгаар нь авч үзвэл боловсрол, хог хаягдал, авто зам, эрүүл мэнд, газрын харилцаа, халаалт, цэвэр ус, шугам сүлжээ, гэрэлтүүлгийн асуудал  зонхилжээ.  
Мөн наймдугаар сарын 1-ний өдөр хуралдсан Өргөтгөсөн хурлаас 6 үүрэг даалгавар өгснөөс бүрэн хэрэгжсэн 3, хэрэгжиж байгаа 3 үүрэг даалгавар байна. 

 Авто замын засвар, шинэчлэлтэй холбоотой мэдээллийг ЗДТГ-ын ХБТХОХ-ийн дарга С.Даваадорж хийв. Энэ онд шинээр эхэлсэн 23 авто замын ажил,он дамжин хийгдэж буй 34  гэрээт ажил байна. Эдгээр ажлуудаас өнөөдрийн байдлаар 2024-2025 оны хооронд бүрэн дууссан 28 ажил байна гэх мэдээллийг өглөө. 

Засаг дарга Б.Зоригтбаяр ирэх долоо хоногийн шуурхай зөвлөгөөнөөр авто замаас бусад хөрөнгө оруулалтын ажлын явцыг тайлагнахыг үүрэг болголоо. Мөн ирэх даваа гарагт Орхон АЗЗА ТӨХК, Хот тохижуулах газрыг  авто замд нөхөөс хийх ажлын төлөвлөгөөгөө танилцуулахыг үүрэг болголоо. 

Түүнчлэн дараах үүрэг даалгаврыг өглөө. 

• Зөвшөөрөлгүй барилгын ажлаа эхлүүлсэн компаниудын эрчим хүчийг хязгаарласан. Зөрчлөө арилгах хүртэл цахилгаанаар хангахгүй байх  чиглэлийг “Эрдэнэт Ус”, “Эрдэнэт Булган цахилгаан түгээх сүлжээ” ТӨХК-д өглөө. 
• Хичээл, сургууль эхлэхээс өмнө зарим байршилд хийгдэж байгаа  хөрөнгө оруулалт, бүтээн байгуулалтын ажлуудыг дуусгахыг зорьж байна.   Ажлын трасст нэг биш нэлээн хэдэн цахилгааны болон шилэн кабель  таарч байгаа нь ажил удаашрахад нөлөөлж байна. Энэ нь газар доорх байгууламжийн нэгдсэн мэдээлэл  байдаггүйтэй холбоотой. Тиймээс “Эрдэнэт ус”, “Мэдээлэл холбоо сүлжээ” ТӨХК, “ЭДЦС”, “Эрдэнэт Булган” ЦТС   зэрэг мэргэжлийн байгууллагуудын  хамтарсан Шуурхай штаб байгуулахыг үүрэг болголоо. Ингэснээр зөрчил гарсан үед асуудлыг цаг алдалгүй шуурхай шийдвэрлэх боломжтой гэж үзэж байна. 
• Сургууль, цэцэрлэгийн орчимд хийгдэж байгаа  хөрөнгө оруулалтын ажилд онцгой анхаарахыг хяналтын инженерүүдэд үүрэг болголоо. Хугацаа нь болоогүй байсан ч ажлыг шахаж, шороон дүүргэлт хийхэд анхаарахыг сануулав.   Хөл хөдөлгөөн ихсэхээр нүхэн дээгүүр харайх, түүнээс үүдэлтэй унах, бэртэх  зэрэг эрсдэлээс сэргийлэхийг санууллаа. 
•   Өвөлжилтийн бэлтгэл ажилд онцгой анхаарахыг сумдын удирдлагуудад чиглэл болголоо. Улсын Онцгой комисс, Цаг уурын байгууллага, судлаачид ирэх өвлийг хатуу болно гэж мэдээлж буй. Өнөөдрийн байдлаар улсын хэмжээнд 200 гаруй сум гантай, 40 гаруй сум гандуу байна. Тиймээс өвс, тэжээл, түлээ, түлшний нөөцийг эртнээс бэлдэхийг санууллаа. Мөн үүнтэй холбоотой мэдээллийг ирэх долоо хоногийн танилцуулахыг үүрэг болголоо. 
• Засгийн газраас 2026 оны Боловсролыг дэмжих жил болгон зарласан. Эдгээр өдрүүдэд 2026 оны төсвийн төслийн анхдугаар хэлэлцүүлэг өрнөж байна. Ирэх жил улсын төсвийн хөрөнгө оруулалттай царцсан барилгуудыг ашиглалтад оруулах, шаардлагатай хөрөнгө оруулалтыг эртнээс хөөцөлдөж, шийдвэрлүүлэхийг холбогдох албаныханд даалгалаа. 

Мэдээллийн төв