Эрхэм хүндэт наадамчид аа!

 Эрхэм хүндэт зочид, төлөөлөгчид өө! 
 Эрин зууны манлай бүтээн байгуулалтын эзэд, залгамжлагчид, үргэлжлүүлэгчид гэж омогшин  хэлэх бүрэн  эрхтэй эрдэнэтчүүд та бүхэндээ Үндэсний их баяр наадам, Монголын Тулгар төрийн 2234, Их Монгол улсын 819, Ардын хувьсгалын түүхт 104 жил, Орхон аймаг, Эрдэнэт хотын баяр наадмын цогтой  халуун мэндийг өргөн дэвшүүлье.
  Хүннү, Сүннүгээс хүйлсэн, өвгөд дээдсээс өвлөгдөн ирсэн Монгол наадам бол Монгол төрийн ахуй оршихуй, тусгаар тогтнолын бэлгэдэл, төрт ёсны их баяр цэнгэл, Монголчуудын эв нэгдэл, эрх чөлөө, үүх түүх, үнэ цэнэ, өв соёл, оюун санааны охь шим, хүн төрөлхтний  далай их соёлын яндашгүй нэгэн эрдэнэ билээ.

  Эрдэнэтчүүд бид хийсэн бүтээснээрээ омогшин, хийж бүтээхээрээ жигүүрлэн азай буурлууд, анхдагч- илгээлтийн эзэд, гадаад, дотоодын эрхэм хүндэт зочид төлөөлөгчид, цог золбоот залуус, нялх балчир үрсийнхээ хамтаар өргөн дэлгэр наадахаар  Төв цэнгэлдэх хүрээлэндээ хуран цуглаад байна.

 Эх орныхоо тусгаар тогтнол, эрх чөлөөг бататган бэхжүүлж, эвийн хүч, шударга  ёс, бүтээлч сэтгэлгээг эрхэмлэн дээдэлж, үндэсний түүх, эх хэл, соёл уламжлалаа нандигнан өвлөж, хөгжил дэвшлийн төлөө хичээн зүтгэж буй хүн бүхэнд талархал илэрхийлье.

Зуунаас зуун дамжин дүүлсэн хөгжлийн эрэмгий сайхан хүлэг  гэлтэй Эрдэнэт хот маань ирэх 2026 онд  50 жилтэйгээ золгоно. Энэ аргамаг сайхан хүлгийнхээ хаа ч хүрэх ирийг нь үл сааруулах, хатан жолоог эс алдруулах нь та бидний эрхэм үүрэг, нэр төрийн хэрэг юм.

Өнгөрсөн жилийн наадмаас өдий хүртэл бид юу хийв? Ирэх жилийн наадам хүртэл бид юу амжуулах вэ? Асуудал ингэж тавигдана. 

Бид хагас зуун жил  гар хүрээгүй инженерийн шугам сүлжээгээ хонгилын системд оруулахаар, хотын доторх авто замуудаа шинэчилж өргөтгөж сайжруулахаар, гэр хорооллынхоо цахилгаан, эрчим хүчний найдвартай, тасралтгүй ажиллагааг хангахаар  энэ жилийн хөрөнгө оруулалт, бүтээн байгуулалтын ажлаа чиглүүлж байна. 
Эдгээр ажлыг гүйцэтгэхэд иргэд та бүхний тав тухыг түр алдагдуулж байгаа ч бид бүхэн зуны энэ цаг хугацаандаа  багтаахаар зориглон хийж байна.  Энэ бүтээн байгуулалтын ажлуудыг ойлгож хүлээж авч байгаа Эрдэнэт хотынхоо нийт иргэддээ бас баярлалаа.  

Мөн бид Эрдэнэт хотын хөгжлийн ерөнхий төлөвлөгөөгөө 20 жилээр нь батлуулахаар, Эрдэнэт хотынхоо гамшигт тэсвэртэй байдлыг нэмэгдүүлэхээр үерийн далангийн том бүтээн байгуулалтын ажлыг эхлүүлээд байна.  Эдгээр ажлыг анх санаачилж, эхлүүлсэн Орхон аймгийн үе, үеийн удирдлага, Засаг дарга нар, хамтран дэмжин ажилласан УИХ-ын гишүүд  болон мэргэжлийн байгууллагууддаа талархаж байгаагаа энэ ташрамд хэлье. 

Бид хөгжлийг хурдасгах, хуримтлагдсан асуудлаа шийдвэрлэх зорилгоор “Эрдэнэт” үнэт цаас гаргах ажлыг санаачилж аймгийн ИТХ, Засгийн газарт асуудлаа танилцуулж тодорхой шийдвэрүүд гарч,  ажил маань амжилттай  ургашилж байна. 

Орхон аймаг, Эрдэнэт хотынхоо  давуу тал, үнэт зүйлээ бид  “Эрдэнэт-Хүний хөгжил” хэмээн тодорхойлж ирэх 4 жилийнхээ бодлогын гол цөм болгон ажиллаж байна.  

Та, бидний өмнө хийж, хэрэгжүүлэх олон ажил  байна. Цаг хугацаа өнгөрөх мөч бүрт бид хариуцлагатай байж хотынхоо хөгжил, цэцэглэлт, өөрчлөлт, шинэчлэлтийн төлөө зогсолтгүй ургашлах болно. 

Өнөөдөр Эрдэнэтчүүд бид олсон амжилтаа олох амжилт, хүрэх  оргилынхоо халил өндрөөс огшоон наадна. Энэ бол Монгол наадмын билэг чанар.
 Өнөөдөр бид азай  буурлууд, эрин зууны их бүтээн байгуулалтыг дархалсан анхдагчид-илгээлтийн эздээ хоймроо залан хүндлэж, хайрлан халамжилж, сургаал юугаар нь сонороо мялаан наадна. Энэ бол Монгол наадмын билэг чанар.

Өнөөдөр Эрдэнэтчүүд  бид  цог золбоот залуус, нялх балчир үрсийнхээ ирээдүй хойчид чиглэсэн бодлого боловсруулж хэрэгжүүлэн Орхон аймаг, Эрдэнэт хотоороо омогшиж  наадна. Энэ бол Монгол наадмын билэг чанар. 
 Үндэсний их баяр наадам, Монголын Тулгар төрийн  2234  жил, Их Монгол улсын 819 жил, Ардын хувьсгалын  түүхт 104 жилийн ой, Орхон аймгийн баяр наадмын үйл ажиллагааг нээснийг мэдэгдье.

Хүлэг морьд тань шандастай, хүчит бөх тань бяртай, хөвчит сум тань цэцтэй байх болтугай!   
                                                Та бүхэн маань сайхан наадаарай.

Мэдээллийн төв