Хойд бүс-Эрдэнэт 2025 эдийн засгийн форум болж байна
Орхон аймаг, Эрдэнэт хотын ирээдүйн хөгжлийн үзэл баримтлалыг олон нийтэд танилцуулж, ирэх жилүүдэд хэрэгжүүлэх төсөл хөтөлбөрүүдээ хэлэлцүүлэн, олон талт хамтын ажиллагааг өргөжүүлэх зорилгоор “Хойд бүс – Эрдэнэт 2025” эдийн засгийн форумыг зохион байгуулж байна.
Форумаар 50 жилийн өмнө байгуулагдаж байсан Эрдэнэт хот 2036 он хүртэлх хөгжлийн үзэл баримтлалаа Бүтээлч, Ухаалаг, Тогтвортой байхаар төлөвлөснөө танилцуулж байна.
Хөгжлийн үзэл баримтлалд байгаль орчин, нийгэм, эдийн засгийн хөгжлийн бодлогыг тэнцвэртэй авч явахаар тодорхойлжээ.
Форумын эхэнд аймгийн Засаг дарга Б.Зоригтбаяр "Ирээдүйн Эрдэнэт" сэдвээр илтгэл тавив. Тэрээр, “Бид цаашид аль нэг салбараас хамааралтай байх нь эдийн засагт урт хугацаандаа эрсдэлтэй. Тиймээс хөгжлийн шинэ үзэл баримтлал, бодлогоо торхойлоод байна. Энэхүү хөгжлийн үзэл баримтлал, үүний хүрээнд хэрэгжүүлэх төсөл хөтөлбөрүүдийн үр дүнд “Ирээдүйн Эрдэнэт” хот “Хүн төвтэй, бүх зүйл нь ойр, хүүхдэд ээлтэй хот” болсон байна гэдгийг онцлов.
2036 он хүртэл 12 жилийн хугацаанд гурван үе шаттай хэрэгжүүлэх хөгжлийн үзэл баримтлалын эхний үе шат 2025-2028 онд хэрэгжинэ. Энэ хугацаанд нийгмийн салбарын хөгжлийг тодорхойлсон “Эрүүл оюунлаг хот”, шинжлэх ухаан, судалгаанд суурилсан “Ухаалаг хот”, эрчим хүчний найдвартай эх үүсвэрийг бий болгох зорилготой “Цэвэр агаартай хот” зэрэг төслийг танилцуулах юм. Мөн эдгээр төслийн хүрээнд хэрэгжих 60 дэд төсөл, түүний үр дүнг танилцуулж, эрдэмтэн судлаачдын санал шүүмжийг сонсох юм.
Мөн гадаа талбайд барилга, эрчим хүчний ногоон шийдэл бүхий техник, технологи, агро технологийн үзэсгэлэн гарна. Орхон аймаг эдийн засгийн форумыг 2017 оноос хойш хоёр жил тутамд зохион байгуулж байгаа бөгөөд энэ жил тав дахь удаагаа зохион байгуулж байна.
Мэдээллийн төв
