Цахилгааны холболтоо шалгахыг зөвлөж байна
Сар шинийн баярын өдрүүдэд ахуйн гал түймрээс урьдчилан сэргийлэхийг иргэдэд сэрэмжлүүлж байна. Энэ он гарсаар гал түймрийн 23 дуудлага бүртгэгдэж, 78 сая эд хөрөнгийн хохирол учирчээ. Гал түймрийн шалтгааны дийлэнх нь цахилгаан холболт, ашиглалтаас үүдэлтэй байгаа аж.
Өөрөөр хэлбэл, иргэд цахилгаан холболтоо дур мэдэн хийснээс үүдэлтэй ахуйн гал түймэр дийлэнх хувийг эзэлж байгаа талаар мэргэжлийн байгууллагаас мэдээллээ. Тиймээс иргэдийг цахилгааны холболт, цахилгаан угсралтаа мэргэжлийн хүнээр хийлгэж, шалгуулахыг анхааруулав.
Мөн аймгийн Засаг даргын баталсан “Цагаан сар-2025” нэгдсэн арга хэмжээний удирдамжийн дагуу галын аюулгүй байдлын үзлэг шалгалтыг аймгийн Онцгой байдлын газрын албан хаагчид гүйцэтгэж байна.
Энэ хүрээнд айл өрх угаарын хийн хордлогоос сэргийлэх, цаг агаарын аюултай үзэгдлийн талаарх сэрэмжлүүлэг, халтиргаа гулгаанаас үүдэлтэй осол гэмтлээс урьдчилан сэргийлэх, орон нутагт зорчих жолооч нарт аюулгүй байдлыг хэрхэн хангах, хөлдөх, осгох үед авах арга хэмжээ, анхны тусламж хэрхэн үзүүлэх талаар зөвлөгөө мэдээллийг өгөн ажиллаж байна.
Мэдээллийн төв
