1А хорооллын дэд бүтцийн ажлыг яаралтай дуусгах үүрэг өглөө
1А хорооллыг ус дулаан, цахилгаанаар хангах дэд төвүүдийг яаралтай ашиглалтад оруулж, иргэд орон сууцандаа орох боломжоор хангахыг үүрэг болголоо.
Нийт 1230 айлын орон сууц бүхий тус хорооллыг ус дулаан, цахилгаанаар бүрэн хангахын тулд дэд бүтцийн зардалд анх 7,8 тэрбум төгрөг төсөвлөгдсөн байдаг. Үүнд ус дулаан дамжуулах гурван дэд төв, цахилгаан дамжуулах таван дэд станц, хотын цахилгаан дамжуулах ЦРП-2т хүчитгэл хийх, барилга тоног төхөөрөмж суурилуулах ажлууд хийхээр төлөвлөсөн. Тус хорооллын дэд бүтцийн ажлыг гүйцэтгэх тендер 2020 онд зарлагдаж “Би Энд Би констракшн” ХХК шалгарчээ.
Хувийн хэвшил орон сууцны хороолол барьж байгаа тохиолдолд орон нутаг дэд бүтцийн асуудлыг шийдвэрлэх хуулийн заалттай. Энэ хүрээнд 2020 онд ИШС болон дэд бүтцийн зардлыг “Эрдэнэт Үйлдвэр” ТӨҮГ-тай хамтын ажиллагааны зардлаас шийдвэрлэх болсон юм.
Харин ажил эхлэх үед ковид цар тахал дэгдэж, үүнийг дагаад бараа материалын үнийн зөрүү гарч эхэлсэний улмаас ажил удаашралтай болсон гэв. Иймд дахин 2,1 тэрбум төгрөгийн төсвийн зөрүүг шийдэх шаардлагатай болсон бөгөөд өнөөдрийн байдлаар орон нутаг нийт төсвийн 90 хувийн сахүүжилтийг олгоод байна.
Аймгийн Засаг дарга Б.Зоригтбаяр өнөөдөр газар дээр нь ажиллаж гүйцэтгэгчийг ажлын нарийвчилсан төлөвлөгөө гаргаж бодит мэдээлэл өгөхийг даалгалаа. Мөн ус дулаан, цахилгаанаар хангах дэд төвүүдийг хэсэгчлэн улсын комисс ажиллуулж хүлээж авах боломжтой талаар судалж хариу өгөх, иргэд орон сууцандаа орох боломжоор хангахыг холбогдох албаныханд үүрэг болголоо.
Мэдээллийн төв
