15 байршилд төмөр хайс, хашлага буулгана
Аймгийн Засаг дарга М.Түмэнжаргал даваа гарагийн Засаг даргын шуурхай зөвлөгөөнөөр хотын төвийн ногоон байгууламж, нийтийн эзэмшлийн гудамж талбайн төмөр хайс, хашлагыг буулгах үүрэг даалгавар өгсөн.
Энэ хүрээнд Хот тохижуулах газар, Цэцэрлэгжүүлэлт, ногоон байгууламжийн газраас хамтран төмөр хайс, хашлага авах ажлыг Отгонбилэгийн гудамжнаас эхлүүллээ. Энэ намар 15 байршилд 4248 метр төмөр хайс, хашлага буулгах юм. Хотын ногоон байгууламж, гудамж талбайд амьд хашлага буюу ургамалан хашлага хийх ажлыг 2017 онд эхлүүлж, нийт 6.1 км уртаас газарт шар хуайс тарьж, төмөр хашлагаар хамгаалж байв.
2021 оноос ургалт нь гүйцсэн хэсгүүдэд төмөр хашлага буулгах ажлыг үе шаттайгаар эхлүүлсэн. Ирэх онд үлдсэн төмөр хайс, хашлагыг буулгаснаар Орхон аймаг төмөр хайс, хашлагагүй “ногоон” аймаг болно.
Мэдээллийн төв
