Зам тээврийн яамны төрийн нарийн бичгийн дарга С.Батболд, Авто тээврийн үндэсний төвийн захирал Б.Гүрсоронзон нар Орхон аймагт ажиллалаа. Аймгийн ИТХ-ын дарга Д.Мөнхбат, Засаг дарга М.Түмэнжаргал нар орон нутгийн авто зам, замын байгууламж, засвар үйлчилгээ, шинэчлэлттэй холбоотой асуудлуудыг танилцуулж, шийдвэрлүүллээ. Тодруулбал: 
             Авто зам засвар шинэчлэлтэд зориулж 100 тэрбум төгрөгийг улсын төсөвт тусгаж хамтран ажиллахыг хүслээ: Аймгийн хэмжээнд хотын доторх 130 гаруй километр авто замын 30 гаран километрт энэ онд засвар шинэчлэлт хийж байгаа. Үлдсэн 100 километр замд шинэчлэлт хийхэд 200 тэрбум төгрөг шаардлагатай гэсэн тооцоо бий. Үүнээс 2025 оны улсын төсөвт 100 тэрбум төгрөгийг тусгаж Орхон аймгийн доторх авто замын засвар шинэчлэлтэд хамтран ажиллахыг хүслээ. 

         Дархан Эрдэнэт чиглэлийн улсын чанартай авто замын эвдрэл гэмтлийг засварлана: Өнөөдрийн /2024.08.28/-ны Засгийн газрын хуралдаанаар авто замын эвдрэл гэмтлийг засварлахад шаардлагатай төсөв тусгагдсан бөгөөд энэ зардлаас Дархан Эрдэнэт чиглэлийн улсын чанартай А1001 авто замын эвдрэл гэмтлийг засварлахаар шийдвэрлэлээ. Дархан Эрдэнэт чиглэлийн улсын чанартай А1001 авто зам нь 2001 онд шинээр асфальт бетонон хучилттай хийгдэж байжээ. Авто замын эвдрэл гэмтэл жил ирэх тусам нэмэгдэж иргэдийн зорчих хөдөлгөөнд нөлөөлж буй. Иймд орон нутгийн зүгээс улсын төсөвт хөрөнгө тусгаж авто замыг засварлах саналыг гаргалаа.  
           Гурван замын постыг нүүлгэн шилжүүлэх ажлыг эхлүүлнэ: Гурван замын уулзвар дээрх төлбөр хураах цэгийг нүүлгэн шилжүүлэх асуудлыг яаралтай шийдвэрлэж өгөхийг хүслээ. Ирэх долоо хоногт “Зам тээвэр хөгжлийн төв” ТӨҮГ-ын захирал Х.Пүрэвжаргал Орхон аймагт ажиллаж, нүүлгэн шилжүүлэх байршил, үйл ажиллагааны цахимжуулалт, төлбөр хураамжийн асуудлыг шийдвэрлэхээр боллоо. Мөн нүүлгэн шилжүүлэхэд зориулж орон нутгийн төсөвт тусгасан санхүүжилтэд зам тээврийн яам дэмжлэг үзүүлж ажиллана гэв. 
Эрдэнэт хотыг тойрсон авто замын зураг төсөв ирэх онд хийнэ: Эрдэнэт хот Хойд бүсийн Хөвсгөл Булган аймгууд руу дамжин өнгөрдөг төв хэсэг. Авто машины эрчим нэмэгдэж, авто замын хөдөлгөөн ихэссэн. Мөн хүнд даацын авто машинууд ихээр зорчдогоос шалтгаалж хотын төв доторх замд эвдрэл үүсэх нэг шалтгаан болдог. Иймд  Эрдэнэт хотыг дайран өнгөрдөг авто машины урсгалыг багасгах зорилгоор  хотын гадуур тойрсон улсын чанартай авто замын зураг төсвийг хийлгэх ажлыг ирэх оны төсөвт тусгах ажээ. 
             Орхон АЗЗА ТӨХК-ийн үйл ажиллагаанд дэмжлэг үзүүлж ажиллана: 
“Орхон АЗЗА” ТӨХК нь Дархан Эрдэнэт чиглэлийн А1001 авто замын нийт 108км, Эрдэнэт Булган чиглэлийн А1002 авто замын 29,7км замын засвар арчлалтыг хариуцан ажилладаг. Авто зам засварын ажил гүйцэтгэх 14 машин механизмтай. Эдгээрийн ашиглалтын хугацаа дууссан тул эвдрэл гэмтэл их гардагаас шалтгаалан ажлын явц удаашралтай байдаг талаар танилцууллаа. Иймд парк шинэчлэлт хийх хөрөнгийн асуудлыг шийдвэрлэх, мөн бүсийн хэмжээнд Хөвсгөл, Булган аймгийн АЗЗА-ыг дэмжлэг үзүүлэн хамтран ажиллах талаар санал хүсэлтээ илэрхийллээ. 
            Улаанбаатар-Шар хөтөлийн чиглэлийн  эхний 10 км авто замын ажлыг эхлүүллээ: 
Улаанбаатар-Шар хөтөл-Эрдэнэтийн чиглэлийн 92.28 км хатуу хучилттай авто замын эхний 10 км-ыг тавиад эхэлсэн. Улаанбаатараас Эрдэнэт хүртэл нийт 380 км бөгөөд дээрх шинэ маршрутаар 100 км багасч 280 км зорчих боломжтой юм. 

Мэдээллийн төв