Сар шинийн баярыг тохиолдуулан анхааруулах ЗӨВЛӨМЖ
Үндэсний уламжлалт сар шинийн баярын үеэр төрөл бүрийн хордлого, ялангуяа хоолны хордлого, архины хордлого, гэдэсний халдварт өвчин, осол гэмтэл, осголт, хөлдөлт болон томуу, томуу төст өвчлөл нэмэгдэх хандлагатай байдаг. Тиймээс сар шинийн баярыг тохиолдуулан аймгийн Эрүүл мэндийн газар, БОЭТ-өөс нийт иргэдэд дараах сэрэмжлүүлэг, зөвлөмжийг хүргэж байна.
- Томуу, томуу төст өвчнөөс сэргийлэх, эрсдэлт бүлгийн болон бага насны хүүхэд, жирэмсэн эхчүүд хүндрэх магадлалтай тул олон айл хэсэхгүй байх.
- Архи дарс согтууруулах ундааны хэрэглээнд онцгой анхаарах, архи хэтрүүлэн хэрэглэсэн хүнийг заавал гэрт нь хүргэж өгөх.
- Гудамж талбайд ухаангүй буюу биеэ авч явах чадваргүй хүн байгаа бол яаралтай 102, 103 дугаарын утсанд мэдэгдэх.
- Хэт өндөр илчлэгтэй хоол унд нэг дор идэж уухаас татгалзах, хооллолтод онцгой анхаарах /халуун, хүйтэн хоолыг нэг дор хэрэглэхгүй байх, халуун хоолны дараа хүйтэн уух зүйлс хэрэглэхгүй байх г.м/
- Хоол идэхийн өмнө, бие зассаны дараа, олон нийтийн газраар явах, олны гар дамжсан мөнгөн тэмдэгтийг барьсны дараа гараа заавал угаах, гар угаах боломжгүй нөхцөлд цэвэрлэх, ариутгах зориулалттай санитол, нойтон сальфетикийг биедээ тогтмол авч явж хэрэглэж хэвших нь баяр наадмын үеэр ихсэх хандлагатай байдаг бохир гараар дамждаг гэдэсний халдварт өвчнөөс сэргийлэх ач холбогдолтой юм.
- Хөдөө орон нутаг руу зорчих иргэд автомашиныхаа бэлэн байдлыг хангаж, дулаан хувцаслахад анхаарахыг санууллаа.
Мэдээллийн төв
