Б.Мөнгөнзул, Ө.Батзул нарт шинэ байрных нь түлхүүрийг гардууллаа

Дэлхийн шатрын аварга Б.Мөнгөнзул, Ардын хувьсгалын түүхт 100, 101 жилийн ойн наадамд тав давж улсын начин цол хүртсэн Ө.Батзул нарын амжилтыг мялааж аймгийн удирдлагууд 1-2 өрөө байраар шагнах батламжыг өнгөрсөн онд гардуулж байв. Өнөөдөр Засаг дарга С.Батжаргал, Засаг даргын орлогч А.Түвшинжаргал нар Б.Мөнгөнзул, Ө.Батзул нарт шинэ байрных нь түлхүүрийг гардууллаа.

2022 оны арванхоёрдугаар сарын 2-ны өдөр хуралдсан аймгийн ИТХ-ын ээлжит 13 дугаар хуралдаанаар Уртын гол багт барьж буй “Орлогод нийцсэн орон сууц төсөл”-өөс дэлхийн шатрын 44 дүгээр олимпиадаас алтан медаль хүртсэн Б.Мөнгөнзулд нэг өрөө, Ардын хувьсгалын түүхт 100, 101 жилийн ойн наадамд тав давж улсын начин цол хүртсэн Ө.Батзулд хоёр өрөө байр олгохоор шийдвэрлэсэн.

Өдгөө уг 260 айлын орон сууцны эхний блокууд ашиглалтад орж, улс, тив дэлхийд эх орныхоо нэрийг гаргасан тамирчид байрныхаа түхүүрийг гардав.

Улсын начин Ө.Батзул “Үндэсний их баяр наадмаар гаргасан амжилтыг маань үнэлж аймгийн удирдлагууд хоёр өрөө байраар шагнасанд маш их баярлаж байна. Цаашид цолоо ахиулахын төлөө бэлтгэл сургуулилтаа сайн хийнэ” гэлээ.

Дэлхийн шатрын аварга Б.Мөнгөнзул мөн талархал илэрхийлэн ирэх арваннэгдүгээр сард Итали улсад болох өсвөрийн дэлхийн аварга шалгаруулах тэмцээнд амжилтай оролцож, эх орныхоо нэрийг гаргах зорилт тавин бэлтгэлээ хийж байна гэв.

Мэдээллийн төв