Нийтийн мэдээллийн ил тод байдлын тухай хууль 2022 оны тавдугаар сарын 1 -нээс хэрэгжиж эхэлсэн. Энэ хуулийн зорилго нь хуульд заасан үндэслэл, журмын дагуу иргэний мэдээлэл хайх, хүлээн авах эрхийг хангах, нийтийн мэдээллийн дэд бүтцийн эрх зүйн үндсийг тогтоох, төрийн үйл ажиллагааг цахим хэлбэрээр явуулах, нээлттэй, ил тод, шуурхай байлгах, төрийн үйл ажиллагаанд олон нийтийн хяналтыг бий болгох юм. 
Тус хуулиар...

•  тусгай зөвшөөрөл эзэмшигчийн мэдээлэл, 
•   барилга байгууламжийн улсын комиссын дүгнэлт, 
• худалдан авах ажиллагааны мэдээлэл,
• төрийн байгууллагын ажлын байрны сул орон тооны мэдээлэл зэрэг 5 төрлийн 68 мэдээлэл нээлттэй болсон. 

Хуулийн хэрэгжилтийг хангуулах үүднээс Монгол Улсын Ерөнхий сайдын 01 тоот албан даалгавар өнгөрсөн дөрөвдүгээр сард гарч, аймгуудын Засаг дарга, нийслэл дүүргүүдийн удирдлагуудад хүргүүлсэн билээ.   Уг албан даалгаврын зорилго нь Засгийн газрын 2023 оны 49 дүгээр тогтоолоор 2023-2024 оныг авлигатай тэмцэх жил болгон зарласантай холбогдуулан авлигатай тэмцэх таван үйл ажиллагааны “Шил” ажиллагааны хэрэгжилтийг эрчимжүүлэх юм. 

    https://shilen.gov.mn/ -ээс  харахад өнөөдрийн байдлаар Орхон аймаг нээлттэй мэдээллийн, ил тод байдлын үнэлгээгээр аймгуудаа тэргүүлж 96.84 хувьтай байна. Өөрөөр хэлбэл, дээрх хуулийн хэрэгжилтийг хангаж, мэдээллээ нийтэд, ил тод хүргэж байгааг харуулж буй үзүүлэлт. 

Өчигдрийн даваа гаригийн Засаг даргын шуурхай зөвлөгөөнөөр Засаг даргын орлогч А.Түвшинжаргал хэлтэс, агентлагийн удирдлагуудад нийтэд ил болгож байршуулсан мэдээллээ олон нийтэд  хүргэхэд, сурталчлахад анхаарч ажиллах үүрэг даалгаврыг өгсөн. Нууцын  зэрэгт хамаарах мэдээлэл байхгүй болохыг Засаг даргын орлогч А.Түвшинжаргал онцлон хэлсэн. 

     Тухайлбал, Орхон аймгийн Газрын харилцаа,барилга хот байгуулалтын газартай холбоотой мэдээллийг  тус байгууллагын https://erdenet.gazar.gov.mn/  сайтаас авах боломжтой юм. Тусгай зөвшөөрөл эзэмшигч ААН-үүдийн мэдээлэл, дуудлага худалдаа, газар зохион байгуулалтын төлөвлөлт, тэмдэгтийн хураамж, зохицуулалтын үйлчилгээний хэлсний хэмжээ гэхчлэн иргэн бүрт хамааралтай  бүх төрлийн мэдээллээ  байршуулжээ. 

      Хот байгуулалт, барилга захиалагчийн албаны www.erdenetbarilga.mn сайтаас аймаг, орон нутагтаа өрнөж буй бүтээн байгуулалтын бүх мэдээллийг харж болно. Дахин төлөвлөлтийн төсөл, Орлогод нийцсэн орон сууцны төсөл, Амины орон сууцны төсөл, худалдан авах үйл ажиллагаатай холбоотой мэдээлэл, барилга угсралтын засвар инженерийн шугам сүлжээ, гэрэлтүүлэг цахилгаан хангамж гэхчлэн бүх мэдээллийг авах боломжтой. Өнөөдрийн байдлаар тус байгууллага вэб хөгжүүлэлтээ хийж байна.

     Мөн орон нутагт зарлагдаж буй худалдан авах ажиллагаатай холбоотой мэдээлэл, урилга, сонгон шалгаруулалт, шалгарсан ААНБ-ын мэдээлэл, сар,улирал, жилээр гаргасан тайлан зэргийг www.umch-erdenet.mn, www.shilendans.gov.mn, www.tender.gov.mn, вэб сайтаас авч болно. 

     Аймгийн Эрүүл мэндийн газар  шинээр үйл ажиллагаа эрхлэх эмийн сан, шүдний эмнэлэг, лаборатори, төрөлжсөн мэргэжлийн эмнэлэг зэрэг 6 төрлийн тусгай зөвшөөрлийг олгодог болсон.  Тус байгууллагын https://or.mohs.gov.mn/ сайтаас тавигдах шаардлага, нөхцөл, шалгуур үзүүлэлтийн мэдээллийг авах боломжтойгоос гадна үйл ажиллагаатай холбоотой мэдээллийг авах боломжтой.

    Мөн Байгаль орчин, аялал жуулчлалын газартай холбоотой мэдээллийг www.welcome.erdenet.mn-ээс авах боломжийг бүрдүүлж, өнөөдрийн байдлаар  вэб хөгжүүлэлтийг хийж байна. 

Аймгийн ЗДТГ-ийн www.erdenet.mn албан ёсны вэб сайтаас цаг үеийн бүхий л мэдээллийг авах боломжтойгоос гадна ил тод байдал цэснээс худалдан авах ажиллагаа, хүний нөөцийн ил тод байдал, төсөв санхүүгийн ил тод байдал, тусгай зөвшөөрлүүдийн мэдээллийг авч болно. 

 Өнөөдрийн байдлаар Орхон аймаг   ил тод байдлын үнэлгээгээр улсын хэмжээнд тэргүүлж байна 
2022 оны үйл ажиллагаагаараа Орхон аймаг 21 аймгаа тэргүүлж нэгдүгээр байранд шалгарсан.  Уг шалгуур үзүүлэлтийн заримаас нь онцолбол, байгуулллагын нээлттэй байдлын үнэлгээгээр аймгийн ЗДТГ-ын үйл ажиллагааны ил тод байдлыг Нийтийн мэдээллийн ил тод байдлын тухай хуульд заасан үндсэн 5 төрлийн 46 мэдээлэл тус бүрээр  хянан үзэхэд тухайн үед  55,7 хувийн үнэлгээг авч тэргүүлсэн бол,   өнөөдрийн байдлаар энэхүү үнэлгээ өсч 96.84 хувьтайгаар аймгуудаа тэргүүлж байна.  

Мөн Сангийн яамны Төсвийн ерөнхийлөн захирагч нарын 2022 оны шилэн данс хөтлөлтийн байдалд хийсэн хяналт, шинжилгээ, үнэлгээний тайланд аймгийн Засаг даргын  эрхлэх асуудлын хүрээний 37 байгууллага дунджаар 142 удаа мэдээлэл байршуулахаас 139 мэдээлэл байршуулж ийн үнэлэгдэж, Шилэн данс хөтлөлтийн үнэлгээгээр 95,3 хувийг авсан. 

Мэдээллийн төв