Төрийн үйлчилгээг 24 цагийн турш авах боломжтой “Цахим төв” нээлтээ хийлээ
Төрийн 215 үйлчилгээг 24 цагийн турш авах боломжтой “Цахим төв”-ийг аймгийн Засаг даргын Тамгын газрын дэргэд байгуулж өнөөдөр нээлтээ хийлээ.
Монгол Улсыг 2021-2025 онд хөгжүүлэх таван жилийн үндсэн чиглэл, Монгол Улсын Засгийн газрын 2020-2024 оны үйл ажиллагааны хөтөлбөр, Орхон аймгийн Засаг даргын 2020-2024 үйл ажиллагааны хөтөлбөрт туссаны дагуу "Цахим аймаг" болох зорилтыг хэрэгжүүлэн ажиллаж байна. Иргэдэд чанартай хүртээмжтэй, хялбар цахим үйлчилгээг хүргэх, байгаль орчинд ээлтэй ухаалаг хот болох зорилгоор Орхон аймаг Эрдэнэт хот “Цахим Эрдэнэт” хөтөлбөрийг батлуулсан. Хөтөлбөрийн хүрээнд хийж буй нэгэн ажил нь энэхүү Цахим төв юм.
Иргэдэд төрийн үйлчилгээг түргэн, шуурхай чирэгдэлгүй хүргэх зорилтын хүрээнд өмнө нь ажиллаж байсан “Нэг цэгийн үйлчилгээний төв”-ийг орон нутгийн санхүүжилтээр шинэчлэн засварлаж ашиглалтад оруулав. Тус төвөөс иргэд төрийн үйлчилгээг (ТҮЦ) машинаар иргэн хуулийн этгээдийн 16 төрлийн 37 үйлчилгээ, E-Mongolia Цахим үйлчилгээний нэгдсэн ХУР-ДАН системээс иргэн, хуулийн этгээдийн 73 төрлийн үйлчилгээг, Улсын бүртгэлийн хэлтсийн киоск машинаар 9 төрлийн 72 үйлчилгээг үзүүлэх боломжтой болох юм.
Мөн ХААН банкны АТМ болон киоск машин, Төрийн банкний АТМ, Төлбөр тооцооны киоск машинаар Төрийн үйлчилгээ, үүрэн холбоо, авто тээвэр гэх мэт 5 төрлийн 33 үйлчилгээг цахимаар хүргэнэ. Орхон аймаг нь төрийн үйлчилгээг олон шат дамжлагагүй хүнд сурталгүй иргэд олон нийтэд түргэн шуурхай хүргэх чиглэлээр Баян-Өндөр, Жаргалант сумдад E-Mongolia төвийг 2021 оноос ажиллуулж эхэлсэн. Ийн орон нутгуудаас анхлан төрийн үйлчилгээний “Цахим төв”-ийг албан ёсоор нээж байна.
Мэдээллийн төв
