Аймгийн Засаг даргын өргөтгөсөн хуралдаан боллоо.  Долоо хоног бүрийн даваа гарагт хуралддаг байсан Засаг даргын шуурхай зөвлөгөөний хуваарьт өөрчлөлт орж, 14 хоногт нэг удаа өргөтгөсөн хэлбэрээр хуралддаг болж байна. 

   Засаг дарга Б.Зоригтбаяр үүнтэй холбоотойгоор хэлтэс, агентлагийн дарга нарт  өгч байгаа үүрэг даалгаврын хэрэгжилтэд гүйцэтгэл, чанарыг анхаарч ажиллахыг санууллаа. 

Өнөөдрийн өргөтгөсөн хуралдаанаар Хотын захирагчийн алба, Баян-Өндөр сумын ЗДТГ, Байгаль орчны газар, Иргэдийн санал хүсэлтийг хүлээн авах 70353511 дугаарын утсанд ирсэн долоо хоногийн мэдээлэл, өмнөх долоо хоногт өгсөн үүрэг даалгаврын хэрэгжилтийн талаар хэлэлцлээ. 

Өнгөрсөн дөрөвдүгээр сарын 21-ний өдрийн Засаг даргын шуурхай зөвлөгөөнөөс 14 үүрэг даалгавар өгөгдсөнөөс бүрэн хэрэгжсэн 4, хэрэгжиж байгаа 10 үүрэг даалгавар байна. 

ИШС тавигдсан  багуудын нэгдсэн санг үүсгэв 

Тухайлбал, “Миний гудамж - Бидний гэр” төслийн хүрээнд гэр хороололд баригдсан цэвэр, бохир усны төв шугамд айл өрхийг холбох ногоон зээлийн талаар  танилцуулах ажлын хэсэг байгуулж иргэдэд мэдээлэл өгч ажиллах. Ажлын төлөвлөгөөг гаргаж танилцуулах үүрэг даалгаврыг өгсөн. 
Төслийн хүрээнд орон нутгийн төсвийн 2.9 тэрбум төгрөгийн хөрөнгө оруулалтаар гэр хорооллын 7 багт нийт 5.78 км төвлөрсөн инженерийн шугам сүлжээний ажлыг хийсэн. Үр дүнд 1245 өрх төвлөрсөн шугамд холбогдох боломж бүрдсэн ч одоогийн байдлаар 250 айл өрх холбогдсон байна. Шугам сүлжээ тавигдсан багуудын нэгдсэн сан үүсгэх ажлыг хийж гүйцэтгэсэн. Тус санг үндэслэн шугам сүлжээнд хамрагдах боломжтой зорилтод иргэдэд мэдээлэл хүргүүлэх ажлыг багийн ажлын албаар дамжуулан хийхээр төлөвлөж байна.Мөн  цэвэр, бохир усны төв шугамд айл өрхийг холбох ногоон зээлийн талаар танилцуулах ажлыг чиг үүргийг “Цэвэр агаартай хот” ажлын хэсэгт хамтруулан гүйцэтгэхээр болсон гэсэн үүрэг даалгаврыг  ЗДТГ-ын ХОХБТХ-ээс ирүүлжээ.  

Цахилгааны болон кабелийн утсыг цэгцэлж эхэллээ 

Хотын хэмжээнд газар доогуур болон агаараар явж буй кабель, цахилгааны шонгийн  утсанд үзлэг шалгалт хийж аюулгүй байдлыг хангах чиглэлээр өгсөн үүрэг даалгаврыг өгсөн. 
Дөрөвдүгээр сарын 21-нд “Мэдээлэл холбооны сүлжээ” ТӨХК, “Мэдээлэл шуурхай” удирдлагын төв, “Мобиком” ХХК хамтран Цагаанчулуут багийн 1-10 дугаар гудамж, хорооллын эцсийн буудлаас “Жаст ойл” ШТС-ын хоорондох 2 хазайсан багана тэгшилж, 1 баганад нэмэлтээр татуурга хийн, 495 метр агаарын шугам буюу нийт 2970 метр шилэн кабелийг чангалж, ашиглагдахгүй байгаа 1 шилэн кабелийг буулгажээ. 

Мөн “Эрдэнэт Ус ДТС” ОНӨХК гэрэлтүүлгийн засвар үйлчилгээг төлөвлөгөөний дагуу Согоот, Зэст, Оюут, Уурхайчин багуудын 50 байршилд хийж, гэрэлтүүлгийн ил задгай 100 метр кабелийг далдалж, 48 гэрэлтүүлгийн шонг татуулсан байна. 

                              Говил багийн 48 дугаар байр, 27-р цэцэрлэгээс 16-р сургуулийн тойрог хүртэлх авто замын ажил эхэллээ 

Авто зам засварын ажлыг эрт эхлүүлэх, хугацаандаа дуусгах чиглэлд онцгой анхаарч ажиллах үүрэг даалгаврын хэрэгжилтэд   авто зам засварын ажлыг эрт эхлүүлэх, хугацаандаа дуусгах чиглэлд онцгой анхааран ажиллаж байна. Үүнд, “Энх-Алтаргана” ХХК нь ажил эхлүүлэх зөвшөөрлөө сунгуулж, Говил багийн 48 дугаар байрны авто замын ажил, 27-р цэцэрлэгээс 16-р сургуулийн тойрог хүртэлх авто замын ажлыг эхлүүлээд байна. 
Улсын чанартай А1002 авто замын өргөтгөл шинэчлэлтийн ажлын гүйцэтгэгчээр ажиллаж байгаа "Шилдэг Зам" ХХК, "Жавхлан харгуй" ХХК, "Ингүүмэл зам" ХХК-иуд ажил эхлүүлэх зөвшөөрөл авах хүсэлтээ ирүүлж, “Жавхлан харгуй" ХХК, "Ингүүмэл зам" ХХК-иуд зөвшөөрлөө аваад байна. 

2А хорооллын авто замын ажлын гүйцэтгэгчээр ажиллах “Хүчит зам” ХХК нь Улаанбаатар хотоос техник тоног төхөөрөмж, ажилчдын байрлах байр зэргийг  байрлуулсан байна. 
Мөн 2025 оны 04 дүгээр сарын 30-ны өдөр Эрдэнэт үйлдвэр ТӨҮГ-ын Геологи хайгуулын цехтэй хамтран карьерын солбилцлын цэгийг тогтоон АҮЭБЯ-д хүргүүлсэн гэх хэрэгжилтийг аймгийн ЗДТГ-ын ХБТХОХ-ээс ирүүлжээ. 

Аймгийн Засаг даргын шуурхай хурал 2025 оны 01 дүгээр сарын 02-ны өдрөөс 2025 оны 04 дүгээр сарын 18-ны өдрүүдэд үүрэг даалгавар өгөгдсөн үед “Хэрэгжиж байгаа” төлөвтэй байсан 30 үүрэг даалгаврын биелэлтийг холбогдох байгууллагуудаас дөрөвдүгээр сарын 25-ны байдлаар дахин шинэчлэн авахад долоон үүрэг даалгаврын хэрэгжилт  “Бүрэн хэрэгжсэн” байна.

Мэдээллийн төв