“Эх орны төлөө” хүндэтгэлийн үйл ажиллагаа боллоо

"Монгол цэргийн өдөр" Монгол Улсад орчин цагийн Зэвсэгт хүчин үүсэн байгуулагдсаны 102 жилийн ойн баярт зориулсан “Эх орны төлөө” хүндэтгэлийн үйл ажиллагаа өнөөдөр Уурхайчин соёлын ордонд боллоо.
Аймгийн Засаг даргын Тамгын газар, ЗДТГ-ын Цэргийн штаб хамтран зохион байгуулсан уг үйл ажиллагааны хүндэт зочдоор УИХ-ын гишүүн Д.Батлут, аймгийн Иргэдийн Төлөөлөгчдийн Хурлын дарга Д.Мөнхбат, Засаг дарга С.Батжаргал, Засаг даргын орлогч А.Түвшинжаргал нар уригдан оролцлоо.

Тус арга хэмжээний үеэр Орхон аймагт төрийн цэргийн болон хууль сахиулах байгууллагын дарга нар, бэлтгэл болон чөлөөнд байгаа хурандаа нарт аймаг орон нутгийн зүгээс хүндэтгэл үзүүллээ. Манай аймагт Зэвсэгт хүчний 186-р ангийн захирагч асан Д.Рэнцэннацаг, Д.Гомбо, аймгийн ЗДТГ-ын Цэргийн штабын даргаар ажиллаж байсан Г.Батсуурь зэрэг нийт 40 гаруй хурандаа нар ажиллаж, амьдарч байна.
Эрхэлсэн ажил, салбартаа үр бүтээлтэй ажиллаж, онцгой амжилт гарган, орон нутгийнхаа хөгжил дэвшилд үнэтэй хувь нэмэр оруулж буй Батлан хамгаалах болон Хууль, эрх зүйн салбарын ахмадууд, одоо ажиллаж буй албан хаагчдын төлөөлөлд төрийн дээд одон медаль болон аймаг орон нутгийн шагнал гардууллаа.
Мөн Орхон аймгийн ерөнхий боловсролын сургуулийн 18 нас хүрсэн залууст цэргийн үүрэгтний үнэмлэх гардуулан өглөө. Монгол Улсын Үндсэн хуульд эх орноо хамгаалах, хуулийн дагуу цэргийн алба хаах гэсэн байдаг. Үндсэн хуулиа дээдлэн иргэний үүргээ биелүүлэн эх орныхоо халдашгүй дархан байдлыг сахин хамгаалах их үйлсэд гар бие оролцохыг залууст уриалсан энэхүү арга хэмжээнд залуусын төлөөлөл болсон 50 гаруй сурагч оролцлоо. Цэргийн үүрэгтний үнэмлэх гардан авснаар эх орон, ард түмнийхээ өмнө хариуцлагатай, үүрэг хүлээсэн иргэн болж байна хэмээн залуус ярьж байлаа.

Орхон аймгийн Зэвсэгт хүчний 186,110 дугаар ангид хугацаат цэргийн алба хааж буй 80 гаруй төлөөлөл энэ өдөр гэр бүл, хайртай хүмүүстэйгээ уулзаж баяраа тэмдэглэлээ. Алба хааж буй хүүтэйгээ уулзахаар Сэлэнгэ, Булган аймгаас зорин ирсэн ээжүүд баярын энэ өдрийн бас нэгэн өнгө болж байлаа.
Орхон аймаг Эрдэнэт хотын ард иргэд, эх орныхоо тусгаар тогтнолыг батлан хамгаалах төрийн нэр хүндтэй, хариуцлагатай үүргийг билелүүлэх, улс орны томоохон бүтээн байгуулалтад оролцох, батлан хамгаалах бодлого, хууль тогтоомжийн биелэлтийг нэр төртэйгээр гүйцэтгэн ажиллаж байгаа Зэвсэгт хүчний дайчид, цэргийн багийн бие бүрэлдэхүүн, хууль сахиулах байгууллагын хамт олонд ажлын амжилт хүссэнээр баярын үйл ажиллагаа өндөрлөлөө.