Ирэх сарын нэгнээс хотын доторх нийтийн тээврээр үйлчлүүлэхдээ төлбөрийн цахим карт ашиглана

Орхон аймаг Эрдэнэт хот нийтийн тээврийн үйлчилгээг цахимжуулах зорилгоор “EPASS” төслийг үндэсний тэргүүлэгч электроникийн компани болох “СИМ” ХХК-тай хамтран хэрэгжүүлж байгаа билээ.
Тэгвэл ирэх 2-р сарын 1-ний өдрөөс эхлэн хотын доторх нийтийн тээврээр үйлчлүүлэхдээ төлбөрийн цахим карт ашиглах нөхцлийг бүрдүүлээд байна. EPASS цахим төлбөрийн карт нь хүүхэд, оюутан залуус, Хөнгөлөлттэй зорчигч буюу- хөгжлийн бэрхшээлтэй, ахмад настан гэсэн дөрвөн төрөлтэй. “Хөнгөлөлттэй зорчигч” картаар оюутан, цагдаа, өндөр настан, хөгжлийн бэрхшээлтэй иргэд зорчих боломжтой бол “хүүхдийн картыг” 6-12 насны хүүхдүүд ашиглах боломжтой. Харин 12-оос дээш насны хүүхдүүд энгийн картаар зорчих юм.
Картыг Согоот баг, 6-р микрийн нэг дүгээр байрны дэргэдэх автобусны буудал дээр байрлах картын төвд худалдаалж байна. Мөн насанд хүрэгчдын хувьд автобусны буудлууд дээр байрлах зарлан мэдээллэх самбарын QR код бүхий хэсгийг уншуулж бүх төрлийн интернет банкны апликейшн ашиглан гүйлгээ хийж автомат машинаас авах боломжтой. Түүнчлэн ахмад настан, хөгжлийн бэрхшээлтэй иргэд харьяа багийнхаа халамжийн мэргэжилтэнд хандан картаа авах юм.
Картын үнийн хувьд энгийн карт 5000 төгрөг, хүүхдийн карт 4000 төгрөгөөр худалдаалагдах бөгөөд ахмадын болон хөнгөлөлттэй карт эхний удаа үнэ төлбөргүй тараагдана. Хаяж гээгдүүлсэн тохиолдолд 3000 төгрөгөөр дахин авах ажээ.
Картаа цэнэглэхдээ Согоот баг 6-р микрийн 1-р байрны дэргэдэх автобусны буудалд байрлах “КАРТЫН ТӨВ”-д хандахаас гадна бүх төрлийн интернет банкны аппликейшн ашиглан картны ард байрших QR кодыг уншуулан дурын мөнгөн дүнгээр цэнэглэлт хийнэ.

Мэдээллийн төв