“Цусны даралт ихсэлтийн эсрэг аян”-ы баг хамт олон ирэх сарын 1,2-ны өдрүүдэд Орхон аймагт ажиллаж, үнэ төлбөргүй үзлэг оношилгоо хийнэ
Халдварт бус өвчний өвчлөл, нас баралтын тэргүүлэх таван шалтгааны нэг болсон зүрх судасны өвчнөөс урьдчилан сэргийлэх, хүн амын дунд эрүүл зөв дадал төлөвшүүлэх, эрт илрүүлэх үзлэг, оношилгоонд хамруулах, мэдлэг мэдээлэл олгох зорилгоор П.Н.Шастины нэрэмжит Улсын гуравдугаар төв эмнэлгийн санаачилга, ХААН Банк Сангийн санхүүжилт дэмжлэгтэйгээр Нийгмийн эрүүл мэндийн үндэсний төв хамтран “Цусны даралт ихсэлтийн эсрэг аян”-ыг энэ жил тав дахь жилдээ зохион байгуулж байна.
Энэ жил тус аян Өмнөговь, Дорноговь, Сэлэнгэ, Орхон аймагт өрнөж байгаа бөгөөд ирэх сарын 1,2-ны өдрүүдэд Орхон аймагийн БОЭТ-д тус аяны баг бүрэлдэхүүн ажиллаж иргэдэд үнэ төлбөргүй үзлэг оношилгоог хийх юм.
2021 онд 10 000 хүн амд зүрх судасны өвчлөл 936 болж ихэссэн нь сүүлийн арван жилийн дунджаас 128-аар илүү байна гэх судалгааг гарчээ.
Дэлхийн төвшинд Монгол Улс зүрх судасны өвчлөлийн нас баралтаар тэргүүлж буй 3 улсын нэг болсон. Цусны даралт ихсэлт залуужсаар байгаа нь эмч, эмнэлгийн мэргэжилтнүүдийн санааг зовоож, анхаарал хандуулах шаардлагатай асуудал хэвээр байсаар байгаа тул энэхүү аюулт өвчинтэй тэмцэхээр нийгмийн хариуцлагын хүрээнд дээрх байгуллагууд хамтран тус аяныг 2017 оноос эхлүүлсэн.
Тус аяны энэ жил эрт илрүүлгийн үзлэгтэй холбогдон ажиллаж байгаагаараа онцлог юм. Үзлэгээр илэрсэн цусны даралт ихсэх өвчтэй шинэ тохиолдлуудад тархины харвалт, зүрхний шигдээсийн эрсдэлийн үнэлгээ хийж, төрөлжсөн нарийн мэргэжлийн эмчийн үзлэг, оношилгоонд хамруулж цаашид хяналтанд авах зэрэг арга хэмжээг авч ажиллах ажээ.
Энэ жил аяны багийн бүрэлдэхүүнийг зүрх судас, мэдрэл, бөөрний төрөлжсөн мэргэжлийн эмч нараар өргөтгөсөн байна.
Мөн орон нутгийн эмч нартай хамтран ажиллаж, ажлын байран дээр нь чадавхжуулах сургалт зохион байгуулах, зөвлөгөө өгөх, үзлэг оношилгоо хийх чиглэлд хамтран ажиллаж мэргэжил арга зүйн дэмжлэг үзүүлэх юм байна. Мөн иргэд рүү чиглэсэн “Эрт илрүүлэхэд иргэн Таны оролцоо чухал” гэсэн соён гэгээрүүлэх ажилд анхаарч ажиллахаар бэлтгэл ажлаа хангаж байна.
Мэдээллийн төв
.jpg)
