Эрин зууны бахархал Эрдэнэт 50 жил, Орхон аймгийн баяр наадам зохион байгуулах хорооноос баяр наадмын зохион байгуулалт, бэлтгэл ажлын талаар мэдээлэл өглөө.  Хэвлэлийн хуралд баяр наадам зохион байгуулах хороон дарга Б.Оюун-Эрдэнэ тэргүүтэй 12 салбар комиссын дарга нар оролцлоо. 

Баяр наадмын нээлтийг “Хот үүссэн түүх”, “Бүтээн байгуулалт”, “Эвтэй найрсаг Эрдэнэтчүүд”, “Шинэ цагийн Эрдэнэт” хот гэсэн 5 агуулгын хүрээнд өнгөрсөн, одоо, ирээдүйн Эрдэнэт хот гэсэн гурван  цаг үеийг илэрхийлэн  найруулж байна. 

Эрин зууны бахархал Эрдэнэт 50 жилийн ойн баяр наадам 22-ноос эхэлж буй. Тодруулбал, 50 жилийн ойд зориулан бүтээсэн “Эрин зууны бахархал Эрдэнэт 50” хоёр боть ном, Баримтат кино, Эрдэнэтийн Урчуудын эвлэлийн уран бүтээлчдийн хамтран бүтээсэн “Эрин зууны бахархал Эрдэнэт” сэдэвт уран зураг, Монгол Улсын Ардын жүжигчин, гавьяатуулын дуулсан Эрдэнэтийн тухай 12 дуун суваргаар бүтээсэн пянз, Эрдэнэтийн төв цэгийн нээлтийн үйл ажиллагаа 22-ны 18:00 цагт А.Амарын талбайд болно.  Эдгээр  нь Эрдэнэт хотын 50 жилийн  хөгжил дэвшил, бүтээн байгуулалтын түүх, иргэд хөдөлмөрчид, уурхайчдын алдар гавьяаг мөнхжүүлсэн,  үеийн үед өв болон үлдэх бүтээл юм. 

50 ЖИЛИЙН ОЙН АРГА ХЭМЖЭЭ  23-НЫ ШӨНИЙН НЭЭЛТЭЭР ЭХЭЛНЭ 

50 жилийн ойн баяр наадмын  онцлог нээлтийн арга хэмжээг  өдөр болон орой хоёр удаа хийхээр төлөвлөж байна. Тодруулбал, Эрин зууны бахархал Эрдэнэт 50 жилийн ойн баярын арга хэмжээ  долоодугаар сарын 23-ны 21 цаг 21 минутад эхлэх баярын шөнийн нээлтээр эхэлнэ.  Долоодугаар сарын 24-ны 11:00 цагт Цэнгэлдэх хүрээлэнд 50 жилийн ойн нээлтийн арга хэмжээ, 24-ний 21:00 цагт Цэнгэлдэх хүрээлэнд үдшийн шоу,  долоодугаар сарын 25-нд А.Амарын талбайд "ALL STAR" үдшийн цэнгүүн, шоу арга хэмжээ болно. Үндсэндээ 23-25-ныг хүртэл гурван өдрийн турш оройн шоу, үдшийн цэнгүүн болно. 

50 ЖИЛИЙН ОЙН ТҮРҮҮ БӨХИЙГ  АВТО МАШИНААР, ҮЗҮҮРЛЭСЭН БӨХИЙГ БАЙРААР БАЙЛНА

Ойн баяр наадмын морь, бөх, сур, шагайн харвааны бай шагналыг төр, спортын мэргэжлийн холбоод, 50 жилийн ойд хандив өргөж буй томоохон аж ахуйн нэгжүүдийн дэмжлэгтэйгээр хамтран олгоно.  Тухайлбал, уламжлалт зургаан насны түрүү морьдын шагналыг “Очир” төв, Моннис групп, Орхон аймгийн уяачдын холбоод хамтран авто машинаар байлна. Түрүү болон үзүүрлэсэн бөхийн бай шагналыг “Баянмараат” ХХК, Эрдэнэт хотын унаган залуусын төлөөлөл олгох бөгөөд түрүү бөх авто машин, үзүүрлэсэн бөхийг байраар байлна.  Мөн “Апейро энержи” ХХК-тай хамтран сур, шагайн харвааны түрүүг шагнаж урамшуулах юм. 

ХУРДАН МОРИНЫ УРАЛДААНЫ ЗАМЫН БЭЛТГЭЛ БҮРЭН ХАНГАГДЛАА

Засгийн газрын тогтоолоор Эрдэнэт хот үүсэн байгуулагдсаны түүхт 50 жилийн ойн баяр наадмыг “Хангайн бүсийн хурд”  хурдан морины уралдаантай хамтатган энэ сарын 23-25-нд зохион байгуулахаар шийдвэрлэсэн. Хурдан морины уралдаан зохион байгуулах салбар комиссоос хурдан морины уралдааны зам болон барианы газрын бэлтгэлийг бүрэн хангаж дууссан гэж мэдээллээ. Өнгөрсөн сараас эхлэн “Эрдэнэт үйлдвэр”ТӨҮГ-ийн Ил уурхайн Засвар механикийн заводтой хамтран уралдааны замыг засварлах ажлыг эхлүүлсэн. Мөн иргэдийн суух саравч, сүүдрэвчийг байршуулан тохижуулаал байна. Үндэсний их баяр наадмын тухай хуулийн дагуу хурдан морины бүртгэлийг наадам эхлэхээс хоёр өдрийн өмнө буюу 2026 оны долоодугаар сарын 20, 21-ний өдрүүдэд 09:00 цагаас  Хүүхэд, гэр бүлийн, хөгжил хамгааллын байранд зохион байгуулна.

БАЯР НААДМЫН ӨДРҮҮДЭД КУВЕЙТЫН ТОЙРГИЙН УУЛЗВАРААС УУРХАЙЧИН ТОЙРГИЙН УУЛЗВАР ХҮРТЭЛ ЗАМ ХААНА

Замын хөдөлгөөний ачаалал, зогсоолын хүртээмжийн мэдээллийг Е24 аппликейшнаар харах боломжтой.  Цэнгэлдэх хүрээлэн орчимд 1300 машины түр зогсоол, 181 машины үндсэн зогсоол нээлттэй.  Хотын төвийн 24 байршилд зогсоол нээлттэй. Дамжин өнгөрөх жолооч нарт зориулан зорчих замын зураглал бүхий гарын авлага тараана.  Иргэд, олон нийтийг баярын өдрүүдэд автомашинаас татгалзахыг уриалж байна

ОТОГЛОХ ЦЭГТ НЭГ УДААД 500 ХҮН БАЙРЛАХ БОЛОМЖТОЙ

Баян-Өндөр сумын ЗДТГ-аас “Эрдэнэт асар” ХХК-тай хамтран Эрдэнэт хотын 50 жилийн ойг зорин ирэх наадамчин олон, дамжин өнгөрөх иргэдэд зориулан “Эрдэнэтийн дулааны цахилгаан станц” ТӨХК-ийн урд талбайд 10 га талбайд  отоглох цэг байгууллаа. 40 гэр амралт, 50 майхан барих талбай, худалдаа, үйлчилгээний асар, ариун цэврийн байгууламж, авто машины зогсоол, цахилгаан хангамжийг цогцоор шийднэ. Нэг удаад 500 хүн байрлах боломжтой. Нийт 35 худалдаа, үйлчилгээний цэг, Эрдэнэтэд үйлдвэрлэсэн бараа бүтээгдэхүүний үзэсгэлэн худалдаан гаргахаар төлөвлөж байна. 

БАЯР НААДМЫН НЭЭЛТИЙГ ИРГЭДЭД  ХҮРТЭЭМЖТЭЙ ХҮРГЭХЭД АНХААРЧ БАЙНА 

50 жилийн ойн баяр наадмын нээлт 2 цаг үргэлжилнэ. Цэнгэлдэх хүрэээлэн 6000 гаруй хүний суудалтай. Наадамчин олон Цэнгэлдэхэд багтахгүй учир  нээлтийн арга хэмжээг хүртээмжтэй хүргэхэд анхаарч  байна. Баяр наадмын нээлтийг Монголын үндэсний телевиз болон NTV орон даяар шууд дамжуулна. Цэнгэлдэх хүрээлэнгийн гаднах 300 хүний багтаамжтай асар, Соёлын хотхон,  Морь барианы газар, Отоглох цэгт байршуулах  лед дэлгэцээр шууд дамжуулалтыг түгээнэ. Мөн худалдаа, үйлчилгээ эрхлэгчдийн цэгт байршуулах хоёр дэлгэцээр шууд дамжуулж, баяр наадмын нээлтийг нэгэн зэрэг шууд үзэх боломжийг бүрдүүлэхээр төлөвлөж байна. 

ХАМТЫН АЖИЛЛАГААТАЙ УЛС, ХОТУУДЫН 46 ЗОЧИД ТӨЛӨӨЛӨГЧ ХҮРЭЛЦЭН ИРНЭ 

Эрдэнэт хотын 50 жилийн ойн баяр наадамд хамтын ажиллагаатай хот, улс болон олон улсын байгууллагуудад албан ёсны урилга хүргүүлээд байна. Баяр наадмын өдрүүдэд ОХУ, БНХАУ, Япон, БНСУ, Монгол дахь НҮБ-ын Хүүхдийн сан болон хамтын ажиллагаатай олон улсын байгууллагын  46 гадаадын төлөөлөгч Орхон аймагт хүрэлцэн ирнэ. Ёслол, хүндэтгэлийн ажлын хэсэг гадаадын зочид, төлөөлөгчдийг угтан авах, байрлуулах, баяр наадмын үйл ажиллагаанд оролцох бэлтгэл хангаж байна. Тус ажлын хэсэгт  80 гаруй төрийн албан хаагч ажиллаж байгаа бөгөөд үндсэн ажлын хэсгээс гадна долоон дэд ажлын хэсэг байгуулагдан, зохион байгуулалтад ажиллаж байна. 

БАЯР НААДМЫН ӨДРҮҮДЭД 500 ОРЧИМ ХУДАЛДАА ҮЙЛЧИЛГЭЭНИЙ ЦЭГ АЖИЛЛАНА 

Энэ жилийн баяр наадмаар өнгөрсөн жилүүдээс хоёр дахин их буюу 500 орчим  хоол үйлдвэрлэл, худалдаа үйлчилгээний цэг ажиллана. Тухайлбал, хүнсний чиглэлээр 120,  хоолны үйлдвэрлэлийн чиглэлээр 250 иргэн, аж аухйн нэгж үйл ажиллагаа эрхэлнэ. Авто заам хааж буйтай холбоотой Цэнгэлдэхийн арын 2 зогсоол, Хангайн бүсийн худалдааны төвийн авто зогсоолд худалдаа үйлчилгээний цэг төвлөрнө. Тоосгүй орчинд үйл ажиллагаа эрхлэхэд нь анхаарч энэхүү зохион байгуулалтыг хийж байна.  Үйлчилгээ эрхлэгчдэд 7 дугаар сарын 5-нд галын аюулгүй байдал, хүнсний эрүүл ахуйн чиглэлээр зөвлөмж, мэдээлэл өгсөн. Баяр наадмын өдрүүдэд  улсын 10  байцаагч ажиллана. 

ЦОЛ ОЛГОХ 256 БӨХИЙН БАРИЛДААН 10-НД БОЛНО

Үндэсний бөхийн салбар комиссын мэдээлснээр бөхийн барилдааныг 2 үе шаттай зохион байгуулахаар төлөвлөжээ. Орхон аймгийн цол олгох бөхийн барилдааныг энэ сарын 10-ны өдөр Отоглох цэгт зохион байгуулна. Бүртгэл  маргааш буюу 9-ны 09:00-17:00 цагийн хооронд аймгийн БТСГ-ын А зааланд болно. Эрдэнэт хотын 50 жилийн ойн улс аймгийн цолтой 256 бөхийн барилдааны бүртгэл  7 дугаар сарын 21-ны өдөр БТСГ-ын А зааланд 09:00-17:00 цагийн хооронд бүртгэнэ.  Мөн баярын өдрүүдэд  цол олгох өсвөрийн 64 бөхийн барилдаан болно. 

БАЯР НААДМЫН ӨДРҮҮДЭД 150 САЙН ДУРЫН АЖИЛТАН АЖИЛЛАНА 

Баяр наадмын үеэр ажиллахаар сайн дурын 150 ажилтан бүртгүүлжээ. Сайн дурын ажилтнууд баяр наадмын үеэр гадна, дотнын  иргэд, зочид төлөөлөгчдөд зөвлөгөө мэдээлэл өгөх,  хүүхэд хамгаалал, эх хүүхдэд туслах зэрэг үйлчилгээ үзүүлж, баяр наадмын зохион байгуулалтын үйл ажиллагаанд дэмжлэг үзүүлэх юм. Сайн дурын ажилд оролцсоноор нийгмийн хариуцлага, хамтын ажиллагаа, манлайлах ур чадвараа хөгжүүлэхийн зэрэгцээ бусдад туслах, олон нийтийн арга хэмжээнд зөв зохион байгуулалттай ажиллах үнэ цэнтэй туршлага хуримтлуулах боломжтой юм.

ОРОН НУТГИЙН ААН-ҮҮДЭЭ ДЭМЖИН ХАМТРАН АЖИЛЛАЖ  БАЙНА 

Эрдэнэт хотын 50 жилийн ойн хүрээнд хэрэгжүүлж буй хөрөнгө оруулалт, бүтээн байгуулалт, ажил үйлчилгээ, бэлэг дурсгалын үйлдвэрлэл зэрэг бүхий л үйл ажиллагаанд орон нутгийн үйлдвэрлэгчдийг дэмжин хамтран ажиллаж байна. Тухайлбал, зэс, төмөр, модон урлалын бүтээгдэхүүн үйлдвэрлэгч гар урлаачид, жижиг, дунд үйлдвэрлэл эрхлэгчид, оёдлын салбарынхан, хулдаасан хэвлэл, хэвлэл мэдээллийн байгууллагууд болон Эрдэнэт хотын томоохон аж ахуйн нэгжүүдийг ойн арга хэмжээний бэлтгэл, зохион байгуулалтад өргөнөөр оролцуулж байна. Ингэснээр 50 жилийн ойн бүтээн байгуулалт, үйлчилгээний ажлаар дамжуулан орон нутгийн үйлдвэрлэгч, ААН-үүдийг  бодитоор дэмжиж, тэдний бүтээгдэхүүн, үйлчилгээг олон нийтэд сурталчилж байна. 

ТҮЛХҮҮР МЭДЭЭ 

• Баяр наадмын нээлт, хаалтын хүндэтгэлийн арга хэмжээний ерөнхий найруулагчаар Эрдэнэт унаган залуусын нэг, Сүнс хамтлагийн уран бүтээлч Б.Лхагвасүрэн, зөвлөх найруулагчаар Монгол Улсын Урлагийн гавьяат зүтгэлтэн Д.Баярбаатар нар ажиллаж байна. 
•   Баяр наадмын өдрүүдэд А.Амарын талбай болон Хүлэг худалдааны төвөөс хоёр автобус иргэдэд үнэ төлбөргүй үйлчилнэ. 
•   Баяр наадмын өдрүүдэд наадамчин олон, зочдод зориулан Цэнгэлдэх хүрээлэнд Эх, хүүхдийн асар болон Эрүүл мэндийн үйлчилгээний асар ажиллаж, шаардлагатай зөвлөгөө, үйлчилгээ үзүүлнэ. 
• Цэнгэлдэх хүрээлэн орчимд 2000 орчим авто машины зогсоолын зохион байгуулалт хийж байна.
•   Баяр наадмын үеэр аймгийн Музей, Эрдэнэт үйлдвэрийн ТӨҮГ-ын музей 9-24 цаг хүртэл иргэдэд үйлчилнэ.
•  . Баяр наадмын нээлтийн үйл ажиллагаанд 700 уран бүтээлч оролцохоор бэлтгэлээ хангаж байна
•    Цэнгэлдэхэд 100 гаруй ариун цэврийн  байгууламж байрлуулж, цэвэрлэгээ үйлчилгээг Хот тохижуулах газар хариуцна. 
• Хотын ногоон байгууламжийг нэмэгдүүлж 10 байршилд нарс, гацуур, шинэс, агч мод тарьж байна. 
•    Хурдан морь унаач хүүхдийн аюулгүй байдалд онцгой анхаарч, унаач хүүхдийн гутлын стандарт шаардлагыг өндөр түвшинд тавина.
•     Баяр наадмын хаалтын шоуг  Гурван Бүдүүн хамтлагийн дуучин Учка, Outlaw хамтлагийн дуучин Ариун-Эрдэнэ, Б.Болд нар хамтран зохион байгуулж байна. 
•  E24 аппликейшнийг гар утсандаа суулгаснаар Эрдэнэт хот, баяр наадамтай холбоотой бүх төрлийн мэдээллийг авах боломжтой. 
• Унаач хүүхдийн бүртгэл 2026 оны 7 дугаар сарын 20-ны өдрийн 09:00 цагаас 2026 оны 7 дугаар сарын 21-ний өдрийн 00:00 цаг хүртэл Хүүхдийн ордонд явагдана.
•   Баяр наадмын өдрүүдэд хүүхдийн эрх, аюулгүй байдлыг хангах зорилгоор Хүүхэд, гэр бүлийн хөгжил, хамгааллын газраас 33 хүний бүрэлдэхүүнтэй Хүүхэд хамгааллын баг хүүхэд хамгааллын чиглэлээр үйлчилгээ үзүүлж, хяналт тавьж ажиллана. 

Мэдээллийн төв