Яргуйт багийн байр, 28-р цэцэрлэгийн барилгын дулааныг 4 төрлийн сэргээгдэх эрчим хүчээр шийдлээ
Яргуйт багийн байр, 28-р цэцэрлэгийн барилгын дулаан хангамжид хүлэмжийн хийн ялгарал багатай, халаалтын технологи нэвтрүүлэх төсөл амжилттай хэрэгжлээ.
Аймгийн ЗДТГ, НҮБ-ын Хүүхдийн сангийн хамтран хэрэгжүүлсэн уг төслөөр 4 төрлийн сэргээгдэх эрчим хүчний эх үүсвэрээр барилгын дулааныг шийдсэнээрээ онцлогтой.
Үүнд,
- Газрын гүнийн хөрс, ус дулааны насос,
- Агаар, ус дулааны насос
- Нарны вакум коллектор
- Нарны цахилгаан үүсгүүр нэвтрүүлэв.
Тухайлбал, багийн байрны дээврийн зайг ашиглан 29ш нарны вакум коллектор суурилуулснаар барилгын дулаан болон хэрэглээний халуун усыг хангаж байна.
Мөн 20кВт-ын нарны цахилгаан үүсгүүр бүхий авто машины зогсоол байгуулж, бусад технологиудын цахилгаан эрчим хүчний хэрэглээнд ашиглаж байна. Энэхүү технологийн шинэчлэлийн үр дүнд 1 жилд хэрэглэх 300тн нүүрсний хэрэглээнээс татгалзаж, хүлэмжийн хийн ялгарлыг 417,5 тнн-оор бууруулна.
Багийн иргэдийн эрүүл мэнд, амьдралын чанарт эерэг нөлөө үзүүлэх төслийн үр өгөөжийг 28-р цэцэрлэгийн 188 хүүхэд, 37 багш ажилчид, Яргуйт багийн 3000 гаруй иргэд, нийт Орхончууд хүртэж эхэллээ.
Мэдээллийн төв
