УИХ-ын дарга Н.Учрал Орхон аймагт ажиллалаа

УИХ-ын дарга Н.Учрал өнөөдөр Орхон аймагт ажиллаж, иргэдтэй уулзлаа. Уулзалтаар "Эрх чөлөөний дөрвөн зам-дөрвөн чөлөөлөлт", “Чөлөөлье” бодлогоо танилцууллаа.
"Эрх чөлөөний дөрвөн зам-дөрвөн чөлөөлөлт нь эдийн засаг, эрх зүй, ногоон хөгжил, авлигын эсрэг чөлөөлөлтийн бодлого юм.
Тухайлбал, нэг дэх зам эдийн засгийн чөлөөлөлтийн бодлогын хүрээнд Иргэдийг үнийн өсөлтөөс хамгаалах арга хэмжээний тухай УИХ-ын тогтоол батлагдсан. Уг тогтоолын хүрээнд 16 арга хэмжээг хэрэгжүүлэхээр тусгажээ.

Засгийн газар төсвийг хэт тэлэх, эхэлтийн гаралтай инфляц үүсэхээс сэргийлэх, өргөн хэрэглээний бараа бүтээгдэхүүний үнийн өсөлтөөс сэргийлэх цогц арга хэмжээг авч хэрэгжүүлнэ.
Мөн гадаадын банкуудын салбарыг хуулийн дагуу дотоодын зах зээлд нэвтрүүлэх, Санхүүгийн зоохицуулах хороонд хуульд заагаагүй зөвшөөрөл, зөвшөөрөлтэй төстэй хүнд суртлыг бий болгосон зохицуулалтыг хүчингүй болгох гэх мэтчилэн бий.

Түүнчлэн нийгмийн даатгал, татварын тогтолцооны шинэчлэл хийхээр төлөвлөжээ. Татварын тогтолцооны шинэчлэлийн хүрээнд нийслэлээс орон нутагт шилжин суух иргэдэд 15 сая төгрөг хүртэлх татварын хөнгөлөлт үзүүлэх, хөдөлмөр эрхэлж буй бүх иргэдийн орлогын тодорхой хэмжээг ХХОАТ-аас хөнгөлөх гэх мэт байна. Үр дүнд, аж, ахуйн нэгжүүдийн татварын ачаалал 2,7 орчим их наяд төгрөгөөр буурна гэж үзжээ.

“Чөлөөлье” санаачилга нь Монгол Улсын Үндсэн хуульд заасан иргэний 59 эрх, эдийн засгийн 24 эрх, улс төрийн 14 эрхийг хангахын төлөөх эрх зүйн эрүүл орчныг бүтээх төлөвлөгөө гэдгийг УИХ-ын дарга Н.Учрал уулзалтын үеэр онцоллоо.

Мэдээллийн төв