Аймгийн Хүүхдийн төлөө зөвлөл хуралдлаа
Аймгийн Засаг дарга, Хүүхдийн төлөө зөвлөлийн тэргүүн Б.Зоригтбаяраар ахлуулсан "ХҮҮХДИЙН ТӨЛӨӨ ЗӨВЛӨЛ" энэ оны анхны хурлаа хийлээ. Хурлаар 2025 онд хийсэн ажлын тайлан, энэ онд хийж хэрэгжүүлэх ажлын төлөвлөгөөг хэлэлцэж баталлаа.
Хүүхдийн төлөө зөвлөл 2025 онд 14 үйл ажиллагаа хэрэгжүүлсэн нь 95 хувьтай үнэлэгджээ. 2025 онд орон нутгийн төсвөөс 1,3 тэрбум төгрөг, улсын төсвөөс 200 сая төгрөгийг хүүхэд хамгаалал, хөгжил оролцооны чиглэлд зарцуулсан байна. Тухайлбал, орон нутгийн төсвийн 900 гаруй сая төгрөгөөр Янзага зусланд их засвар шинэчлэл хийсэн нь сүүлийн жилүүдэд хийгдээгүй томоохон хөрөнгө оруулалт болсон юм.
2026 онд 30 арга хэмжээг хэрэгжүүлэхээр төлөвлөсөн бөгөөд бүхий л үйл ажиллагаагаа нь аймгийн Засаг даргын санаачилгаар хэрэгжүүлж буй "Бүх хайраа гэр бүлдээ" төсөлтэй уялджээ. Өөрөөр хэлбэл, 2026 онд гэр бүлийн тогтвортой байдлыг бий болгох, хүүхдэд ээлтэй орчин нөхцлийг бүрдүүлэхэд анхаарч ажиллах юм байна.
Ялангуяа, байгууллагын эцэг эхийн зөвлөлөөр дамжуулан хүүхэд хамгааллын бодлогыг хэрэгжүүлэх, Хөдөдмөрийн тухай хуулийн 43.3 дахь заалтын хэрэгжилтийг хангах гэх мэт үйл ажиллагаанд Хүүхдийн төлөө зөвлөлийн гишүүн байгууллагууд илүү манлайлал үзүүлж оролцох ёстойг онцолсон. Түүнчлэн хурлаар өсвөр үеийнхэнд чиглэсэн урьдчилан сэргийлэх ажил, эрүүл мэндийн үйлчилгээний хүртээмж, хяналт шалгалтын үр дүн, цаашид хэрэгжүүлэх арга хэмжээний талаар санал солилцохын зэрэгцээ зарим тулгамдсан асуудлыг шийдэлтэй нь эргэн танилцуулахыг холбогдох албаныханд чиглэл болголоо.
Мөн энэ сарын 25-нд Орхон аймгийн хүүхдийн "АНХДУГААР ЗӨВЛӨГӨӨН"-ийг зохион байгуулахаар төлөвлөжээ. Энэхүү зөвлөгөөн нь хүүхдийн дуу хоолойг нэгтгэж, санал бодлыг бодлого шийдвэрт тусгах, ирээдүйн хөгжилд чиглэсэн чухал арга хэмжээ болно гэж үзэж байна.
Мэдээллийн төв
