2026 онд Зууны манлай бүтээн байгуулалт Эрдэнэт хотын түүхт 50 жилийн ой тохиож буй. Аймгийн ИТХ-ын ээлжит бус 9-р хуралдаанаар /2025.12.24/ ажлын хэсгээс бэлтгэл ажлын явцын талаар танилцуулга, мэдээлэл хийлээ.  Аймгийн Засаг даргын захирамжаар түүхт ойн арга хэмжээг тэмдэглэн өнгөрүүлэхтэй холбоотой бэлтгэл хангах ажлын хэсгийг  27 хүний бүрэлдэхүүнтэйгээр байгуулан, аймгийн ЗДТГ-ын дарга Б.Ганзориг  ахалж байна. 

Ерөнхий ажлын хэсэг 6 дэд ажлын хэсэгтэй, салбар тус бүрээр бэлтгэл ажилдаа ороод байна. 

•  Ёслол хүндэтгэлийн арга хэмжээг зохион байгуулах, 
•  Хөрөнгө оруулалт, бүтээн байгуулалт, тохижилтын дэд ажлын хэсэг,
•  Аж ахуйн нэгж байгууллагуудтай уулзалт зохион байгуулах,
•  Соёл урлагийн арга хэмжээ зохион байгуулах,
• .Спортын арга хэмжээ зохион байгуулах,
•  Хэвлэл мэдээлэл, сурталчилгаа 

50 жилийн ойг угтсан бүтээн байгуулалтын 124 ажлыг 58,7 тэрбум төгрөгөөр хийж гүйцэтгэх урьдчилсан тооцооллыг гаргажээ. Үүнээс орон нутгийн төсвийн хөрөнгө оруулалтаар  9,8 тэрбум, Баян-Өндөр сумын төсвийн хөрөнгө оруулалтаар 200 сая, Жаргалант сумын хөрөнгө оруулалтаар 2.1 тэрбум, томоохон аж ахуйн нэгж байгууллага, иргэдийн хандиваар 46.6 тэрбум төгрөгийг босгохоор төлөвлөөд байна.

 Ажлын хэсгийн дарга, ЗДТГ-ын дарга Б.Ганзориг хэлэхдээ “Бид түүхт 50 жилийн ойгоо угтаж энэ онд орон нутгийн төсвийн хөрөнгө оруулалтаар хотын өнгө үзэмжийг сайжруулах, иргэдийн амьдарлын чанарыг нэмэгдүүлэх зорилгоор  бүтээн байгуулалтын олон ажлыг хийж гүйцэтгэхээр төлөвлөсөн” гэдгээ онцлов.  Тэдгээрээс онцолбол, А.Амарын талбайг гантиг чулуун хавтангаар шинэчлэх, хотын түүх болсон Урт цагааны гудамжыг засч сайжруулах, дурсгалт газар бий болгох, хотын ногоон байгууламжийг нэмэгдүүлэх зэрэг ажлыг тусгасан байна. 

Мөн Эрх чөлөөний өргөн чөлөөний Чандмань уулзвараас 5-р хорооллын уулзвар хүртэлх авто замыг шинэчлэх,   цахилгаан машин цэнэглэх болон авто зогсоол байгуулах, түүхт ойг зорин ирсэн иргэдэд зориулсан отоглох цэг  байгуулах  зэрэг бүтээн байгуулалтын ажлыг тусгажээ. Түүнчлэн Орхон аймаг, Эрдэнэт хотоос  төрөн гарсан Хөдөлмөрийн баатар Э.Содномпэлжээ, дэлхийн шатрын аварга Б.Мөнгөнзул зэрэг спортын алдартнуудын нэрэмжит  19 төрлийн тэмцээн уралдаан,  35 соёл урлагийн  арга хэмжээг зохион байгуулах төлөвлөгөөг гаргаад байна.

Эрдэнэт хотын унаган иргэд, хөдөлмөрчид, Эрдэнэт хотоор овоглосон хэн бүхний дэмжлэгтэйгээр  бий болгох хандивын санхүүжилтээр 88 арга хэмжээг хэрэгжүүлнэ.  Үүнд, Цэнгэлдэх хүрээлэнгийн  засвар, цэцэрлэгт хүрээлэнд хүүхдийн тоглоом нэмэгдүүлэх, Хаягжуулалтын стандарт нэвтрүүлэх, угтах хаалга орчмыг тохижуулах, Баян-Өндөр хайрхан болон Бурхан багшийн сэрэг дүр орчмыг тохижуулах  зэрэг томоохон бүтээн байгуулалтын ажлыг гүйцэтгэхээр төлөвлөж байна.

Аймгийн ИТХ-ын төлөөлөгчдөөс үйлчилгээний байгууллагуудын захиалгын цахим платформыг нэвтрүүлэх, бүтээн байгуулалтын ажилд томоохон аж ахуйн нэгж байгууллагыг татан оролцуулахад ААНОАТ-ын тухай хуулийг сурталчлах, түүхэн баримтат кино, ном зэрэгт мэдээлэл дутуу оруулахгүй байх зэрэг олон саналыг илэрхийллээ. 

Ирэх хоёрдугаар сараас эхлэн сар бүр төлөөлөгчдийн Мэдээллийн цагаар 50 жилийн ойн бэлтгэл хангах ажлын хэсэг мэдээлэл хийж байхаар тогтов. 

Мэдээллийн төв