Зэс Эрдэнийн хувь ХХК 7-р сургуульд химийн, 4-р сургуульд физикийн кабинет тохижуулан өглөө
Орхон аймаг, “Зэс Эрдэнийн хувь” ХХК-ийн 2025 оны хамтын ажиллагааны хүрээнд ерөнхий боловсролын 7 сургууль, 4-р сургуульд химийн болон физикийн хичээлийн иж бүрэн кабинетийг тохижуулан, хүлээлгэн өглөө.
Орхон аймаг жил бүр уул уурхайн үйлдвэрүүдтэй хамтын ажиллагааны гэрээ, төлөвлөгөө байгуулан боловсрол эрүүл мэнд нийгмийн салбарт хамтран ажилладаг билээ. Тухайлбал, 2024 онд “Эрдэнэт үйлдвэр” ТӨҮГ-ын хамтын ажиллагааны төлөвлөгөөний хүрээнд ерөнхий боловсролын сургуулийн 1-5 дугаар ангийн сурагчдын үдийн хоолны зардлыг нэмэгдүүлэхэд 1,9 тэрбум төгрөгийг хамтран шийдвэрлэж байв.
Мөн “Ачит Ихт” ХХК ерөнхий боловсролын 6-н сургуульд химийн кабинетийг байгуулсан. Хамтын ажиллагааны уламжлал болсон нэг арга хэмжээ нь химийн хичээлээр анги нийтийг хамарсан масс олимпиадыг жил бүр зохион байгуулж байна.
Энэхүү сайн туршлагыг “Зэс эрдэнийн хувь” ХХК үргэлжлүүлэн 7-р сургуульд 76 сая төгрөгөөр химийн, 4-р сургуульд 65 сая төгрөгөөр физикийн хичээлийн кабинетуудыг засварлаж, тохижуулан, сургалтын хэрэглэгдэхүүний хамтаар хүлээлгэн өглөө. Ингэснээр аймгийн хэмжээнд 7 дахь ерөнхий боловсролын сургууль химийн иж бүрэн лабораторитой, нэг сургууль физикийн судлагдахууны иж бүрэн анги танхимтай болж байна.
1987 онд байгуулагдаж байсан 7-р сургууль анхны орчин үеийн стандартад нийцсэн иж бүрэн лабораторитой болсонд багш, сурагчид сэтгэл хангалуун байна. Тус сургуулийн дунд, ахлах ангийн 300 гаруй сурагч онолын мэдлэгээ практикаар бататгаж, химийн хичээлийг гүнзгийрүүлэн судлах боломж бүрдлээ.
Харин ерөнхий боловсролын 4-р дүгээр сургууль нь 2015 онд физикийн хичээлийн сургалтын хэрэглэгдэхүүнтэй болсон ч бүрэн дүүрэн ашиглах анги танхим дутагдалтай байсан нь ийн шийдэгдлээ.
“Зэс Эрдэнийн хувь” ХХК 2024 онд 100 сая төгрөгийн хөрөнгө оруулалтаар 9 арга хэмжээг хэрэгжүүлсэн бол 2025 онд 10 арга хэмжээг 150 сая төгрөгөөр хэрэгжүүлэхээр ажиллаж буйн нэг нь боловсролын салбарт хийж буй энэхүү хөрөнгө оруулалт юм.
Мэдээллийн төв
