Энэ онд орон нутгийн төсвийн 28,4 тэрбум төгрөгийн хөрөнгө оруулалтаар 40,50 жилийн насжилттай инженерийн шугам сүлжээгээ шинэчилж байна. Энэ нь ашиглалтын хугацаа дууссан шинэчлэх шаардлагатай 163 км шугам сүлжээний 8 хувийг нь шинэчилж буй хөрөнгө оруулалт юм. Мөн ЕСБХБ-ний санжүүжилтээр төвийн 4 багт цэвэр усны шугамын шинэчлэлийн ажил хийгдэж байна. 

32 байршилд шугам сүлжээний шинэчлэлийн ажил хийгдэж байгаа бөгөөд ажлын гүйцэтгэл 80 хувьтай үргэлжилж буйг мэргэжлийн байгуулагаас мэдээллээ. 

Шугам сүлжээний шинэчлэлийн ажлыг нэр төрлөөр нь задалбал Ус дулаан, дамжуулах төв, Ус дулаан түгээх төвийн шинэчлэл, цэвэр усны шугамын шинэчлэлийн 13 ажил,  цэвэр усны шугам шинэчлэлийн 3 ажил, гадна, дотор сантехникийн шугам сүлжээний засварын 4 ажил, ус түгээх байрны засвар 6 ажил, үерийн усны суваг шуудууны 6 ажил байна. 

Шугам сүлжээний шинэчлэлийн ажлын хүрээнд хийгдэж буй нэг томоохон ажил нь “ЭДЦС”  ТӨХК-ийн техникийн усны нөөц 5,4км шугамыг   орон нутгийн төсвийн 4,8 тэрбум төгрөгийн хөрөнгө оруулалтаар  шинээр барьж байна. Өнөөдрийн байдлаар ф300мм-ийн голчтой 3000м-ын шугамын угсралт хийгдсэн бөгөөд гүйцэтгэгч “Ахин-Ундрах” ХХК ирэх сард хүлээлгэн өгнө. 

Техникийн усны нөөц шугам гэдэг нь  “ЭДЦС” ТӨХК-ийн технологийн хэрэгцээний усыг хангадаг  шугам.   Дулааны хэрэглээ жилээс жилд  нэмэгдэж байгаа энэ үед   Эрдэнэт хотыг найдвартай  дулаанаар  хангахад өндөр ач холбогдолтой шугамыг барьж буй нь энэ оны онцлох хөрөнгө оруулалтын нэг ажил юм. 

Мөн 13 байршилд  Ус дулаан, дамжуулах төв, Ус дулаан түгээх төвийн шинэчлэлийн ажил хийгдэж байгаагаас Бүрэнбүст багийн Ус дулаан түгээх төв  5-5-ын дулаан цэвэр усны 800м шугамын шинэчлэл, Согоот багийн Ус дулаан түгээх төв 6-2-ын дулаан, цэвэр усны 520 м шугамын шинэчлэл,  Уурхайчин багийн Ус дулаан дамжуулах төв 3-3-ийн дулаан, цэвэр усны 175м шугамын шинэчлэл тус тус 100 хувь дууссан. 

Уурхайчин багийн Ус дулаан дамжуулах төв 3-4-ийн дулаан, цэвэр усны 334м шугамын шинэчлэл, Оюут багийн Ус дулаан түгээх төв 2-1-ийн дулаан цэвэр усны 714м шугамын шинэчлэл, Оюут багийн Ус дулаан түгээх төв 2-5-ын дулаан, цэвэр усны 650м шугамын шинэчлэл зэрэг 5 ажил 80 гаруй хувийн гүйцэтгэлтэй үргэлжилж байна. 

Мөн 11-р хороолол А хэсгийн дулаан хангамжийг сайжруулах -ТК 16 худгаас Ус дулаан хуваарилах төв 4-14 хүртэлх 1-р хэлхээний шугам сүлжээг өргөтгөх,  хоёрдугаар хэлхээний шугамын өргөтгөх, ТК-6 худгаас дулаан, цэвэр усны шугам шинээр татах ажил /нийт 2113м шугам/ 55 хувийн гүйцэтгэлтэй, “Орчлонтулга” ХХК гүйцэтгэгчээр  ажиллаж байна. 

Энэ мэт шугам сүлжээний шинэчлэлийн хөрөнгө оруулалтын ажлын  үр дүнд орон сууцны хорооллын 5824 өрхийг хангаж буй инженерийн шугам сүлжээний нэвтрүүлэх чадвар сайжрах юм.  

Мэдээллийн төв