ЕБ-ын VII сургуулийн тусгай хэрэгцээт хүүхдүүдэд шинэ автобус үйлчилнэ
Аймгийн Засаг дарга Б.Зоригтбаяр VII сургуулийн үйл ажиллагаатай танилцаж хэд хэдэн асуудлыг шийдвэрлэлээ.
Дэнж багийн VII сургууль нь 1987 онд байгуулагдсан бөгөөд өнөөдрийн байдлаар ердийн болон тусгай хэрэгцээт нийт 750 гаруй сурагч суралцдаг ажээ. Хөгжлийн бэрхшээлтэй 58 хүүхэд байдаг бөгөөд эдгээр сурагчдыг гэр сургуулийн чиглэлд зөөх автобус нь ашиглалтын хугацаа дуусаж, бүрэн зогссон талаар сургуулийн захирал ярьж байлаа. Түүнчлэн сургуулийн II байр стандартын шаардлага хангаагүй барилгад сургалтын үйл ажиллагаа явуулдаг, хүүхдүүд спорт заал руу орохдоо хол зам туулдгаас өвлийн улиралд ханиад томуу тусах эрсдэл их гэх мэт асуудлыг танилцууллаа.
Иймд аймгийн Засаг даргын зүгээс хот тохижуулах газрын нөөцөд байгаа нэг нийтийн тээврийн автобусыг хичээл амартал үйлчилгээнд явуулж, ирэх хавар тусгай хэрэгцээт хүүхдүүдэд зориулсан автобус худалдан авах хөрөнгийг шийдвэрлэхээр боллоо.
Мөн 960 хүүхдийн зориулалттай, урлаг спорт заалтай сургуулийн барилга барих төсвийг ирэх оноос шийдвэрлэж, газрын асуудлыг судлахыг холбогдох албаныханд үүрэг болголоо.
Мэдээллийн төв
