I улирлын төрийн албаны ерөнхий шалгалтын бүртгэл энэ сарын 12-нд эхэлнэ
Монгол Улсын Төрийн албаны зөвлөлийн Орхон аймаг дахь салбар зөвлөлөөс энэ оны I улирлын төрийн албаны ерөнхий шалгалтын бүртгэлийн талаар ЗДТГ-ын ТЗУХ-ийн дарга, ТАЗСЗ-ийн гишүүн М.Жанболат, ТАЗСЗ-ийн нарийн бичгийн дарга А.Өнөржаргал нар мэдээлэл өглөө. 2025 онд төрийн албаны нөөц бүрдүүлэх ерөнхий шалгалтыг хуваарийн дагуу дөрвөн удаа зохион байгуулахаар тогтож, хугацааг товлон нийтэд зарлан мэдээлээд буй.
Энэ оны нэгдүгээр улирлын төрийн албаны ерөнхий шалгалтын бүртгэл хоёрдугаар сарын 12-ний өдрийн 09:00 цагт эхэлж 27-ны өдрийн 09:00 цагт хаагдана. Төрийн албаны салбар зөвлөлийн цахим хуудсаар бүртгэл хийгдэж, хуваарийн дагуу гуравдугаар сарын 12-19-ны өдрүүдэд орон даяар шалгалтыг зохион байгуулах юм.
2024 онд Орхон аймагт 421 иргэн шалгалтад оролцохоор бүртгүүлсэнээс 344 иргэн буюу 81.7 хувь нь шалгалтад оролцон 134 иргэн буюу 38.9 хувь нь тэнцэж, төрийн жинхэнэ албаны нөөцөд бүртгэгджээ.
Ерөнхий шалгалт зохион байгуулах бэлтгэл ажлын хүрээнд Орхон аймаг дахь Төрийн албаны салбар зөвлөл “Бат гэгээн эрдэм” ТББ -тай хамтран ерөнхий шалгалтад бүртгүүлсэн иргэдэд зориулсан сургалтыг зохион байгуулж буй. Мөн Төрийн албаны зөвлөлөөс төрийн албаны ерөнхий шалгалтад оролцогчдод зориулсан 2024 оны “Төрийн албаны ерөнхий шалгалтын сорил, даалгавар” цахим ном, “E-taz” гар утасны аппликейшныг шинэчлэн гаргасан.
Цаашид төрийн албанд ажиллах хүсэлтэй нийт иргэдийг төрийн албаны ерөнхий шалгалтын бүртгэлээ баталгаажуулж амжилттай оролцохыг урьж байна.
Мэдээллийн төв
