Ерөнхий боловсролын сургуулиудад боловсролын сэтгэл зүйч ажиллаж байна
Сурагчид нууцыг нь чандлан хадгалдаг сэтгэл зүйчтэй болсон дөрөв дэх хичээлийн шинэ жилээ эхлүүллээ. 2021 оны өдийд боловсролын сэтгэл зүйчид хийх ажлаа таниулахыг хичээж байсан бол өнөөдөр тэднийг хамгийн итгэлт, дотны хүн гэдгийг сурагчид хэдийн хүлээн зөвшөөрчээ.
Боловролын салбарт 2021-2024 онд нэвтрүүлсэн томоохон ажил нь энэхүү боловсролын сэтгэл зүйч юм. 2021 оноос үе шаттайгаар сургуулиадад сэтгэл зүйчээр ажиллах мэргэжилтнүүдийг бэлтгэж, сургалтад хамруулснаар 2024 онд төрийн өмчийн 17 сургууль сэтгэл зүйчтэй болж сурагч, эцэг эх, асран хамгаалагчдад сэтгэлзүйн боловсрол олгох олон талт үйл ажиллагааг зохион байгуулж байна.
Сургуулиудад сэтгэл зүйч ажиллаж эхэлснээр хүүхдүүдийн сэтгэл зүйн байдлыг сургуулийн орчинд төлөвшүүлэх, бие бялдрын хоцрогдлыг эрт илрүүлж хөгжүүлэх, тулгамдаж буй бэрхшээлтэй асуудлуудыг нь шийдвэрлэх, багш, эцэг эхчүүдэд зөвлөгөө өгөх, гэр бүл, сургууль дээр үүссэн зөрчлийг шийдвэрлэх гээд олон талын эерэг үр дүн гарч эхэлжээ.
Ялангуяа, хүүхдийг шилжилтийн эмзэг үеэ зөв даван туулахад нь тусалж, элдэв муу зуршилд өртөхөөс сэргийлэх талаар боловсролын сэтгэл зүйчид зөвлөж байна. Өнгөрсөн онд 10 мянга гаруй сурагчийг сэтгэл зүйн ганцаарчилсан болон бүлгийн сургалтад хамруулж, зөвлөгөө мэдээлэл өгсөн. Мөн эрсдэлт нөхцөлд байгаа 11 сурагчийг илрүүлж, хүүхэд хамгааллын хариу үйлчилгээг үзүүлжээ.
Энэ хичээлийн жилд олон улсын байгууллагатай хамтран 2, 7 дугаар сургуулийн сэтгэл зүйчдийн өрөөг тохижуулах төслийг хэрэгжүүлж байна.
Мэдээллийн төв
