Илгээлтийн эздийн 50 жилийн  ой,  Хангайн бүсийн хурдан морьдын уралдаан, Орхон аймгийн баяр наадам ирэх сарын 1,2-ны өдрүүдэд болно. Баяр наадамтай холбоотойгоор гарсан шийдвэрүүдийг нэгтгэн хүргэж байна. 
                       

                                                               Ажлын өдрийг шилжүүлэх тухай захирамж гарав 

Монгол Улсын Засгийн газрын тогтоолоор Илгээлтийн эздийн 50 жилийн ой, Хангайн бүсийн хурдан морьдын уралдаан, Орхон аймгийн баяр наадмыг ирэх сарын 1,2-нд тэмдэглэн өнгөрүүлнэ.  Иймд холбогдох хуулиудыг үндэслэн аймгийн хэмжээнд ажлыг өдрийг шилжүүлэх тухай Засаг даргын А/530 дугаар захирамж гарлаа. 

• Наймдугаар сарын 1-ний ажлын өдрийг наймдугаар сарын 10-ны бямба гарагт, 
• Наймдугаар сарын 2-ны ажлын өдрийг наймдугаар сарын 17-ны бямба гарагт тус тус шилжүүлэв. 

                            Нийтийн тээвэр  нэмэлтээр үйлчилнэ 

Баяр наадмын өдрүүдэд морь барианы чиглэлд нийтийн тээврийн автобус Шанд, Их залуу, Хорооллын эцэс гэсэн гурван чиглэлд нэмэлтээр иргэдэд үйлчилнэ. 

• Энэ сарын 31-нд Наадмын талбайн зогсоолоос 09:00, 13:00, 16:30 цагт 
• Наймдугаар сарын 1-нд 09:00, 13:00, 17:00 цагт 
• Наймдугаар сарын 2-нд 8:30, 11:30, 14:00 цагт тус тус морь ирэх цагтай уялдан дараах чиглэлийн дагуу явна.                                   

Импортын барааг худалдаанд гаргахгүй

Баяр наадмын үеэр импортын бараа буюу  оймс, гутал, хувцас, малгай худалдаалахгүй. Үндэсний бараа бүтээгдэхүүн худалдана.   Мөн түүнчлэн лото, шаар хагалах, шоо хаях, хөдөлгөөнт тоглоом буюу машин, дугуй зэрэг үйлчилгээ явуулахгүй. Наадмын талбайд тоглоомын үйлчилгээ явуулахгүй бөгөөд Эрдэнэт хүүхдийн паркийн хашаанд төвлөрөн  үйл ажиллагаа явуулна.

• Тоглоомын үйлчилгээ эрхлэгчид аюулгүй байдлыг нягт хангаж ажиллана.
•  Галын аюулгүй байдлыг ханган ажиллаж, шаардлага хангасан гал унтраагчтай байна г
•  Үйлчилгээ эрхлэгчид Е-баримт олгодог байна гэсэн шаардлагыг тавьж байна. 
• Аливаа зөвшөөрөлгүй үйл ажиллагаа явуулахыг хориглоно. 

 Урлаг, соёлын арга хэмжээнд  оролцсон хүүхдүүдэд 100 мянган төгрөгийн урамшуулал олгоно 

Баяр наадмын нээлт, хаалтын үйл ажиллагаанд  нийтдээ 500 гаруй уран бүтээлчид, хүүхдүүд оролцон бэлтгэлээ хангаж байна. Өнгөрсөн зургаадугаар сарын 6-нд хуралдсан аймгийн ИТХ-ын ээлжит бус XVI хуралдаанаар баяр наадмыг зохион байгуулах хорооны бүрэлдэхүүн, төсвийн задаргааг хэлэлцэж баталсан. Энэ үеэр наадмын нээлт, хаалтын үйл ажиллагаанд оролцох хүүхдүүдийн урамшууллыг 50 мянган төгрөгөөр нэмэгдүүлж 100 мянган төгрөг болгосон билээ. 
Хүүхдүүдэд олгох мөнгөн урамшууллыг аймгийн Соёл урлагийн газар хариуцаж байгаа бөгөөд хүүхдүүдийн өөрсдийн нэрийн данс уруу нь дансгүй хүүхдүүдийн урамшууллыг эцэг эхийнх нь данс уруу шилжүүлэх юм. 
                                           Наадмын үеийн авто машины зөвшөөрөл олгохгүй 

Орхон аймаг сүүлийн гурван жил баяр наадмын үеийн авто машины зөвшөөрөл олгохоо больсон билээ.  Илгээлтийн эздийн 50 жилийн  ой,  Хангайн бүсийн хурдан морьдын уралдаан, Орхон аймгийн баяр наадмаар энэ уламжлалаа дагана. Хурдан морины уралдааныг  чиглүүлэгч, даамал, эмнэлгийн машин дагана. Өөр бусад машин дагахгүй. 

                                     Хурдан морины сэрвээний өндрийг лазер хэмжигчээр хэмжинэ 

Өмнөх жилүүдэд хурдан морины сэрвээний өндрийг палкметрээр  хэмждэг байсан бол энэ жил улсын баяр наадамтай адил Стандарт хэмжил зүйн төвд баталгаажсан хоёр төхөөрөмж 

/лазер хэмжигч/-ээр хэмжинэ. Ингэхдээ  тусгайлан талбай бэлдэж,  лед дэлгэцээр шууд дамжуулж наадамчин олонд   хэмжилтийг ил тод харуулна. Лазер хэмжигчээр хэмжих нь хүний оролцоо бага гэдгээ онцлогтой юм.

                                         Баяр наадам угтсан “Бүх нийтийн их цэвэрлээ”-г өрнүүлж  байна 

Аймгийн хэмжээнд баяр наадам угтсан “Бүх нийтийн их цэвэрлэгээ”-г энэ сарын 26-нд зохион байгуулна. Иймд аж ахуйн нэгж байгууллагуудыг өөрийн эзэмшлийн ойр орчмын газраа цэвэрлэж, цэвэрлэгээнд идэвхтэй оролцохыг уриалж байна. 

Мэдээллийн төв