“Номын өргөө” цогцолбор барилга 2023 оны шилдэг барилгын нэгээр шалгарлаа
Монголын хот байгуулалтын хөгжлийн танхимаас 19 дэх жилдээ зохион байгуулж буй “Шилдэг барилга” ёслолын арга хэмжээ өчигдөр болж, “Үзэсгэлэн болгогч” хэмээх усан туулай жилийн шилдэг барилгуудыг нэрлэсэн. Аймгийн ЗДТГ-ын захиалгаар “Шинжүү” ХХК гүйцэтгэж, ашиглалтад оруулаад буй “Номын өргөө” цогцолбор барилгыг “Үзэсгэлэн болгогч” хэмээх усан туулай жилийн шилдэг барилгын нэгээр өргөмжиллөө.
Орон нутгийн төсвийн 4,6 тэрбум төгрөгийн хөрөнгө оруулалтаар боссон 4 давхар уг бүтээн байгуулалт нь номын сан, сургалт, хурал уулзалтын танхимтайн бүх насныхан сурч хөгжих, чөлөөт цагаа зөв боловсон өнгөрүүлэхэд зориулсан олон улсын стандартад нийцэхүйц соёлын цогцолбор юм.
Мэргэжлийн байгууллагуудаас шилдэг барилгыг тодруулахдаа барилгын хийц технологи, архитектур төлөвлөлтийн онцлог, барилга барих хугацаанд орон нутагтаа бий болгосон түр ажлын байр гэхчлэн олон шалгуурыг үндэслэдэг байна.
Аймгийн “Номын өргөө” цогцолбор барилгын хийц технологи нь уншлага, сургалтын танхимуудад байгалийн гэрэлтүүлэгтэй орчинг бүрдүүлэх зорилгоор барилгын нүүрэн талд шалнаас тааз хүртэл шилэн фасадаар төлөвлөсөн. Нарны хурц гэрлийн тусгалыг танхимд бууруулах үүднээс босоо металл баганыг нэмэлтээр шийджээ.
Архитектур төлөвлөлтийн онцлог нь цутгамал төмөр бетон каракас, шилэн болон металл фасад өнгөлгөөтэй. Барилгын босоо чиглэлд зоорийн давхарыг 4-р давхартай холбосон 12 хүний хүчин чадалтай 900кг даацтай цахилгаан шат мөн баруун, зүүн жигүүрт тус тус шаттай.
Түүнчлэн 3-4-р давхарыг хооронд холбосон шилэн гэгээвчээр хүлээлгийн болон амралтын танхимуудад байгалийн гэрэл тусахаар шийдсэн байна.
“Шинжүү” ХХК нь 1995 оноос хойш өнөөг хүртэл 29 дэх жилдээ барилга угсралт засварын ажлын чиглэлээр 30 гаруй инженер техникийн ажилтантайгаар үйл ажиллагаагаа явуулж байна. Барилгыг барих хугацаанд орон нутагтаа 80-100 түр ажлын байрыг бий болгож, уг бүтээн байгуулалт ашиглалтад орсноор орон нутагт 15 ажлын байр шинээр бий болж байгаа билээ.
Мэдээллийн төв
