Засаг даргын зөвлөлийн өнөөдрийн хуралдаанаар Тамхины болон жижиглэн худалдааны түргэн үйлчилгээний цэгүүдэд хийсэн хяналт шалгалтын дүнгийн талаарх мэдээллийг сонсов. 
Аймгийн Засаг даргын 2023 оны А/275 дугаар захирамжаар байгуулагдсан ажлын хэсгийн гишүүд Баян-Өндөр сумын 13 багийн нутаг дэвсгэрт зам дагуу үйл ажиллагаа явуулж буй 45 ТҮЦ-т ажилласан байна. 

Дээрх ТҮЦ-үүдийн 26 нь тамхины цэг,  үлдсэн нь зайрмаг, түргэн хоол, сүү, цагаан идээний чиглэлээр үйл ажиллагаа явуулдаг аж. Мөн 35 нь түр зөвшөөрөлтэй, 10 нь зөвшөөрөлгүй байсан гэх мэдээллийг ажлын хэсгээс танилцуулав. 

ТҮЦ-үүд нь авто замын зорчих хэсэг, хөвөө, зурвас газарт байрлаж хөдөлгөөнд саад учруулан үзэгдэх орчин хязгаарласан,  явган хүний зам хаасан, ногоон байгууламж дээр байршуулсан, хүнсний аюулгүй байдал, эрүүл ахуйн дэглэм зөрчсөн, хаяг, шошгогүй хүнсний бүтээгдэхүүн худалдан борлуулсан, ажлын байр нь эрүүл ахуйн шаардлага хангаагүй гэхчлэн зөрчил илэрсэн байна. 

Энэ нь Авто замын тухай хууль, Эрүүл ахуйн тухай хууль, Хүнсний бүтээгдэхүүний аюулгүй байдлыг хангах тухай хууль, Зөрчлийн тухай хуулийг зөрчсөн үйлдэл ажээ. 

Хэлэлцэж буй асуудалтай холбогдуулан Зөвлөлийн гишүүд санал хэлсэн. 

ЗДТГ-ын дарга Ш.Ганболд:
-Баян-Өндөр сумын ЗДТГ-аас тамхи болон жижиглэн худалдааны цэгүүдэд үйл ажиллагаа  явуулах зөвшөөрөл олгодог. Эцэст нь асуудлыг нь аймгийн ЗДТГ хэлэлцэж байна. Зүй нь Баян-Өндөр сумын ЗДТГ энэ асуудлаа цэгцлэх ёстой. Хуулиараа тийм юм. Хотын өнгө үзэмж гэдэг асуудал бий. Олон янзын хэмжээтэй, өнгө зүстэй, том жижиг ТҮЦ-нүүдэд зөвшөөрөл өгснөөр өнөөдөр ийм зөрчлүүд гарч байгаа юм. Цаашид тамхины зөвшөөрөл нэмж олгохоо зогсоох хэрэгтэй. Нэг хэсэг нь тамхины хор хөнөөл гээд яриад байдаг нөгөө хэсэг нь зөвшөөрөл өгөөд байж болохгүй шүү. Тамхины цэгүүдийн эзэмшигч нь нэг,  сүлжээ үүссэн бол цуцлах хэрэгтэй. Нэг ч гэсэн иргэн ажлын байртай орлоготой болог гэж зөвшөөрөл өгдөг болохоос хэн нэг хүнд  давуу эрх бий болгож болохгүй. 

Засаг даргын орлогч А.Түвшинжаргал:
-Ажлын хэсгээс энэ 45 ТҮЦ тодорхой хэд хэдэн хуулийн заалтыг зөрчиж байгаа учраас үйл ажиллагааг нь зогсооё гэсэн саналыг оруулж ирж байгаа юм байна. Эдгээр иргэдийн дараагийн ажлын байр нь юу байх юм. Энэ талыг нь бодсон уу. Зөвшөөрлийг  ер нь ямар үйл явцаар олгодог юм.

Засаг дарга С.Батжаргал:
-Зөвшөөрөл олгохдоо анхнаасаа хууль, журамдаа нийцүүлэхгүй яасан юм. Одоо 45 хүний ажлын байрыг нь хаана гэж болохгүй  шүү дээ. Ажлын хэсэг, мэргэжлийн байгууллага аль ч нь байсан хааж, зогсооно гэхээс илүүтэй хууль, журамд нийцүүлнэ, засаж сайжруулна гэж ярих нь зүйтэй. Баян-Өндөр сум хурлын хуралдаанаараа аймаг орон нутагтаа дагаж мөрдөх нэг стандарт, журам боловсруулаад батлуулчих хэрэгтэй шүү дээ. Стандарт гэж байх ёстой. Хуульд юу гэж заасан байна түүнийхээ хүрээнд шаардлагаа тавиад иргэдээс хариуцлага нэхдэг байх ёстой. Баян-Өндөр сумаас ийм, ийм зөвшөөрөл олгодог гээд бүх мэдээллээ иргэдэд нээлттэй ил тод мэдээл. Холбогдох хуулиудаа сурталчил. 

Баян-Өндөр сумын Худалдаа үйлдвэрлэл үйлчилгээ хариуцсан мэргэжилтэн Ц.Өсөхжаргал:
-Тамхины тухай хуулийн хүрээнд тамхины тусгай зөвшөөрлийг 3 жилээс доошгүй хугацаатайгаар Баян-Өндөр сумын Засаг даргын захирамжаар олгодог, түр зөвшөөрлийг нэг жилийн хугацаатай сумын ажлын хэсгийн шийдвэрээр гэрчилгээжүүлж олгодог. 

Ийн Засаг даргын зөвлөлийн хурлаас ТҮЦ үйл ажиллагаа явуулж болох болохгүй газруудын байршлыг тодорхой болгож олон нийтэд мэдээлэх, одоо үйл ажиллагаа явуулж буй ТҮЦ-үүдийг  байгаа журамд нь нийцүүлж үйл ажиллагаа явуулахад нь анхаарч хяналт тавих, тамхины бөөний цэгийн тоог нэмж зөвшөөрөл олгохгүй байх гэхчлэн хэд хэдэн чиглэлээр үүрэг даалгавар өглөө. 

Тамхи худалдах үйл ажиллагаа эрхлэх зөвшөөрөл хүсэгч нь:

• Тамхины хяналтын тухай хуульд зааснаар тамхи худалдах үйл ажиллагаа эрхлэх зөвшөөрөл хүсэгч иргэн нь тухай үйлчилгээний чиглэлээр үйл ажиллагаа эрхлэх талаар гаргасан улсын байцаагчийн болон ажлын байрны дүгнэлт, 
• Худалдаа, хоол үйлдвэрлэл, үйлчилгээний стандартын шаардлагыг дүгнэсэн стандартын хуудасны хуулбар, 
• Тухайн үйл ажиллагааг эрхлэх байранд хийгдсэн Онцгой байдлын асуудал хариуцсан төрийн захиргааны байгууллагын галын дүгнэлт, 
• тамхи худалдах үйл ажиллагаа эрхлэх зөвшөөрлийн хугацаа сунгуулах цагдаагийн байгууллагын тодорхойлолт, 
• Хяналтын улсын байцаагчийн дүгнэлтийг авсан байх шардлагыг тавьдаг. 

Хүнсний чиглэлээр үйл ажиллагаа эрхлэгчид нь:

• Бүтээгдэхүүн үйлчилгээний чанар, аюулгүй байдлыг хангаж, үйл ажиллагааныхаа үр дагаврыг өөрөө хариуцах, 
• Стандарт, техникийн зохицуулалтад нийцсэн барилга байгууламж тоног төхөөрөмж, багаж хэрэгсэл, агуулах, тээврийн хэрэгсэлтэй байх, 
• Боловсруулах болон нийтийн хоолны үйлдвэрлэл эрхлэх тохиолдолд мэргэжлийн эсвэл мэргэшсэн хүний нөөцтэй зэрэг шаардлагыг тавьдаг. 

Мэдээллийн төв