Пүрэв гаригийн 16:00 цагт орон даяар газар хөдлөлтийн аюулыг таниулах зарлан мэдээлэх дуут дохио дуугарна

Жил бүрийн гуравдугаар сарын дөрөв дэх долоо хоногийн пүрэв гаригт орон даяар гамшиг, ослын дуут дохиог ажиллуулж, бэлтгэл сургуулилт хийдэг уламжлалтай.
Энэ жил Газар хөдлөлтийн Стратегийн команд штабын сургуулилт болохтой холбоотойгоор хойшилж, энэ долоо хоногийн пүрэв гариг буюу 8-ны 16:00 цагт ЗАРЛАН МЭДЭЭЛЭХ ДУУТ ДОХИО улс орон даяар дуугарах юм.

Иймд иргэд, олон нийт гурван удаа дуугарах дуут дохиогоор байгаа байршлаасаа хамаарч аюулгүйн талбайд цугларна уу. Мэргэжлийн байгууллагын гаргасан тоо мэдээллээс харахад, 2011-2022 он хүртэл арван жилийн хугацаанд Монгол Улсад нийт 327 мянган удаагийн газар хөдлөлтийн чичирхийлэл бүртгэгджээ.

Монгол Улсын Үндэсний аюулгүй байдлын зөвлөл, Онцгой байдлын ерөнхий газар, нийслэлийн Засаг даргын Тамгын газар хамтран нийслэл, Орхон, Хөвсгөл, Сэлэнгэ, Дундговь зэрэг 7 аймагт Газар хөдлөлтийн Стратегийн команд штабын сургуулилт 7-9-ний өдрүүдэд зохион байгуулахаар бэлтгэл хангаж байна.

Лхагва гаригт өглөөний 06:00 цагт Хөвсгөл аймагт газар хөдөллөө гэсэн цагийн байдал өгөгдсөнөөр Газар хөдлөлтийн Стратегийн команд штабын сургуулилт эхэлнэ. Өөрөөр хэлбэл, улс орны хэмжээнд газар хөдлөлт болсон үед мэргэжлийн анги бүлэг танхимын хэлбэрээр яаж ажиллах вэ гэдэг сургуулилт болно.

Мэдээллийн төв