Нэгдүгээр улирлын төрийн албаны ерөнхий шалгалт өнөөдөр эхэллээ
2022 оны долоодугаар сарын 5-нд Төрийн албаны тухай хуульд нэмэлт өөрчлөлт орж, төрийн албаны ерөнхий шалгалтыг улиралд нэгээс доошгүй удаа зохион байгуулж байх зохицуулалтыг тусгасан. Төрийн албаны зөвлөлөөс 2023 онд төрийн албаны нөөц бүрдүүлэх ерөнхий шалгалтыг хуваарийн дагуу дөрвөн удаа зохион байгуулахаар тогтож, хугацааг товлон нийтэд зарлан мэдээлсэн билээ. Нэгдүгээр улирлын шалгалтын бүртгэл өнгөрсөн хоёрдугаар сарын 1-нээс гуравдугаар сарын 3-ныг хүртэл үргэлжилсэн.
Шалгалтад нийт 119 хүн бүртгүүлж, хоёр өдрийн турш хуваарийн дагуу шалгуулах юм.
Засгийн газраас “Төрийн улс төрийн албан тушаалд ажилласан хугацааг төрийн захиргааны албан тушаалын зохих ангилалд ажилласан хугацаанд дүйцүүлэн тооцох журам”-ыг баталсан.
Ингэснээр улс төрийн албан тушаалаас төрийн захиргааны албан тушаалд шилжин ажиллах хүсэлтэй иргэд ерөнхий шалгалтаар нөөцөд бүртгэгдэж, тусгай шалгалтад өрсөлдөн төрийн захиргааны албан тушаалд шилжин ажиллах боломжтой болжээ. Төрийн албаны ерөнхий шалгалтыг төрийн албанд ажиллах иргэдийн нөөцийг бүрдүүлэх зорилгоор 2019 оноос эхлэн зохион байгуулж байна.
Орхон аймгийн хувьд төрийн албаны ерөнхий шалгалтад 2019 онд 42, 2020 онд 122, 2021 онд 156, 2022 онд 93 хүн тэнцэж нөөцөд бүртгэгджээ. Эдгээр иргэдээс өнгөрсөн онд 39 иргэн тусгай шалгалт өгч төрийн албанд орж ажилласан байна.
Мэдээллийн төв
